2 Pwa 15

Judah teo pɛ Azaria taane

2 Tigisim 26:1-23

1Isarele teo pɛ Jeroboam paare dim bena finlei-yarepɛ bene dem wone mo Amazia bu Azaria#15:1 Azaria yere dedwoŋi ye Yuzia. déem di Judah teo paare. 2Azaria déem jege bena fuga-yaredo mo ye ba tiŋi‑o paare. O ma jeini Jerusalem ne o di paare dem o ke bena finnu-yalei. O nu wom yere mo Jekolia ye o nwoŋi Jerusalem. 3O totoŋa déem su Baŋa Wɛ yi lanyerane, nenɛɛne o kwo Amazia na ke tei to. 4De ko de, o wo wane o chɔge wara-jei selo ba na ke kaanem da to. Nɔɔna déem yeini ba ke kaanem de zwɛɛm pɛɛra jei sem konto ne ye ba wo yage.

5 Baŋa Wɛ déem ma pa se naywaane jaweo kom lɔgese Pɛ Azaria. O dɛ de jaweo kom konto mo o vo o te.#2 Tigisim 26:16-21 O déem zoore sɔŋɔ kolo na ye dáa dáa to wone mo. O bu Jotam ma leiri o nii pɛ sɔŋɔ kom de teo kom nɔn-bia baŋa ne o pa‑o.

6Azaria déem na di paare ye o ke wonnu telo to, de o totoŋa yam maama, ba popone-te ba tiŋi Judah Teo Pwa Seina tɔnɔ kom wone.#2 Tigisim 26:9-15 7Azaria ma te ye o vo o kwoa tei. Ba ma kwei‑o ba suli o kwoa bam yibeeli seeni David teo Jerusalem ne. O bu Jotam ma leiri o yuu ne o ji pɛ.#Izaya 6:1

Isarele teo pɛ Zekaria taane

8Judah teo pɛ Azaria paare dim bena fintɔ-nana bene dem wone mo Jeroboam bu Zekaria déem di Isarele teo paare. O jeini Samaria ne mo o di paare dem chane seredo. 9O déem toŋe lwarem o chɔge Baŋa Wɛ yiga mo nenɛɛne o kwoa bam de na ke tei to. O ma yɔɔre o ke wɛleera dwi delo Nebat bu Jeroboam déem na ke pa se Isarele tiina de da ba ke to.

10Jabese bu Salum déem ke chichuŋu de Zekaria. O ma vo o li‑o Ibeleyam ne de jara o go. O ma daare o leiri o di paare dem. 11Zekaria déem na di paare ye o toŋe wonnu telo maama, to ba popone-te ba tiŋi Isarele Teo Pwa Seina tɔnɔ kom wone. 12O toone dem konto ma pa se Baŋa Wɛ kwora kalo o na pɛ Jehu to ji chega, de o na tage o we, “Nmo dwi delo na wó saŋe n kwaga to wó di Isarele teo paare dem se ko taa vei dwia yana wɛɛne.”#2 Pwa 10:30

Isarele teo pɛ Salum taane

13Judah teo pɛ Yuzia paare dim bena fintɔ-nogo bene dem wone mo Jabese bu Salum déem di Isarele teo paare. O jeini Samaria ne mo o di paare dem chana dedoa yerane. 14Gadi bu Menahem déem zaŋe Tiraza teo ne o vo Samaria. O na yi da to, o ma li Salum de jara o go o daare o leiri o ji pɛ.

15Salum déem na di paare ye o toŋe wonnu telo maama to, de chichuŋu kolo o na ke de Zekaria to, ba popone-te ba tiŋi Isarele Teo Pwa Seina tɔnɔ kom wone.

16Menahem déem zege Tiraza ne o vo Tipisa#15:16 Tipisa naa Tapua o chɔge teo kom de ko nawuura yam maama, ko nɔn-bia bam na ve se ba sɛ ba pa‑o to ŋwaane. O ta ma lɔ ba kapwi sem ba pwi seeni o go.

Isarele teo pɛ Menahem taane

17Judah teo pɛ Azaria paare dim bena fintɔ-nogo bene dem wone mo Gadi bu Menahem déem di Isarele teo paare. O jeini Samaria ne mo o di paare dem o ke bena fuga. 18O déem toŋe lwarem o chɔge Baŋa Wɛ yiga. O paare dim maŋa kam maama wone o yɔɔre o ke wɛleera dwi delo Nebat bu Jeroboam déem na ke pa se Isarele tiina de da ba ke to mo.

19Asiria teo pɛ Pulu#15:19 Pulu yere dedwoŋi ye Tigilaf-Pilesa. déem cheiŋi Isarele tega kam mo. Pɛ Menahem ma kwei lu-nyenno na yi ywollu moro dedoa (1,000) to o pa Pɛ Pulu se o ma o kwoori‑o se Pulu woli‑o se o wane o fɔge o di dam Isarele teo kom ne. 20Menahem déem gwoni jene mo o pa Isarele naduna bam maama. O ma fe ba dedoa dedoa se ba ŋwe lu-nyenno sabu-dala finnu. O ma kwei sabu kom o pa Pɛ Pulu pa se o pipiri o viiri o daare Isarele tiina tega kam.

21Menahem déem na di paare ye o ke wonnu telo to, de o totoŋa yam maama ba popone-te ba tiŋi Isarele Teo Pwa Seina tɔnɔ kom wone. 22Menahem ma te ye ba kwei‑o ba suli. O bu Pekahia ma leiri o di paare dem.

Isarele teo pɛ Pekahia taane

23Judah teo pɛ Azaria paare dim bena finnu bene dem wone mo Menahem bu Pekahia déem di Isarele teo paare. O jeini Samaria ne mo o di paare dem bena yalei. 24Pekahia déem toŋe lwarem o chɔge Baŋa Wɛ yiga. O ma yɔɔre o ke wɛleera dwi delo Nebat bu Jeroboam déem na ke pa se Isarele tiina de da ba ke to. 25Remalia bu Peka déem mo ye Pekahia jar-keira yiga tu wom. O ma kwei Gilead tiina baara finnu o ja o vo Samaria teo o li Pekahia pɛ sɔŋɔ dam jei sem wone de jara o go. O ta ma go Aragobi de Ariyɛ o woli da. O ma daare o leiri o di paare dem.

26Pekahia déem na di paare ye o ke wonnu telo to, de o totoŋa yam maama, ba popone-te ba tiŋi Isarele Teo Pwa Seina tɔnɔ kom wone.

Isarele teo pɛ Peka taane

27Judah teo pɛ Azaria paare dim bena finnu-yalei bene dem wone mo Remalia bu Peka déem di Isarele teo paare. O jeini Samaria ne mo o di paare dem bena finlei. 28O déem toŋe lwarem o chɔge Baŋa Wɛ yiga. O ma yɔɔre o ke wɛleera dwi delo Nebat bu Jeroboam déem na ke pa se Isarele tiina de da ba ke to.

29Maŋa kalo Peka déem na ye Isarele teo pɛ to, mo Asiria teo pɛ Tigilaf-Pilesa tu o zo tega kam o wane Isarele teene dedwonna o jwoŋi o tei. Teene dem konto déem ye: Yijon, de Abel Bɛte-Maaka, de Janoa, de Kedesa, de Hazora. O déem ta wane Gilead, de Galili, de Nafitali laŋa kam maama. O ma daare o ja jei sem konto nɔn-bia bam o vo o yage Asiria teo ne.#2 Pwa 17:6 30Konto na ke to, Ela bu Hosea ma vo o ke chichuŋu de Remalia bu Peka. O ma li‑o de jara o go o daare o leiri o di paare dem. Yuzia bu Jotam paare dim bena finlei bene dem wone mo konto.

31Peka déem na di paare ye o ke wonnu telo to, de o totoŋa yam maama, ba popone-te ba tiŋi Isarele Teo Pwa Seina tɔnɔ kom wone.

Judah teo pɛ Jotam taane

32Isarele teo pɛ Peka wolo na ye Remalia bu to paare dim bena yalei bene dem wone mo Yuzia bu Jotam déem di Judah teo paare. 33Jotam déem jege bena finlei-yanu mo ye ba tiŋi‑o paare. O ma jeini Jerusalem ne o di paare dem bena fuga-yaredo. O nu wom déem mo ye Zadoki bukɔ Jerusa. 34O totoŋa ma su Baŋa Wɛ yi lanyerane, nenɛɛne o kwo Yuzia déem na ke tei to. 35De ko de, o wo wane o chɔge wara-jei selo ba na ke kaanem da to. Nɔɔna bam déem yeini ba ke kaanem de zwɛɛm pɛɛra jei sem konto ne. Ko ye Jotam mo fɔge o lɔ Baŋa Wɛ wara-jei sem ni delo na wo baŋa seeni to.

36Jotam déem na di paare ye o ke wonnu telo to, de o totoŋa yam maama, ba popone-te ba tiŋi Judah Teo Pwa Seina tɔnɔ kom wone. 37Ko ye o paare dim maŋa kam ne mo Baŋa Wɛ bobo se o toŋe Siria teo pɛ Rezin, de Remalia bu Peka se ba li Judah teo de jara.#Izaya 7:1 38Jotam ma te ye o vo o kwoa tei. Ba ma kwei‑o ba suli o kwoa yibeeli ne o nabaaro David teo Jerusalem ne. O bu Ahaz ma leiri o di paare.

Currently Selected:

2 Pwa 15: KBG

Highlight

Copy

Compare