2 Pwa 11

Atalia di paare Judah ne

1Pɛ Ahazia nu Atalia na maane we o bu wom tega to, o ma zaŋe se o pa ba go paare diga kam nɔn-bia maama. 2Ba na tu se ba go pɛ wom bia bam to, Pɛ Jehoram bukɔ Jehoseba na ye Ahazia nakɔ to ma ŋɔ Ahazia bu-seseŋa kam yere na ye Joasa to o seigi. O ma kwei bu wom de kaane wolo na jege‑o o kɔna to o vo o seigi peiga jeiga ne se Atalia yé na‑o. Konto ma pa se o wo tɔge de pa-bia badaara bam o te. 3Joasa déem maŋe Jehoseba tei ne bena yaredo mo, ye ba seigi‑o Baŋa Wɛ wara-jei sem diga kadwoŋi wone. Maŋa kam konto ne Atalia ma jeini Judah teo paare dem baŋa ne.

4Atalia paare dim bena yarepɛ bene dem ne mo Wɛ kaanem tu Jehoyada bwoŋi dedɛɛra balo na nii babɛ sem, de Kariti jar-keira bam, de pɛ sɔŋɔ yerena bam baŋa ne to se ba ba ba jeeri Baŋa Wɛ wara-jei sem ne. Dáane mo o gwoni ni de-ba o daare o pa se ba du duuri ba pa‑o. O laam ma kwei Ahazia bu Joasa o bere-ba. 5O ma pa-ba ni o we, “Abam na jege se á ke tei to mo tento: Á nɔɔna bam na pɔɔre kuni betɔ to, ba kɔgɔ kolo na tui totoŋa siu dɛ ne to chichworo yeini ba yere pɛ sɔŋɔ kom. 6Chichworo kodwoŋi de maa nii Suri ni dem. Chichworo kolo na daare to maa zege ni dem seeni babɛ sem kwaga ne. Banto maama nam wó taa yere pɛ sɔŋɔ kom mo. 7Ko daare kɔro telei tem na yage totoŋa siu dɛ ne to de laam maa wó taa yere Baŋa Wɛ wara-jei sem se kolokolo yé ke pɛ wom. 8Fɔge-na á zege á gilimi pɛ wom mo á ke tetare ne, ye á zei á jara zela. Nɔɔno wolo ná lɛɛne abam, se á yɔɔre á go kotu. Pɛ wom nam na wó vo mɛ maama to, se abam de ta‑á wo o tei ne.”

9Dedɛɛra bam ma seene ba tɔge ni delo maama Wɛ kaanem tu Jehoyada na taga to. Ba dedoa dedoa ma ja ba nɔɔna ba ba Jehoyada tei, ne ko ná ye balo na tui totoŋa siu dɛ ne to, de balo na yage totoŋa siu dɛ ne to maama. 10Jehoyada ma kwei chichwoa de jara-keim nantane selo déem na ye David nyem ye te tigi Baŋa Wɛ wara-jei sem ne to o pa dedɛɛra bam. 11Babɛ sem maama ma vo ba zege ba gilimi pɛ wom ba ke tetare ne, ye ba zei ba jara zela. Ba déem tigisi ba tete Wɛ diga kam jei maama ne, jagwia seeni de jazem seeni, ko zege kaanem bimbini dem takeiri ne de diga kam tete yiga ne.

12Jehoyada déem ma ja pɛ wom bu Joasa o ja o nwoŋi. O ma kwei paare yipuga kam o pu o yuu ne, ye o daare o kwei paare tiŋim seina tɔnɔ kom o ke o jeŋa ne. Ba ma lwo nuga o yuu ne ba ma ba tiŋi‑o paare. Nɔɔna bam ma mage ba jea ye ba tɔɔle ba we, “Wɛ wó pa pɛ wom momwɛ-dɛɛre!”

13Atalia na nigi babɛ sem de nɔɔna bam maama na ke sɔɔ kom to, o ma ke lela o nwoŋi o vo Baŋa Wɛ wara-jei sem o daare o na nɔn-kɔgɔ kom. 14O ma na pɛ wom na zege Wɛ diga kam ywei dem teiŋa ne, ne ba na yeini ba ke tei ba tiŋi pɛ to.#2 Pwa 23:3 Dedɛɛra bam de balo na wui nabwanno to maa zege pɛ wom takeiri ne. Teo kom nɔn-bia bam maama maa chaka de wopwolo ye ba badwonna wui nabwanno. Atalia na nɛ to, o ma ja o gwaaro tem o vaŋe o kaare ye o we, “Bebare-nyena mo zaŋe a baŋa ne!”

15Jehoyada ma pa jar-keira dedɛɛra bam ni o we, “Ja-na Atalia á nwoŋi Wɛ diga kam wone á ke‑o babɛ sem gena tetare ne. Nɔɔno ná kwaane se o woli‑o, se á kwei se-zɔɔ á go kotu.” Kokuri to, Jehoyada ya maŋe o ta we, ba yé go Atalia Baŋa Wɛ diga kam wone. 16Ba ma zi Atalia ba ja ba nwoŋi ba vo pɛ sɔŋɔ kom. Ba ma pa o tɔge manchwoŋo ni mɛ sisei na tɔge da se zoore nabwoo kom to, ye ba daare ba go‑o jei sem konto ne.

17Wɛ kaanem tu Jehoyada ma pa se pɛ wom de nɔɔna bam maama gwoni ni de Baŋa Wɛ we, ba wó taa ye Baŋa Wɛ tete nɔɔna. O ta ma pa se pɛ wom de nɔɔna bam gwoni ni ba pa daane. 18Judah nɔn-bia bam déem ma vo ba zo Baal jwoni diga kam ba yigi ka maama ba de tega ne, ba daare ba chochoge kaanem bimbina yam de jwoni kamwaro tem maama. Ko ta ná ye Baal kaanem tu Matan, ba jaane‑o bimbina yam takeiri ne mo ba go.

Jehoyada déem ma pa se nɔɔna zege ba yere Baŋa Wɛ diga kam. 19O laam ma tɔge de babɛ sem yiga tiina, de Kariti jar-keira bam, de pɛ sɔŋɔ yerena bam, ko ta woli de teo kom nɔn-bia bam maama, se ba vo ba ja pɛ Joasa ba ja ba nwoŋi Baŋa Wɛ diga kam wone. Ba ma ja‑o ba vo ba tɔge babɛ ni dem ba zo pɛ sɔŋɔ kom. Joasa ma vo o jeini paare yituŋu kom baŋa ne. 20Nɔn-bia bam maama maa chaka de wopwolo. Ko kwaga ne teo kom maama ma ke ziim, ba na go Atalia pɛ sɔŋɔ kom wone to ŋwaane.

21Joasa déem jege bena yarepɛ mo ye o di Judah teo paare dem.

Currently Selected:

2 Pwa 11: KBG

Highlight

Copy

Compare