2 Korinti 7
7
Pɔɔl na tiini o jege ba swono tei to
1A badwoŋ-swonnu bam, Wɛ na pwooli kampwola de o nɔɔna bam konto to, ko maama ye debam ŋwaane mo. Mo kokuri á pa-na se dé le dé tete wo-zɔɔna yalo maama na lage ya chɔge dé kikia dedaane dé boboŋa to wone. Pa-na se dé taa kwaana dé jege wo-pwoŋo fase, dé na kɔre Wɛ to ŋwaane.
2Pa-na chwoŋa se debam swono taa wo á bochara ne. Debam nam wo ke dé chɔge abam wolowolo yiga. Dé wo pɛ se nɔɔn-nɔɔno tusi. Dé ta maa wo pini abam wolowolo wonnu. 3Amo na tage tei to, ko dae we a lage se a yaale abam mo. Amo maŋe a ta de abam we, dé ná ŋwe, naa dé ná tega, dé ta tiini dé jege abam swono mo dé bochara ne. 4Amo tiini a yei abam wo, ye a jege teera abam ŋwaane. Abam maa pae se amo bochare peini tega ne. Konto ŋwaane mo, yaara yalo maama na jege debam to, amo ta nae ywoni ya wone.
5Ko nam ye chega mo we, debam na vei dé yi Makedonia to, dé wo nɛ siu de fenfee de. Yaara dedɛ ma tiini ya ja debam. Nɔɔna déem mage ni-kantɔgɔ de debam, ye foone tiini de zo debam. 6Wɛ nam ye wolo na zeini nɔɔna balo wo na leere yaara ŋwaane to, ye o pa se ba bochara peini tega ne. O ma pa debam de bochara peini tega ne de o na pɛ se Titusi ba debam tei to. 7Kolo na pɛ dé wo pwoli to mo ye o na tu o ta abam na zeini‑o pa se o bochare peini tega ne tei to, ye ko dae o na tu o wo debam tei ne to yerane ŋwaane. O ma ta o bere debam amo fera na jege abam tei to, de á yiga na nyɔne amo ŋwaane tei to. O ta ma ta abam yiga na yɔɔre ka wo amo wone tei to. Amo na nigi abam ŋwa konto to pɛ se amo wopwolo kom tiini ko gaale.
8Amo nam yei we, amo na popone tɔnɔ kolo a pa abam to mo pɛ á jege wo-chechɔgɔ. Amo boboŋa nam wo jwoori ya za ko poponem dem ŋwaane. Boboa ne to amo boboŋa ya zaga de a tɔnɔ kom na pɛ abam wo chɔge tei to. Ko nam wo tiini ko daane abam ko kɛ. 9Amo laam jege wopwolo ye ko dae abam wo na chɔge to ŋwaane mo, se ko ye á wo-chechɔgɔ kom na pɛ se á leiri á wo tei to. Wɛ nam mɛ á wo-chechɔgɔ kom o jwoŋi abam, se á yé na lɛɛro debam ŋwaane. 10Kokuri, nɔɔno ná jege wo-chechɔgɔ Wɛ ŋwaane, ko wó wane ko pa o leiri o wo se o daare o na ŋwea Wɛ tei ne, ye konto mo lana nɔɔna maama tei ne. Ko daare nɔɔno nam ná jege wo-chechɔgɔ ne logo baŋa nabiina na jege-ko tei to, ko pae se wonto ba o ga o ŋwea mo Wɛ tei ne. 11Maane-na á nii á na jege wo-chechɔgɔ Wɛ ŋwaane ye ko pa se á ye tei to. Ko pɛ se á yia seene o ŋwaane, ye á ta kwaane se á bere á na jege bora tei to. Bane de foone maa jege abam. Á jege amo fera. Abam maa chana Wɛ ŋwaane, ye á kwaane se á waare wɛleere-keira. Abam na ke kolo maama to maa bere we, á jege bora ye taane daa tera.
12Amo na popone tɔnɔ kom a pa abam to, ko dae wolo na ke o chɔge to ŋwaane, ye ko dae wolo chɔgem dem na ke o yuu ne to ŋwaane. Amo nam lage se a pa abam mo lɔre jaja Wɛ yiga ne we, abam seene á yia debam ŋwaane lanyerane. 13Ko ye konto ŋwaane mo dé bochara peini tega ne.
Debam na nɛ Titusi to, dé ma na wopwolo ko gaale se ko woli de dé bochara na maŋe ya peini tega ne tei to. Kokuri dé ma lɔre we, Titusi jege wopwolo abam ŋwaane, de á na pɛ se lwia daa tera o tei ne to. 14Amo na toŋe‑o se o ba abam tei to, a déem seini abam a bere‑o. Abam nam wo yaale amo tia yam. Konto to, debam na tei abam dé bere Titusi tei to jigi chega, ne dé na yeini dé tɛ chega de abam maŋa maama tei to. 15O ná yeini o guli abam gula, ko pae se o tiini o jege abam swono se ko gaale. O maa yeini o guli abam na sɛ á pa debam lanyerane, ye á daare á jeeri‑o lanyerane de foone tei to.
16Amo na yei abam wo lanyerane woŋo maama baŋa ne to mo pae a jege wopwolo dedɛ.
Currently Selected:
2 Korinti 7: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
