1 Tim 5
5
Nɔɔna badwonna wolim taane
1Yé zaŋe n bwɛ Wɛ chwoŋa nɔn-kwea. N jege se n kwoori‑o mo, nenɛɛne o ye n kwo mo tei. Ko ná ye nɔn-donno, n jege se n ke-ba nenɛɛne ba ye n nyaana mo tei. 2Ko ta ná ye kazena, se n ta‑n ke-ba nenɛɛne ba ye n niina mo. Ko ná ye ka-donno, se n ke-ba nenɛɛne n nakɔa tei de n boboŋ-dɛɛra.
3Ko ná ye kadeina, ye ba ná seene ba ba jege nɔɔno se o taa nii ba baŋa ne, se n ta‑n zuli-ba. 4Ko daare kadeim ná jege bia naa naaro, banto mo jege se ba taa nii‑o, ba na ye o tete sɔŋɔ tiina to ŋwaane. Mo Wɛ chwoŋa berem dem na ye tei to. Kadeim bia ná woli‑o konto, ko wó pa se ba jwoori ba ŋwe ba tiina jene de ba na yaare ba ŋwaane to. Konto nam mo pwoli Wɛ wo. 5Kaane wolo nam ná seene o ye kadeim ye o ba jege nɔɔn-nɔɔno se o taa nii o baŋa ne, kotu daŋe o teena Wɛ baŋa ne mo. Tete de wea maama o tiini o ware Wɛ mo ye o lwoori wolim o tei ne. 6Ko daare kadeim wolo na lage ka jaŋa kikia yerane to maŋe o te mo ye o ŋwe. 7Nam pa se ba maama lɔre wonnu tento se ba taa ke, se nɔɔn-nɔɔno yé wane o zaŋe o yaale ba yuu. 8Nɔɔno yiga ná tera de o chorro, ko fɔge ko dae o tete sɔŋɔ tiina, konto tu ywori Wɛ chwoŋa kam wone mo. Wonto mo tiini o ye nɔn-balɔrɔ o dwoi balo na maŋe ba ba tɔge Wɛ to.
9Abam yé ga kadeim yere á woli kadeina yera yam wone, ko ná dae we wonto kɛ bena fuseredo. Wolo na maŋe se o woli da to jege se o baro zoorem taa ye bedwe yerane mo. 10Ko maŋe se nɔɔna taa yei o ni ne mo de totoŋ-laaro o na jege o ke to. O ná loge bia ye o nii ba baŋa ne, naa o ná jeeri veira o diga ne lanyerane, naa o ná gwooni o tete se o taa woli Yezu nɔɔna bam, naa o ná zeini balo na wo cham wone to, ye o ná yɔɔre o tɔge keim-laaro chwoŋa konto dwoŋi, abam wae á gare‑o á woli da. 11Ko daare kadeina balo na ye ka-bwona to, abam ba jege se á ga-ba á woli da. Kolo ŋwaane banto wo daa ná zaga se ba yé taa ye kadeina, ba wó ywori mo Yezu Krista tei ne ye ba lage se ba daa zo banna. 12Ba ná zaŋe ba ke konto, ba bá na bora, kolo ŋwaane ba chɔge ba na dɛ yiga ba du ba ni de Yezu Krista tei to mo. 13Ko nam ta woli da, kadeina balo na ye ka-bwona to yeini ba tɔge jawɔrɔ chwoŋa mo, ye ba swoi se ba taa tole ba vei sɔŋɔ de sɔŋɔ. Ko ma pa se ba ji bebare-nyena de ka-gɔɛ ba woli ba jawɔrɔ kom wone, ye ba ŋɔɔne wonnu telo na dae se ba ya ŋɔɔne to. 14Mo kokuri pa se amo boŋe we, ko wó ta lamma se kadeina balo na ye ka-bwona to taa zoore banna se ba lo bia se ba daare ba taa nii ba tete sam baŋa ne. Ba ná ke konto, ko wó pa se wolo na done debam to daa bá na chwoŋa se o twe debam. 15Kolo ŋwaane kadeina badaara maŋe ba ywori Wɛ chwoŋa wone ye ba daare ba tɔge setaana pɛ wom.
16Kaane wolo ná tɔge Wɛ chwoŋa, ye kadeina ná wora o tete sɔŋɔ ne, konto tu mo jege se o taa nii ba baŋa ne mo. Ko dae se o yage-ba o pa Yezu kɔgɔ kom nɔɔna se ba taa nii ba baŋa ne. O ná yage-ba konto, ko wó daane Yezu nɔɔna bam mo, pa se ba daa bá wane ba nii kadeina balo na ba jege nɔɔn-nɔɔno to baŋa ne.
17Ko daare ko ná ye Yezu kɔgɔ kom nakwa balo na ye yuu tiina ye ba nii Yezu nɔɔna baŋa ne lanyerane to maŋe se ba taa jwoŋi zula de ŋweero kuni belei belei mo, ko fɔge ko dae balo na seene ba yia ba bere Wɛ chega kam to. 18Kolo ŋwaane ko popone Wɛ tɔnɔ kom wone mo we, “Nmo ná jege nabea n ma n toŋe n faao, yé vɔ ka ni se ka yé wane men-bia bam ka di.”#Nia Gulim 25:4; Luka 10:7 Ko ta popone we, “Tontoŋeno maŋe se o taa jwoŋi o ŋweero mo.”
19Nɔɔno ná zaŋe o ŋɔɔne Yezu kɔgɔ kom nakwe taane de nmo, se n yé sɛ, ko ná dae we nɔɔna balo yi na nɛ o keim-balwaaro tem to yi balei naa batɔ. 20Ko daare nakwa balo na seene ba ke keim-balwaaro to, se n bwɛ-ba nɔn-kɔgɔ kom yibia ne. Konto mo wó pa se foone ja badaara bam de.
21A nam lage a kaane‑m mo Wɛ yiga ne, de Yezu Krista yiga ne, de Wɛ tete malese sem yiga ne, se n yɔɔre n sɛ kolo a na tage to. Yé kuri nɔɔna daane de n na bere-ba ye n ke-ba tei to.
22Yé gare n zi n jea nɔɔn-nɔɔno baŋa ne se n pa o ji Wɛ tontoŋeno. Yé pa se nɔɔno keim-balwaaro tɔge te lɔgese‑m. Fɔge n ja n tete de boboŋ-dɛɛra ye tusim tera.
23A ya boŋe se a ta de nmo we, n wo kom na yeini ko wɔe maŋa maama to, ta‑n nyɔ sa-gwoo fenfee, se ko dae na yerane mo nmo wó ta‑n nyɔa.
24Nɔɔna badaara wo-balwaaro yɔɔre te nae mo jaja. Banto taane dem ná tua, nɔɔna maama maŋe ba yei ba wo-balwaaro tem ni ne. Ko daare babam wo-balwaaro nae kwaga yerane mo. 25Ko ta ye bedwe mo de keim-laaro, te de yɔɔre te nae mo ja. De konto de, telo na ba nae lanyerane to de maŋe te bá wane te seigi.
Currently Selected:
1 Tim 5: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
