2 Korinti 9
9
1Ko ná ye abam na wó woli Wɛ nɔɔna balo yiniga na jege-ba to, amo yei we abam maŋe á yei á na wó ke tei. Amo daa ba jege se a popone kolokolo a woli da. 2A yei we á maŋe á ke á boboŋa ne se á woli-ba, ye a ta de Makedonia tiina bam abam na kwaane tei to. A ma bere-ba we, abam balo na zoore Akaya teene dem ne to maŋe á ti á yiga se á la sabu kom, ko zege déem bene dem ne. Makedonia tiina bam na lɔre abam na seene á yia se á pa nɔɔna na wolim konto to, ko ma pa se ba dedɛ boboŋa tɔge keim dem konto. 3Amo nam boŋe se a pa dé nu-bia bam ba abam tei, se ko pa debam na jege teera á ŋwaane tei to yé ba ya ji kafɛ. Konto mo wó pa á wane á ti á yiga nenɛɛne amo na maŋe a ta a bere-ba we á wó ke tei to. 4Ko ná dae konto, Makedonia tiina ná tɔge de amo ba ba abam tei, ye ba lɔre we, á ta wo ti á yiga, ko wó pa chaveera ja debam de dé na jege á chega tei to. Ko maa wó pa chaveera ja abam de. 5Mo kokuri a boboŋa jaane se a ta dé nu-bia bam se ba da amo yiga ba wuuri ba ba abam tei. Konto wó pa á wane á la pɛɛra yam á ti, nenɛɛne á na tiŋi ni se á ke tei to, se amo laam ba a jwoŋi-ya. Amo lage se á ma á wo-ywoŋo mo á pa sabu kom, se á yé tɔge kɔro ŋwaane.
6Ko nye de nɔɔno ná dugi wonnu fenfee, konto tu wó jwoori o ba o na fenfee mo. Ko daare wolo ná dugi dedɛ de o boboŋa, konto tu wó ba o na dedɛ.#Memaŋa 12:1 7Nɔɔno maama jege se o pa pɛɛra se ko maŋe de o boboŋa na jaane tei to mo, ko dae se o fe o tete o ke kolo na wó chɔge o wo to. Ko nam ná ye wolo na pae de o wo-ywoŋo to, Wɛ swoi konto tu mo.#1 Tigisim 29:9 8Wɛ na jege abam swono to, o maa wae o zeini abam de o zaane maama, se ko pa á seene á ta‑á jege kolo maama á na lage to maŋa maama, ye á daa ta jege dedɛ se á ta‑á ma á ke wo-laaro á woli á dwonna. 9Wɛ tɔnɔ kom nam tage nɔɔno wom konto dwoŋi taane ko we:
“Wonto pɔɔre o wonnu
o pa yiniga tiina zɛɛra mo.
O nɔn-ŋonne dem wó taa wo o tei ne taa wuu.”#Lei 112:9
10Wɛ mo ye wolo na pae nɔɔno wo-dwa se o ba o du, ye o daare o pa‑o wodiu se o taa di. O daa ta wó zeini abam konto, se á wane á woli nɔɔna de keim-laaro dedɛ, ne á na wora á du wonnu dedɛ tei to. Konto mo á keim-laaro tem laam wó ba te gaale, nenɛɛne te ye nyɔɔre mo á na nɛ duum dem baŋa ne to. 11Wɛ wó pa se á jeŋa taa gara de wo-laaro maama, se á wane á woli nɔɔna maŋa maama. Konto maa wó pa nɔɔna dedɛ taa ke Wɛ lei, ba na jwoŋi abam pɛɛra yam debam tei ne to ŋwaane. 12Abam na jege Wɛ nɔɔna á woli tei to mo pae se ba nae kolo ba ya na gɛ to. Ko nam dae konto yerane, se ko ta wó pa nɔɔna dedɛ tiini ba taa ke Wɛ lei ko ja gaale. 13Abam wolim dem konto mo wó bere we á yɔɔre á tɔge Wɛ, ye ko pa se Wɛ na zula dedɛ, de nɔɔna bam na lɔre we, á seene á sɛ Yezu Krista kwor-ywoŋa kam, ne á na tage we á ye tei to. Wɛ ta wó na zula nɔɔna tei ne, de á na pɔɔre á wonnu á pa-ba, ye á daare á pa nɔɔna badwonna de tei to. 14Ba maa wó taa lwoori Wɛ abam ŋwaane, ye ba jege abam swono ba bochara ne, Wɛ na tiini o ke abam zaane to ŋwaane.
15Pa-na dé ke Wɛ lei, de o na woli debam maama de o zaane delo na ba jege dwoŋi to.
Currently Selected:
2 Korinti 9: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
