2 Korinti 3

Wɛ ni-doore dem taane

1Abam badaara nam daa ta wó boŋe we dé lage dé bere dé tete mo de dé na ŋɔɔne tei to. Abam nam maŋe á yei debam na ye tei. Á daa ba jege se á jwoŋi twanno telo na bere debam chega na ye tei to nɔɔna badaara tei ne. Á ta ba jege se á popone tɔnɔ kolo na bere debam chega to á pa nɔɔn-nɔɔno. Nɔɔna badaara nam mo maŋe konto, ye ko dae debam. 2Abam tete nam mo bere debam chega na ye tei to, nenɛɛne á ye tɔnɔ kolo nɔɔna maama na wane ba ga ye ko popone debam bochara ne to. 3Abam na jege á ŋwea tei to mo nye de tɔnɔ kolo Yezu Krista na tɔge debam ŋwaane o popone to. O nam na popone tei to, o mɛ Ŋwea Tu Baŋa Wɛ Sin-laao kom mo o ke, ye ko dae bera mo o mɛ o ke. Poponem dem konto nam wo ke kandwa-pelɛ baŋa ne, se o ke-de abam nabiina bochara ne mo.#Nwoŋim 24:12; Jeremia 31:33

4Dé yɔɔre dé yei we konto ye chega mo, Yezu Krista na pɛ dé jege teena Wɛ tei ne to ŋwaane. 5Kolokolo nam tera debam tete tei ne ko na wó pa debam chwoŋa se dé taa toŋe Wɛ totoŋa yam konto to. Ko nam ye Wɛ zeinim dem mo pae se dé maŋe dé o totoŋa yam. 6O ma pa dé maŋe se dé taa bere nɔɔna o ni-doore dem na ye tei. O ni-doore dem o na gwoni o pa nabiina to nam ba tɔge ni-kaana yalo na popone tɔnɔ ne to. De nam tɔge Wɛ Sin-laao kom ŋwaane mo. Ni-kaana yam pae se toone mo nae chwoŋa de jaane nabiina. Ko daare Sin-laao kom nam mo pae se nabiina na ŋwea Wɛ tei ne.

7Ko ná ye Wɛ na kwei o ni-kaana yam o tɔge Moses jeŋa o pa o nɔɔna bam to, o déem lage-ya o ke kandwa-pelɛ baŋa ne mo. Wɛ déem na kwei-ya o ke Moses jeŋa ne konto to, o nenɔŋ-fɔrɔ kom maa tiini ko wora, ye ko pa Moses yibia tiini ka nyeena.#Nwoŋim 34:29-35 O yibia kam nyeenem dem maa wora de tia, ye de daa ta pepele Isarele tiina bam yia pa se ba ware ba nii o seeni. Wɛ ni-kaana yam maŋe ya tɔge de o nenɔŋ-fɔrɔ kom konto ya ba, ye ya pae se toone yerane mo wora. 8Ko daare Wɛ Sin-laao kom na woli nɔɔna tei to laam wó pa se Wɛ nenɔŋ-fɔrɔ kom tiini ko taa nae jaja mo. 9Wɛ ni-kaana yam pɛ se nɔɔna na chɔgem o tei ne, ye konto maama tɔge de o nenɔŋ-fɔrɔ kom. Ko daare Wɛ na woli nɔɔna se ba na chega o tei ne to, konto bá pa se o nenɔŋ-fɔrɔ kom tiini ko gaale nɔɔna yia ne na? 10Ko na ye chega to, Wɛ laam na woli nɔɔna ye o nenɔŋ-fɔrɔ kom tiini ko wora tei to bere we o nenɔŋ-fɔrɔ kom déem na bere tei to maŋe ko dae kolokolo. 11Wɛ ni-kaana yam déem wora de o nenɔŋ-fɔrɔ kom ye yanto ba ya kɛ. Ko daare o zeinim delo na wó taa wora taa taa to wó pa se o nenɔŋ-fɔrɔ kom tiini ko taa wora ko gaale.

12Debam na jege Wɛ teena konto dwoŋi to, dé wae dé bere o chega kam de baare. 13Dé nam bá seigi Wɛ chega kam nenɛɛne Moses déem na ke tei ye o kwei gɔrɔ o ma kwoli o yibia to. O ke konto se Isarele tiina bam mo yé taa nae o yibia kam nyeenem dem na wora de ti to. 14Banto boboŋa ma kwaale pa se ba ná gage Wɛ ni-dwoora yam twanno tem, ba ware ba lɔre o chega kam kuri. Ko ye nenɛɛne gɔrɔ kom ta mo kwoli ba yia de zem maama. Nɔɔno ná me de Yezu Krista, konto mo wó pa se gɔrɔ kom dɔne konto tu yia ne. 15Banto nam ná gage Moses ni-kaana yam twanno tem, gɔrɔ kom konto ta wora mo de zem de, pa se ba ware ba lɔre Wɛ chega kam. 16Nɔɔno nam ná pipiri se o tɔge dé Teiru wom, ko wó pa se gɔrɔ kom dɔne konto tu yia ne. 17Dé nam yei we dé Teiru wom de Wɛ Sin-laao kom maama ye bedwe mo. Wɛ Sin-laao kom nam ná wo nɔɔno wolo tei ne, kotu nɛ verem mo.#Galatia 5:1 18Debam balo maama na sɛ Yezu to daa ba jege gɔrɔ kolo na kwoli dé yibia to, pa se dé wae dé bere dé Teiru wom nenɔŋ-fɔrɔ kom jaja. Ko maa pae se dé wora dé jiri ne o tete na ye tei to, ye o nenɔŋ-fɔrɔ kom tiini ko pula dé tei ne de dam. Dé Teiru wom na ye bedwe de Wɛ Sin-laao kom to mo wó pa dé bere Wɛ dam konto dwoŋi.

Currently Selected:

2 Korinti 3: KBG

Highlight

Copy

Compare