2 Korinti 8
8
Yezu nɔɔna bam jege se ba woli daane
1A nu-bia bam, dé lage se dé pa abam lɔre Wɛ na ke Yezu kɔgɔ kolo maama na wo Makedonia te-nia yam ne to zaane tei to mo. 2Yaara dedɛ ma yi-ba ye ba nam ta di ywoni dedɛ pa se ba wo ywomma de nɔɔna. Yiniga na maŋe ka jege-ba to, ba daa ta ma woli nɔɔna lanyerane. 3Ko na ye chega to, ba woli nɔɔna se ko maŋe de ba tete na jege tei to, ye ba ta pa se ko dwoni ba tete na wó daare kolo to. 4Ba nam mo mɛ ba boboŋa ba tiini ba lwoori debam se dé pa-ba chwoŋa se ba tɔge ba woli Wɛ nɔɔna balo yiniga na jege-ba to.#Rom 15:26 5Ba na ke tei to tiini ko dwoni debam ya na boŋe se dé na tei to. Ba ma maŋe ba da yiga ba ke ba tete dé Teiru wom jeŋa ne, ye ba daare ba ke ba tete debam de jeŋa ne, se ko maŋe de Wɛ boboŋa na lage tei to. 6Konto ŋwaane mo dé maŋe dé kwoori Titusi se o daa woli abam, se abam de tɔge Wɛ zaane dem ŋwaane á ta‑á lae sabu. Wonto mo bobo o kwoori abam se á ta‑á ke konto, ye o laam wó woli abam se ko ba ko kweeli. 7Abam na tɔge Wɛ chwoŋa tei to maŋe ko lana se ko gaale, ne ko ná ye á wo-dedoa keim, de á ŋɔŋa kam, de á yeino kom. Á ta kwori á seene á yia de Wɛ totoŋa, ye á tiini á jege debam swono. Nam kwaane-na se á ta‑á jege wo-ywoŋo dedɛ á woli da, pa se á zeini á dwonna lanyerane.
8Amo nam ba lage se a fe abam de á na wó la sabu tei to. Amo nam kwaana se a pa abam mo lɔre nɔɔna badwonna na seene ba yia ba woli ba dwonna tei to. Konto mo amo wó wane a lɔre abam swono kom ye chekke naa ko dae. 9Abam maŋe á yei dé Teiru Yezu Krista na ke zaane o ke nɔɔna yuu ne tei to. Wonto sɛ se o yage o na maŋe o jege jejegero telo maama to, ye o ji yiniga tu abam ŋwaane, se ko wane ko pa abam ji jejegero tiina Wɛ tei ne o yiniga kam ŋwaane. 10Amo nam na boŋe tei to, ko wó taa lana se á kwaane á ti abam na maŋe á bobo se á ta‑á toŋe kolo to. Bene delo na kɛ to, abam mo ye balo na dɛ yiga se á la sabu, ye á daa ta maŋe á da yiga á jege ko boboŋa to. 11Abam déem na boŋe se á ke konto to, á boboŋa yɔɔre ya tɔge-ko mo. Leile konto, daa ta ta‑á tɔge konto dwoŋi se ko ba ko kweeli. Pɔɔre-na á wonnu wone se ko maŋe de á jeŋa na jege tei to. 12Kokuri, abam boboŋa ná fɔge ya ja se á woli nɔɔna, ko ba chɔga de ko na wó taa mae tei maama to. Á wolim dem jege se de taa tɔge á na jege kolo to mo, ye ko dae se ko dwoni á na jege kolo to. Wolim dem konto dwoŋi lana Wɛ tei ne.
13Amo nam ba kwaana se a pa abam na woli nɔɔna tei to taa chana á baŋa ne, se ko daare ko pa á na woli balo to na paare. Ko nam ye se á ta‑á teili daane mo. 14Leile konto abam jeŋa gara, pa se á wane á woli balo yiniga na jege-ba to. Ko daare, yiniga ná tu ka ja abam, banto de daa wó wane ba pɔɔre ba wonnu tem wone ba ma woli abam. Konto mo á maama wó ta‑á teili daane. 15Ko nye de ko na popone Wɛ tɔnɔ kom ne we:
“Nɔɔna balo na pɛ wodiu dedɛ to
daa wo nɛ se ko dwoni ba dim.
Ko nam wo muri ko pa balo na pɛ fenfee yerane to.”#Nwoŋim 16:18
16Dé ke Wɛ lei de o na pɛ se Titusi yiga wo abam wone, se ko yi debam de na ye tei de abam to. 17O ma yɔɔre o sɛ debam na lwoori‑o se o ke kolo abam wolim ŋwaane to. Wonto boboŋa nam maŋe ya ja se o ba abam tei, de o na seene o yia se o woli abam to. 18Dé nam lage se dé pa dé nu-bu wodwoŋi mo tɔge de Titusi o ba. Yezu kɔgɔ kom na wo jei maama ne to nege‑o lanyerane de o na tɔɔle Wɛ kwor-ywoŋa kam tei to. 19Ba ma daare ba kuri‑o se o woli debam wone o tole o la sabu kolo dé na yeini dé ma dé zeini nɔɔna to. Dé na lage se dé pa nɔɔna na wolim konto to, ko ye se dé Teiru wom mo na zula, ye se dé bere we dé boboŋa tɔge nɔɔna wolim dem konto. 20Debam na lage sabu-fɔrɔ kom ye dé pɔɔre-ko dé pa nɔɔna tei to mo, dé ba lage se nɔɔn-nɔɔno na chwoŋa o yaale debam ko baŋa ne. 21Dé nam kwaane se dé ke kolo na lana dé Teiru wom yiga ne, dedaane nabiina de yiga ne to mo.
22Konto ŋwaane mo dé daa ta lage se dé toŋe dé nu-bu wodwoŋi se o tɔge de banto o ba á tei. Kuni dedɛ mo dé maane we wonto yɔɔre o tɔge chwoŋa, ye dé lɔre we o yia seene de Wɛ totoŋa yam. O laam ma ba o lɔre á wo na ye tei to lanyerane, ye ko pa se o tiini o boŋe á wolim. 23Ko ná ye Titusi, debam ye bedwe mo, ye dé tɔge daane dé toŋe abam ŋwaane. Ko daare ko ná ye badaara bam, ko ye wɛ-di sem nɔɔna bam mo le-ba se ba taa toŋa, se ko pa Yezu Krista na zula. 24Konto ŋwaane, kwaane-na á la sabu kom se ko pa ba lɔre á na swoi á dwonna tei to, se Yezu nɔɔna bam taa yei ko ni ne. Ba laam wó lɔre we, dé na jege abam teera tei to seene ko ye chega mo.
Currently Selected:
2 Korinti 8: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
