2 Korinti 2

1Mo kokuri a jwoori a boŋe a ja se a daa yé ba abam tei, se ko pa wo-chechɔgɔ yé taa wora. 2Abam mo ye balo na wó wane á pa se amo na ywoni. Konto to, amo ya ná tua, ye a pa se á wo chɔge, nɔɔn-nɔɔno daa bá taa wora o na wó wane o pa se a na wopwolo. 3Ko ye konto ŋwaane mo a daama popone tɔnɔ kom a pa abam. Amo déem ba lage se a ba á tei se ko pa amo wo chɔge abam ŋwaane. Ko nam maŋe se á ta‑á ye balo na pae amo wo pwoli to. Amo nam ke a wo dedaane abam we, amo ná jege wopwolo, abam de jege wopwolo mo. 4Amo daama na popone tɔnɔ kom a pa abam to, a boboŋa vugimi lanyerane, ye lwia jege-ne pa se a yi-na nwoŋi dedɛ abam ŋwaane. Amo na popone tei to, ko dae se ko pa á wo chɔge. Ko nam ye se á wane á lɔre amo na tiini a jege abam swono se ko ja gaale tei to mo.

Ŋwaŋa durim taane

5Nɔɔno wolo nam na ke o chɔge o dwoŋi yiga to pɛ abam maama wo chɔge, se ko dae amo yerane wo mo. Ko nam dae wo-chɛɔ amo tei ne. Kotu keim dem wo tiini de daane abam. 6Abam dedɛ na pɛ se o na waarem to, ko maŋe se á laam yage. 7Á nam jege se á duri o ŋwaŋa mo ye á ke‑o lanyerane, se o bochare peini tega ne. Ko nam ná dae konto, ye o wo ná tiini ko chɔge, ko wó pa se o boboŋa de chɔge. 8Konto ŋwaane a lwoori abam se á pa kotu lɔre we, á jege o swono. 9Amo daama na popone tɔnɔ kom to, ko ye se a maane abam a nii, á wó sɛ á tɔge amo ni dem woŋo maama baŋa ne, naa á bá sɛ. 10Abam ná yage nɔɔno wolo keim á ma chɛ‑o, amo de tɔge konto mo. Nɔɔno wom za na ke kolo o chɔge to, amo yage a ma chɛ‑o. Ko nam ye abam ŋwaane mo a ke konto Yezu Krista yiga ne. 11Dé nam jege se de duri nɔɔno wom ŋwaŋa konto, se ko yé pa setaana pɛ na chwoŋa o wane debam. De nam maŋe de yei wonto na boŋe se o pa debam tusi tei to.

Wɛ chega kam tɔɔlem

12Amo na vei a yi Torase, ye a lage se a tɔɔle Yezu Krista kwor-ywoŋa kam a bere nɔɔna da to, amo maane we dé Teiru wom ya pore chwoŋa se a ke konto. 13De konto de, a bochare ma tiini de di, de a na beeri Titusi jei a ga to. A na wo nɛ‑o konto to, a ma bane nɔɔna bam ye a daare a kɛ Makedonia.#Kikia 16:8-10

14Nam pa-na se dé taa ke Wɛ lei. Maŋa maama wone wonto mo pae se dé tɔge Yezu Krista kwaga ye dé zeiŋi o yuu nɔɔna tei ne. Wɛ maa pae se nɔɔna tɔge debam ŋwaane mo ba lɔre Yezu taane jei maama ne, nenɛɛne woŋo kolo lwom na ywomma ye de jage de yi jei maama tei to. 15-16Debam na yeini dé tɔɔle Yezu Krista chega kam dé bere nɔɔna maama tei to maa pae se dé nye de lwom delo na zaŋe de yi Wɛ tei pa o jege wopwolo to. Ko ná ye balo na lage ba ga ba ŋwea Wɛ tei ne to, lwom dem konto maa pae se ba jege maana we, toone wó ja-ba. Ko nam ná ye balo Wɛ na wora o jwoŋi-ba to, lwom dem wó taa jege ywoni ba tei ne, pa se ba jege maana we, ba wó na Wɛ ŋwe-doŋa kam.

Bera mo wó maŋe de totoŋ-kamunu kom konto dwoŋi? 17Nɔɔna dedɛ na bere Wɛ kwora kam tei to, ba pae se ko nye de kolo ba na jege ba pipia se ba na nyɔɔre ko baŋa ne to. Debam nam dae konto dwoŋi. Wɛ na toŋe debam to, dé yeini dé kwei dé wo maama mo dé maa bere o chega kam, nenɛɛne dé zege o yiga ne dé ŋɔɔna Yezu Krista ŋwaane.

Currently Selected:

2 Korinti 2: KBG

Highlight

Copy

Compare