2 Pwa 13
13
Isarele teo pɛ Jehohaza taane
1Judah teo pɛ Ahazia bu Joasa paare dim bena finlei-yatɔ bene dem wone mo Jehu bu Jehohaza déem di Isarele teo paare. O ma jeini Samaria ne o di paare dem o ke bena fuga-yarepɛ. 2O toŋe lwarem o chɔge Baŋa Wɛ yiga mo de o na ke wɛleera dwi delo Nebat bu Jeroboam déem na ke pa se Isarele tiina de da ba ke to mo. O wo sɛ se o yage. 3Mo kokuri Baŋa Wɛ bane tiini de zaŋe Isarele tiina baŋa ne. O déem pɛ se Siria teo pɛ Hazayeli de o bu Ben-hadadi di dam ba baŋa ne taa.
4Jehohaza ma lwoori yibwona Baŋa Wɛ tei ne. Baŋa Wɛ ma sɛ o wɛ-lworo kom, o na maane we Siria teo pɛ mo jege Isarele tiina bam o bɛɛsa dedɛ to ŋwaane. 5Baŋa Wɛ ma le jwoŋinu o pa Isarele tiina bam, pa se ba vere ba tete Siria tiina bam dam kuri ne. Konto kwaga ne mo Isarele tiina bam jwoori ba zoore ba sam dem ne de yazura, ne faŋa kam ne ko ya na ye tei to. 6De ko de, ba déem ta ke wɛleera dwi delo Jeroboam dwi tiina déem na ke pa se Isarele tiina de da ba ke to mo. Ba wo sɛ se ba chɔge Asera nyenyego dɛ sem na wo Samaria ne ye nɔɔna zuli-se to.
7Jehohaza jar-keira déem ta daare fee, nenɛɛne sisein-dira finnu, de jara-keim torokooro fuga, ko woli de jar-keira moro fuga yerane mo. Kokuri to, Siria teo pɛ wom ya yɔɔre o chɔge jar-keira badaara bam maama pa se ba ji ne fwogo mo tei.
8Jehohaza déem na di paare ye o ke wonnu telo maama to, de o totoŋa yam, de o bembɛɛne dem maama, ba popone-te ba tiŋi Isarele Teo Pwa Seina tɔnɔ kom wone. 9Jehohaza ma te ye o vo o kwoa tei. Ba ma kwei‑o ba suli Samaria teo ne. O toone dem kwaga ne o bu Jehoasa ma leiri o ji pɛ.
Isarele teo pɛ Jehoasa taane
10Judah teo pɛ Joasa paare dim bena fintɔ-yarepɛ bene dem wone mo Jehohaza bu Jehoasa déem di Isarele teo paare. O ma jeini Samaria ne o di paare dem o ke bena fuga-yaredo. 11O toŋe lwarem o chɔge Baŋa Wɛ yiga mo de o na ke wɛleera dwi delo maama Nebat bu Jeroboam déem na ke pa se Isarele tiina de da ba ke to mo. O déem paale o ke wɛleera yanto dwoŋi mo.
12Jehoasa déem na di paare ye o ke wonnu telo maama to, de o totoŋa yam, de o na ke baare o kwaare jara de Judah teo pɛ Amazia tei to maama, ba popone-te ba tiŋi Isarele Teo Pwa Seina tɔnɔ kom wone. 13Jehoasa ma te ye o vo o kwoa tei. Ba ma kwei‑o ba suli mɛ ba na suli Isarele tiina pwa badwonna bam Samaria ne to. O toone dem kwaga ne o bu Jeroboam#13:13 Jeroboam = Pɛ Jeroboam belei tu wom ma leiri o di paare dem.
14Isarele teo pɛ Jehoasa déem ta na ŋwe to, jaweo ya mo jaane Wɛ sampwora Elisa ye ko ga fee se o te. O weelem dem maŋa ne Jehoasa ma vo o tei se o ware‑o. O ma zege Elisa yiga ne o ka yi-na ye o we, “Amo kwo! Amo kwo! Isarele jar-keira torokooro tem de te sisein-dira bam laam wó ke tɛ mo?”#2 Pwa 2:12
15Elisa ma ta de pɛ wom o we, “Kwei taŋa de ka che-tɛɛra.” O ma seene o kwei-te o zia. 16Elisa ma ta ded‑o se o saŋe taŋa kam. O na lage o ta konto to mo Elisa jaane pɛ wom jea. 17Elisa ma ta de pɛ wom o we, “Pore takworo ni delo na yɔɔre wɛ-puli seeni to.” O ma seene o ke konto. Elisa ma ta ded‑o se o ta chene, ye o seene o ke konto. Elisa ma ta o we, “Baŋa Wɛ wɔnɔ chene dem mo konto! Ko bere we Siria tiina bam wó to jara wone. Kokuri to, nmo wó yɔɔre n chɔge Siria jar-keira bam maama Afeka ne.”
18Elisa daa ta ma ta de pɛ wom o we, “Kwei che-tɛɛra yalo na daare to.” Pɛ wom ma kwei-ya. Elisa ma ta ded‑o o we, “Fere-ya tega ne.” Pɛ wom ma fere chena yam tega ne kuni betɔ ye o yage. 19Wɛ tontoŋeno Elisa bane ma zaŋe ded‑o ye o we, “Nmo ya wó fere-ya tega ne kuni benu naa beredo mo. Konto mo ya wó pa se n wane n chɔge Siria tiina bam maama nyɔ. Ko nam na ye tei to, nmo lage n di-ba kuni betɔ yerane mo.”
20Elisa déem ma te ye ba kwei‑o ba suli.
Ben-doore maama wone Moaba teo pawe-nyena mo yeini ba zo Isarele tega kam ba vuvugi nɔɔna bam. 21Dɛ dedwe Isarele tiina badwonna déem mo jaane ba too ba vo se ba suli. Ba ma na Moaba tiina pawe-nyena na beene de kɔgɔ tei to. Ba ma ke lela ba kwei too wom ba dole ba yage Elisa yibeeli dem ne ye ba daare ba duri. Too wom yera na yɔɔre ya dwei Elisa kwi sem to, mo o bi o zaŋe o zega.
22Maŋa kalo maama Jehohaza déem na ye pɛ to mo Siria teo pɛ Hazayeli tiini o bɛɛse Isarele tiina bam. 23Baŋa Wɛ yiga nam wo Isarele tiina bam wone pa se o duri ba yibwona, o na gwoni ni delo de ba nabaara Abaraham, de Izaak, de Jakob to ŋwaane. De zem maama Baŋa Wɛ wo sɛ se o chɔge-ba o ti, naa se o zeili-ba o tei ne.
24Siria teo pɛ Hazayeli ma ba o te. O bu Ben-hadadi ma leiri o yuu ne o di paare. 25Jehohaza bu Jehoasa ma wane Ben-hadadi o di, pa se o jwoori o ja teene delo Hazayeli déem na vere Jehohaza tei ne to o tei. Kuni betɔ mo Jehoasa wane o di Ben-hadadi, ye o daare o jwoori o jwoŋi Isarele teene dem konto.
Currently Selected:
2 Pwa 13: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
