2 Pwa 10

Jehu go Ahab dwi dem

1Ahab bia fuserepɛ déem mo zoore Samaria ne. Jehu ma popone twanno o toŋe o pa teo kom dedɛɛra de nakwa balo maama na wo Samaria ne to, ko woli de balo na nii Ahab bia bam baŋa ne to. O ma popone o we, 2“A ware abam. Abam teo kom tiini ko dana. Á maa jege jara-keim torokooro dedaane sisei dedɛ. Abam tu Ahab bia bam zoore abam tei ne mo. Konto ŋwaane, tɔnɔ konto ná yi abam, 3se á kuri Ahab bia bam wone nɔɔno wolo na yɔɔre o ye chekke to se á tiŋi‑o pɛ. Á ná ke konto, se á daare á ti á yiga se á ke chichuŋu Ahab dwi dem ŋwaane.”

4Samaria teo dedɛɛra bam na gage tɔnɔ kom to, foone ma tiini de zo-ba ye ba we, “Nii-na! Pwa balei bam tete maŋe ba ga Jehu ŋwa. Debam nam ye bera mo se dé che o yiga?”

5Dedɛɛro wolo na nii pɛ sɔŋɔ kom baŋa ne to, de wolo na nii teo kom maama to, de teo kom nakwa bam, ko woli de balo na nii Ahab bia bam baŋa ne to ma toŋe kwora ba pa Jehu ye ba we, “Debam maama ye nmo tontoŋena mo. Kolo maama nmo na wó ta to, dé wó ke. Dé ba jege chwoŋa se dé tiŋi pɛ. Ke kolo maama nmo na boŋe we ko lana to.”

6Jehu daa ma popone tɔnɔ o ta we, “Abam nam ná seene á sɛ á pa amo, nam sɛ-na amo ni se á gwoni Ahab bia bam yuni#10:6 á gwoni Ahab bia bam yuni naa á le Ahab bia bam yuu tiina á ja á ba Jezerele á pa-ne jwa kanto maŋa ne.” Ko déem ye Samaria teo dedɛɛra badwonna mo nii Ahab bia fuserepɛ bam baŋa ne. 7Samaria teo dedɛɛra bam na gage tɔnɔ kom to, ba ma seene ba gwoni pɛ wom bia fuserepɛ bam maama yuni ba kwei ba ke tetwaro wone ba toŋe ba pa Jehu Jezerele ne. 8Ba na jaane ba yi to, tontoŋeno wodwoŋi ma vo o ta de Jehu o we, “Ba jaane pɛ wom bia bam yuni tem ba yi.” Jehu ma pa ni o we, “Ja-na yuni tem á vo á tiŋi pwoa yalei teo kom manchwoŋo ni dem ne se tega laam poore.”

9Tega na poore tetete to, Jehu ma nwoŋi o vo o zege da o ta de nɔɔna bam maama o we, “Abam wo ke kolokolo á chɔge, se ko ye amo mo ke chichuŋu de a yuu tu Joram ye a daare a go‑o. Wɔ nam mo go nɔɔna banto maama? 10Lɔre-na we, kwora kalo Baŋa Wɛ na taga Ahab dwi dem ŋwaane to bá ji kafɛ de fenfee de. O na tɔge Elija baŋa o ta kolo to maama seene ko ke.” 11Jehu laam ma vo o go Ahab dwi tiina bam maama na daare Jezerele ne to. O ta ma go Ahab dedɛɛra bam, de o yuudwonna bam, de o kaanem tiina bam maama. Ahab nɔɔno dedoa tete bere o wo daare.

12Jehu ma zaŋe se o vo Samaria. O na maa kɛa to mo o vei o yi Bɛte-Ekede mɛ nayera na gilimi to. 13O na yi da to mo o jeeri Judah teo pɛ Ahazia chorro tedwonna. O ma bwei-ba o we, “Abam ye bera mo?” Ba ma leiri ba we, “Debam ye Ahazia chorro mo. De nam maa vei se dé jɔɔne pɛ wom diga tiina de o nu wom bia mo.”

14Jehu na nigi konto to, o ma pa o tontoŋena bam ni o we, “Ja-na-ba ŋweene.” Ba ma seene ba ja nɔɔna bam maama ba daare ba go-ba Bɛte-Ekede vole dem takeiri ne. Ba déem ye nɔɔna finna-balei (42) mo ye ba wolowolo wo daare.

15Jehu ma zaŋe jeiga kam konto ne o maa kɛa. O na maa vei to mo Rekabi bu Jonadabi jeeri‑o chwoŋa ne. Jehu ma jɔɔne‑o ye o daare o bwei‑o o we, “Dé jege boboŋe dedwe na? Nmo yiga nam wo amo wone na?” Jonadabi ma leiri o we, “Ɛɛ, ko ye konto mo.” Jehu ma ta o we, “Ko ná seene ko ye konto, ja n jeŋa n ba.” O ma vaŋe Jonadabi o di o jeini o toroko kom wone. 16O maa we, “Tɔge de amo se n lɔre we amo yia tiini ya seene Baŋa Wɛ ŋwaane.” Ba maama balei ma tɔge daane ba kɛ Samaria.

17Ba na yi Samaria to, Jehu ma go Ahab dwi tiina balo ta na daare ye ba zoore da to maama. Konto to o déem chɔge Ahab dwi dem o ti, ne Baŋa Wɛ ya na pɛ Elija kwora we, ko wó ke tei to.

Jehu go Baal kaanem tiina

18Jehu déem ma bwoŋi Samaria tiina bam o ke daane ye o ta de-ba o we, “Pɛ Ahab déem zuli Baal jwoni dem o kwɛɛre mo. Amo nam wó seene a yia a zuli-de a dwoni wonto. 19Bwoŋi-na Baal sampwori sem, de kaanem tiina bam, ko woli de balo na zuli-de to maama, se ba jeeri amo yiga ne. A lage a ke kaanem kamunu mo a pa Baal. Wolo ná ve se o tɔge o jeeri, kotu wó ga o ŋwea mo.” Jehu déem tage konto dwoŋi se o ma o ke swa mo o ja balo maama na sɛ Baal to o go.

20Jehu ma ta o we, “Pɔɔre-na dɛ se nɔɔna seene ba yia ba zuli Baal jwoni dem de wone.” Ba ma tɔɔle ba bere teo kom nɔɔna bam maama. 21Jehu ma pa kwora yi Isarele teo kom ni maama, pa se balo maama na sɛ Baal to ba ba jeeri daane. Dedoa tete wo daare. Ba maama ma vo ba zo Baal jwoni diga kam pa se ka ni maama su de kɔgɔ. 22Jehu ma ta de wolo na nii gare-nyenno tem baŋa ne to o we, “Pa se wolo maama na tu se o zuli Baal jwoni dem to na gɔrɔ o zo.” O ma seene o kwei gwaaro tem o pa-ba ye ba zo.

23Jehu laam ma tɔge de Rekabi bu Jonadabi ye ba zo Baal jwoni diga kam. Jehu ma ta de balo na zuli Baal to o we, “Kwaane-na á nii se nɔɔn-nɔɔno yé maŋe ywo-seeni ko ná dae abam yerane. Yé pa se Baŋa Wɛ tɔgena bam wolowolo na chwoŋa se o taa tɔge o wora.” 24Ba laam ma bobo se ba ke kaanem dem ba pa Baal. Ba na wo diga kam ne to de Jehu ya maŋe o yage nɔɔna funɔnɔ pwooni dem ne ye o kaane-ba o we, “Abam wolo ná pɛ se nɔɔna banto dedoa duri o lu, kotu wó ga o ŋwea mo.”

25Jehu na yɔɔre o ke zwɛɛm kaanem dem o ti to, o ma ta de babɛ sem de dedɛɛra bam o we, “Zo-na diga kam á go ba maama. Yé pa-na se ba dedoa tete duri o lu.” Ba ma seene ba kwei ba se-zɔɔro ba ma ba go Baal nɔɔna bam maama. Ba ma tuuri ba yera yam ba yage pwooni yiga ne. Ba ma daare ba zo di-yuu kom 26ba vo ba kwei Baal jwoni kandwɛ dem tete ba ja ba nwoŋi ba zwɛ de mini. 27Konto to, ba déem chɔge Baal jwoni dem de de diga kam maama mo. De zem maama nɔɔna laam kwei jeiga kam ba ma ba ji nɛ zegem jeiga mo.

28Mo ko na ke tei pa se Jehu chɔge Baal jwoni dem kaanem Isarele jei maama ne to. 29De ko de, Jehu ta paale o ke wɛleere dwi delo Nebat bu Jeroboam déem na ke pa se Isarele tiina de da ba ke to mo. O déem pɛ se ba jege sabu-seŋa na-mɔre sem na zege Bɛtel de Dan ne to mo ba kaana.

30 Baŋa Wɛ déem tage de Jehu mo o we, “Nmo kwaane de n na ke kolo na jege chega amo yiga ne to. N yɔɔre n chɔge Ahab dwi dem maama, nenɛɛne a boboŋa na jaane se a pa ko ke tei to. Konto ŋwaane, amo wó pa se nmo dwi delo na wó saŋe n kwaga to di Isarele teo paare dem se ko taa vei dwia yana wɛɛne.” 31Jehu déem nam wo nii o tete se o taa tɔge Baŋa Wɛ wom na ye Isarele tiina Wɛ to nia yam de o wo maama. O wo yage wɛleera dwi delo Jeroboam déem na ke pa se Isarele tiina de da ba ke to.

Jehu toone

32Kanto maŋa ne mo Baŋa Wɛ bobo se o pa Isarele tega kam mɔ. Hazayeli ma wane o di Isarele tiina bam de ba tega kam ni maama, 33ka zege Jɔdan buga kam ni ne se ka vo ka yi wɛ-puli seeni. Ko maa ye Gilead de Basan tega kalo maama na zege Arowa na wo Aranon nabara kam ni ne to ko taa via. Gad dwi tiina laŋa kam, de Ruben dwi tiina laŋa kam, ko woli de Manasɛ dwi tiina laŋa kam mo konto.

34Jehu déem na di paare ye o ke wonnu telo maama to, de o totoŋa yam, de o bembɛɛne kikia yam maama, ba popone-te ba tiŋi Isarele Teo Pwa Seina tɔnɔ kom wone. 35Jehu ma te ye o vo o kwoa tei. Ba ma kwei‑o ba suli Samaria teo ne. O toone dem kwaga ne o bu Jehohaza ma leiri o ji pɛ. 36Jehu déem jeini Samaria ne o di Isarele teo paare bena finlei-nana (28) mo.

Currently Selected:

2 Pwa 10: KBG

Highlight

Copy

Compare