2 Korinti 1
1
1Amo Pɔɔl wolo Wɛ na tiŋi-ne de o tete boboŋa se a taa ye Yezu Krista totoŋa nakwe to mo popone tɔnɔ konto, ye dé nu-bu Timoti mo tɔge o woli-ne. Dé popone se dé pa abam balo na ye Wɛ kɔgɔ kom wo nɔɔna ye á zoore Korinti ne to, ko woli de Wɛ nɔɔna balo na zoore Akaya teene dem maama ne to.#1:1 Korinti déem ye teo kamunu na wo Akaya kateiri dem ne to.
2Dé Kwo Wɛ, dedaane dé Teiru Yezu Krista wó pa abam zaane de yazura.
Wɛ na tiini o zeini debam tei to
3Pa-na dé ke Wɛ lei. Wonto mo ye dé Teiru Yezu Krista Kwo, ye o daa ta ye debam Kwo wolo na jege dé ŋwaŋa to. O maa ye Wɛ wolo na zeini nɔɔna dedɛ se ba bochara peini tega ne. 4Dé ná wo yaara yalo maama wone, wonto mo yeini o pa dé bochara peini tega ne, se ko pa dé wane dé zeini balo de na wo yaara dwi maama wone to se ba de bochara peini tega ne. Dé wó tɔge zeinim delo Wɛ na maŋe o pa debam tete to baŋa ne dé zeini dé dwonna bam konto. 5Yezu Krista na tiini o yaare to, debam de tɔge dé na ya dwoŋi. Dé na me ded‑o to, dé ta wó tɔge dé na zeinim dedɛ Wɛ tei ne, nenɛɛne o na zeini Yezu Krista tei to. 6Konto ŋwaane, debam ná wo yaara wone, ko ye se ko zeini abam mo se á bochara peini tega ne, se ko daare ko pa Wɛ jwoŋi abam ŋwea. Wɛ nam ná pɛ dé bochara peini tega ne, ko ye se abam de na zeinim konto dwoŋi, se á wane á na dam á vɔ á wo á zege lanyerane de yaara yalo dwoŋi debam de na nɛ to. 7Mo kokuri dé tiini dé jege abam teena, kolo ŋwaane dé yei we, abam na tɔge á na debam yaara yam dwoŋi to, á wó tɔge á na zeinim Wɛ tei ne, ko maŋe de o na zeini debam tei to.
8Dé nu-bia bam, dé lage dé pa abam maane dé na kare Asia teene dem ne ye dé na yaara tei to. Dé na nɛ cham delo to tiini de dana de dwoi debam jaanem, ye dé boŋe we, dé wó ga dé ŋwea. 9Dé nam na zege toone yiga ne konto to, ko ye se ko pa dé daa yé taa boŋa dé tete dam na ye tei to, se dé daare dé ke dé wo-dedoa de Wɛ, o na jege dam se o pa nɔɔna bi toone wone to ŋwaane. 10Wɛ nam seene o jwoŋi debam yaara yalo na lage ya pa dé na toone to wone, ye o ta wó yɔɔre o jwoŋi debam konto dwoŋi. Dé nam tiini dé jege teena Wɛ tei ne we, o ta wó jwoŋi debam toone jeŋa ne. 11Abam nam wó zeini debam de á na lwoori Wɛ á pa debam tei to. Konto to, nɔɔna dedɛ ná lwoori Wɛ pa dé na zeinim, ko wó pa se nɔɔna dedɛ de seene ba ke‑o lei de o na jwoŋi ba wɛ-lworo kom to.
Pɔɔl na leiri o boboŋa tei to
12Debam na jege teera tei to mo ye dé na tɔge chwoŋa abam tetare ne ye chaveera tera dé tei ne. Dé maa jege wo-pwoŋo mo ye dé yɔɔre dé bere dé wo de abam. Wɛ zaane dem mo zeini debam pa dé ye konto. Debam wo tɔge nabiina swa ŋwaane. Debam tɔge chwoŋa konto dwoŋi de nɔɔna maama ye ko fɔge ko ye abam ŋwaane. 13Dé na popone kolo dé pa abam to ba jege wo-siseigiru. Á wó wane á ga-te ye á ni ko kuri. 14Abam nam maŋe á lɔre debam na ye tei to fenfee yerane mo. Amo maa boŋe we, á wó ba á tiini á lɔre debam fase, se dɛ dem dé Teiru Yezu Krista na wó jwoori o ba to, abam laam wó ta‑á jege teera debam ŋwaane, ne debam na jege teera de abam tei to.
15Amo na tiini a yei konto lanyerane to, a boŋe a ja se a bobo a ba abam tei, se ko pa á na zeinim kuni belei. 16Kokuri a boŋe se a tɔge abam tei mo a vo Makedonia, se a ná maa jwoori dáane, se a daa tɔge á tei, se á laam wane á woli-ne se a kɛ Judea seeni.#Kikia 19:21 17Amo na boŋe se a ke konto ye a wo wane a na chwoŋa to, á pae se amo jege ni-zɛ ni-zɛ mo na? Amo ná yeini a boŋe se a ke keim delo, á pae se ko ye amo tete fɔgem yerane mo na? Á nam pae se amo ye wolo na tɛ o gwaane daane we, “Ɛɛ, ɛɛ”, de “Aawo, aawo” to mo na? 18Wɛ nam jege chega ye o yei we debam na tɛ kolo de bere abam to dae nia yalei, nenɛɛne “Ɛɛ” de “Aawo” na gwaane daane tei to. 19-20Debam nam na bere abam Wɛ chega kam tei to, amo de Silas de Timoti pɛ se á lɔre Yezu Krista wolo na ye Wɛ Bu wom to taane chekke.#Kikia 15:22 Wonto seene o dae nia yalei tu konto dwoŋi. Wonto nam mo ye wolo na sɛ Wɛ ni dem de “Ɛɛ” yerane to. Wɛ na pwooli de o nɔɔna bam tei maama to mo jigi chega o tei ne. Konto ŋwaane, de ná yeini de ware Wɛ, dé tɔge Yezu Krista ŋwaane dé we, “Ameena”, se ko pa Wɛ taa jege zula debam tei ne.
21Ko ye Wɛ mo pae se dé tɔge de abam dé zege lanyerane Yezu Krista ŋwaane. Ko ta ye wonto mo kuri debam se dé taa ye o nyem. 22O ma zeini debam de dam, se o ma ke maana o bere we, dé seene dé ye o nyem. O ma daare o ke o Sin-laao kom debam bochara ne, se konto da yiga ko tiŋi chwoŋa se ko pa dé lɔre we, dé laam wó ba dé na Wɛ wo-laaro tem maama.#Efesia 1:14
23Wɛ yei amo wo, ye wonto wó zege amo kwaga ne de a na tɛ chega a bere abam tei to. Amo na zage a boboŋa se a daa yé ba abam tei Korinti ne to, ko ye se a yé pa á na á chaveera mo. 24Ko nam dae we debam lage se dé fe abam de á na wó sɛ Wɛ chega kam tei to, kolo ŋwaane abam maŋe á sɛ‑o de pu-dɛa. Dé nam lage se dé woli abam, se á ta‑á jege ywoni Wɛ ŋwaane mo.
Currently Selected:
2 Korinti 1: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
