2 Pwa 14

Judah teo pɛ Amazia taane

1Isarele teo pɛ Jehohaza bu Jehoasa paare dim bena yalei bene dem wone mo Joasa bu Amazia déem di Judah teo paare. 2Amazia déem jege bena finlei-yanu mo ye ba tiŋi‑o paare. O ma jeini Jerusalem ne o di paare dem o ke bena finlei-nogo. O nu yere mo Jehoadin ye o nwoŋi Jerusalem. 3O totoŋa déem su Baŋa Wɛ yi lanyerane, ye o totoŋ-laaro nam wo yi o nabaaro David déem na ke tei to. O déem yɔɔre o kwei o kwo Joasa totoŋ-naga mo. 4De ko de, Amazia wo wane o chɔge wara-jei bimbina yalo ba na ke kaanem da to. Nɔɔna déem yeini ba ke kaanem de zwɛɛm pɛɛra jei sem konto ne ye ba wo yage.

5O na yɔɔre o jeini paare dem baŋa ne to, o ma go nɔɔna balo déem na jaane o kwo ba go to. 6O nam wo pɛ ba go nɔn-gora bam konto bia bam. O déem sɛ ni delo Baŋa Wɛ na pɛ Moses to. Ni dem konto bere we, “Kwoa ba jege se ba te ba bia kikia ŋwaane. Bia de nam ba jege se ba te ba kwoa kikia ŋwaane. Nɔɔno ná maŋe se o te, ko wó taa ye o tete yuu lwarem ŋwaane mo.”#Nia Gulim 24:16

7Amazia déem mo go Edom jar-keira morro fuga jeiga kalo ba na bwoi we ‘Yɛ bwolo’ to ne.#2 Tigisim 25:11-12 O ta ma di Sela teo o jwoŋi Edom tiina bam tei ne. O ma leiri o pa ko yere we Joketeeli. Yere dem konto mo ba ta bwoi de zem maama.

8Dɛ dedwe mo Pɛ Amazia toŋe o tontoŋena se ba vo ba gware Isarele teo pɛ Jehoasa na ye Jehohaza bu ye o ta ye Jehu naa to se ba ta ded‑o we, “Ba n jeeri-ne se dé ke kayiŋu.” 9Pɛ Jehoasa ma jwoori o toŋe kwora o pa Judah teo pɛ Amazia o we, “Sabara kadwoŋi mo zege Lebanon ne ka toŋe kwora ka pa Sedare tei-zɔŋɔ Lebanon ne ka we, ‘Kwei n bukɔ wom n pa a bu se o di o ma o ke kaane.’ Konto nɛ sem ni ne mo ga-varem zege Lebanon ne ka nɔne sabara kam ka chɔge. 10Nmo na seene n wane n di Edom tiina bam to mo pɛ se n cho n vɔna konto. Nam ya maŋe n sɔŋɔ ne se n ta‑n chaka. Bɛ mo ye n boŋe se n vaare lɛɛro n yage nmo tete yuu ne de Judah tiina de yuu ne?”

11Amazia ma se o zwa de taane dem konto. Ko kwaga ne Isarele teo pɛ Jehoasa ma la o jar-keira o ke daane ye ba vo ba kwaare jara de Amazia Judah teo Bɛte-Semesa ne. 12Isarele jar-keira bam ma wane ba di Amazia de o nɔɔna bam pa se ba maama duri ba jwoori ba sam. 13Isarele teo pɛ Jehoasa ma ja Amazia Bɛte-Semesa ne. Jehoasa ta ma daare o vo Jerusalem o bwori teo kom kabira kalo na zege Efrayim Ni dem ne se ka vo ka yi Gugworo Ni dem to. Ka laŋa kam déem ye naba-laara bia yalei mo. 14O ma vo o zo Baŋa Wɛ diga kam o vere ka sabu-seŋa de lu-nyenno wonnu, de ka lonne zela yam maama. O ta ma pɛ jejegero telo na tigi pɛ sɔŋɔ kom ne to. O ma ja te maama o jwoori Samaria. O ta ma ja teo kom nɔɔna o ja viiri se ko fe Judah teo pɛ se o sɛ o ni.

15Jehoasa déem na di paare ye o ke wonnu telo maama to, de o totoŋa yam, de o na kwaare jara de Judah teo pɛ Amazia tei to maama, ba popone-te ba tiŋi Isarele Teo Pwa Seina tɔnɔ kom wone. 16Jehoasa ma te ye o vo o kwoa tei. Ba ma kwei‑o ba suli mɛ ba na suli Isarele tiina pwa badwonna bam Samaria ne to. O bu Jeroboam ma leiri o yuu ne o di paare.

17Isarele teo pɛ Jehoasa toone dem kwaga seeni, Judah teo pɛ Amazia déem ta nɛ bena fuga-yanu mo ye o laam te. 18Amazia déem na di paare ye o toŋe wonnu telo maama to, ba popone-te ba tiŋi Judah Teo Pwa Seina tɔnɔ kom wone.

19Jerusalem dedɛɛra badwonna déem ke ni daane mo se ba go Pɛ Amazia. O ma duri o vo Lakisi. O dona bam ma toŋe nɔɔna se ba pare‑o. Ba ma yi‑o ba go Lakisi ne. 20Ba ma kwei Amazia yera yam ba daŋe sisein-nɔɔno baŋa ne ba ja jwoori Jerusalem. Ba ma kwei‑o ba suli o kwoa bam yibeeli ne David teo ne.

21Judah tiina bam maama ma kuri Azaria se o leiri o kwo Amazia yuu ne o ji pɛ. Ba na tiŋi‑o paare konto to, Azaria déem jege bena fuga-yaredo mo. 22O kwo Amazia toone dem kwaga seeni mo Azaria fɔge o lɔ Elafa teo pa se Judah tiina bam tei-ko.#2 Tigisim 25:17-28

Isarele teo pɛ Jeroboam II taane

23Judah teo pɛ Joasa bu Amazia paare dim bena fuga-yanu bene dem wone mo Jehoasa bu Jeroboam déem di Isarele teo paare. O ma jeini Samaria ne o di paare dem o ke bena finna-dedwe. 24O déem toŋe lwarem o chɔge Baŋa Wɛ yiga mo. O wo sɛ se o yage wɛleera dwi delo Nebat bu Jeroboam déem na ke pa se Isarele tiina de da ba ke to. 25Jeroboam déem mo jwoori o jwoŋi tega kalo na zege Lebo-Hamafa ne ka tole ka yi Yɛ naneo kom#14:25 Yɛ naneo kom = The Dead Sea to o pa Isarele tiina bam. Keim dem konto tɔge kwora kalo Isarele tiina Tu Baŋa Wɛ wom na wuuri o pa Amitayi bu Jonah to. Wonto déem ye Wɛ sampwora kalo na nwoŋi Gafa-Hefera to.#Jonah 1:1

26 Baŋa Wɛ déem ya maane Isarele tiina bam maama na nɛ cham tei to. Ba maama tiini ba yaare dedɛ, ko ná ye balo na ye kabɛ, de balo na tei ba tete to maama de. Nɔɔn-nɔɔno déem tera se o woli-ba. 27Baŋa Wɛ nam tɔge Jehoasa bu Jeroboam baŋa ne mo se o jwoŋi-ba o yage. Kokuri to Baŋa Wɛ wo tage we, o wó saare Isarele tiina bam yere logo baŋa maama ne.

28Jeroboam déem na di paare ye o ke wonnu telo maama to, de o totoŋa yam, de o bembɛɛne dem, ko woli de o na jwoori o jwoŋi Damasika de Hamafa teene dem o ke Isarele tiina bam jeŋa ne tei to maama, ba popone-te ba tiŋi Isarele Teo Pwa Seina tɔnɔ kom wone. 29Jeroboam ma te ye ba kwei‑o ba suli mɛ ba na suli Isarele tiina pwa badwonna bam to. O bu Zekaria ma leiri o ji pɛ.

Currently Selected:

2 Pwa 14: KBG

Highlight

Copy

Compare