2 Pwa 12

Judah teo pɛ Joasa taane

2 Tigisim 24:1-16

1Isarele teo pɛ Jehu paare dim bena yarepɛ bene dem wone mo Joasa di paare Judah ne. O déem jeini Jerusalem ne o di paare dem o ke bena finna mo. O nu déem nwoŋi Beeriseba, o yere mo Zibia. 2Pɛ Joasa ŋwea maama wone o totoŋa déem su Baŋa Wɛ yi lanyerane, Wɛ kaanem tu Jehoyada na zamese‑o to ŋwaane. 3De ko de, o wo wane o chɔge wara-jei bimbina yalo ba na ke kaanem da to. Nɔɔna déem ta ma yeini ba ke kaanem de zwɛɛm pɛɛra jei sem konto ne.

4Joasa ma ta de Wɛ kaanem tiina bam o we, “La-na lu-nyenno telo maama nɔɔna na jaane ba ba ba tiŋi Baŋa Wɛ diga kam wone se ba ma ba zuli‑o to. Ko ná ye Wɛ diga lampwoo sabu kom, de ba ni-gwonim sabu kom, de ba na pɛ sabu kolo de ba tete boboŋa to de, se á la te maama. 5Wɛ kaanem tu maama laam wó jwoŋi sabia bam mo sabu-tiŋinu maama tei ne se ba ma ba fɔge ba kwɛ Wɛ diga kam ne ko na maŋe tei to.”#Nwoŋim 30:16; 2 Pwa 22:4; 2 Tigisim 24:7

6Joasa déem na di paare ye o ke bena finlei-yatɔ to, Wɛ kaanem tiina bam ta wo wane ba kwɛ Wɛ diga kam de fenfee de. 7Konto ŋwaane mo, Joasa bwoŋi Wɛ kaanem nakwe tu Jehoyada de kaanem tiina badwonna bam o bwei-ba o we, “Bɛ mo ke ye abam ta wo kwɛ Wɛ diga kam? Daa á yé ta‑á jwoŋi-na sabu á sabu-tiŋina bam tei ne á di, ne ko ná dae Wɛ diga kam kwɛɛm yerane ŋwaane.” 8Kaanem tiina bam ma sɛ we ba daa bá jwoŋi sabu nɔɔna bam tei ne. Ba ma kwei Wɛ diga kam kwɛɛm totoŋa yam ba pa nɔɔna badwonna.

9Jehoyada ma kwei dakaa o puri bɔɔne ka ni-pugu kom yera ne, o daare o ja-ka o zo Baŋa Wɛ diga kam wo. O ma kwei-ka o zege kaanem bimbini dem jazem seeni. Wɛ kaanem tiina balo na yere Wɛ diga kam ni to wó jwoŋi sabia balo nɔɔna na jaane ba ba se ba pa Wɛ to ba ke dakaa kam wone. 10Maŋa kalo maama ba na maane we sabu kom su dakaa kam, pɛ sɔŋɔ tɔn-poponno wom de Wɛ kaanem nakwe tu wom mo wó ke daane ba kwei sabu kom ba jeeli ko ni ba kwei ba ke ywollu wone. 11Ba ná yeini ba lɔre sabu kom ni, ba wó kwei-ko ba pa nɔɔna balo ba na kuri se ba taa nii Wɛ diga kam totoŋe baŋa ne to mo. Banto de maa wó kwei sabu kom ba ma ŋwe balo maama na toŋe Wɛ diga kam kwɛɛm totoŋa to. Banto déem ye gwaro, de lɔra, 12ko woli de kandwa-cherena. Ba maa ta wó ma sabu kom ba yeigi da-kwollu de kandwa yalo ba na yare peo yera ne to se ba ma ba kwɛ Baŋa Wɛ diga kam ba daare ba ŋwe kwora yalo maama ta na wora totoŋe dem ŋwaane to.

13Sabu kolo nɔɔna déem na jaane ba ba ba tiŋi Wɛ diga kam ne to, ba wo sɛ se ba kwei-ko ba ma ba mɔ lu-nyenno zon-tanlɛ, de min-zwonnu kwɛɛm fane, de zwe, de nabwanno, naa sabu-seŋa de lu-nyenno wonnu telo maama na maŋe se te taa zege Wɛ diga kam ne to. 14Ba nam kwei ko maama ba pa tontoŋena bam mo se ba ma ba fɔge ba kwɛ Wɛ diga kam. 15Ko ná ye balo ba na pɛ-ba sabu kom se ba ma ŋwe tontoŋena bam to, ba wo fe-ba se ba jeeli sabu kom ba bere jaja, banto na yɔɔre ba toŋe de chega to ŋwaane. 16Ko daare ko ná ye wɛleere jene pɛɛra yam, de wɛleere saarem pɛɛra yam, ba wo jaane yanto ba zo Baŋa Wɛ diga kam. Yanto maama ye Wɛ kaanem tiina bam nyem mo.

17Kanto maŋa ne mo Siria teo pɛ Hazayeli déem vei o kwaare jara de Gafa tiina. O ma wane teo kom o di. O ma zege dáane o daa vo se o kwaare jara de Jerusalem tiina. 18Judah teo pɛ Joasa ma kwaleme lonne wonnu telo maama o kwoa Jehosafate, de Jehoram, de Ahazia na kwei ba pa Baŋa Wɛ to, de telo o tete na kwei o pa Wɛ to, ko ta woli de sabu-seŋa jejegero telo na tigi Wɛ diga kam de pɛ sɔŋɔ kom wone to. O ma kwei te maama o toŋe o pa Hazayeli se o ma o ware‑o. Hazayeli laam ma yage jara yam o kɛ o daare Jerusalem.

19Joasa déem na di paare ye o ke wonnu telo maama to, de o totoŋa yam maama, ba popone-te ba tiŋi Judah Teo Pwa Seina tɔnɔ kom wone.#2 Tigisim 24:17-26 20Pɛ Joasa dedɛɛra déem ke ni daane mo se ba zaŋe o baŋa ne. Ba ma go‑o Bɛte-Millo ne. Jeiga kam konto wo Sila chwoŋa ni ne mo. 21Dedɛɛra balo na ke konto to maa ye Simeafi bu Jozabad, de Somera bu Jehozabadi. Ba ma kwei Joasa ba suli o kwoa bam yibeeli ne David teo Jerusalem ne. O toone dem kwaga ne o bu Amazia ma leiri o yuu ne o ji pɛ.

Currently Selected:

2 Pwa 12: KBG

Highlight

Copy

Compare