1 Tim 6
6
Wɛ chwoŋa tɔgem jege nyɔɔre
1Balo maama na ye kabɛ ye ba tɔge Wɛ chwoŋa to jege se ba taa pae ba yuu tiina mo zula dedɛ. Konto wó che se nɔɔn-nɔɔno yé na chwoŋa se o ŋɔɔne o yaale Wɛ yere dem dedaane debam berem dem. 2Kabɛ selo na toŋe ba pae ba yuu tiina balo de na tɔge Wɛ to, ko wo maŋe se ba taa gwooni-ba de ba na ye nu-bia Wɛ chwoŋa wone to. Ba nam jege se ba tiini ba toŋe ba pa-ba se ko gaale, kolo ŋwaane ba yuu tiina balo ba na toŋe ba totoŋa to tɔge ba ye Yezu nɔɔna mo, ye Wɛ swo-ba. Nmo jege se n ta‑n bere nɔɔna wonnu tem konto maama mo se ba taa tɔge-te. #1 Piita 2:18-20
3Nɔɔno wolo maama ná wo sɛ se o tɔge debam Teiru Yezu Krista bera yam, dedaane Wɛ chwoŋa berem chekke dem, ye o nam ná bere wo-gaa, 4konto tu pae se o jege swa mo ye o nam yeiri kolokolo. Wonto dwoŋi tiini o lage se o taa mage ni-kantɔgɔ wonnu telo na ba jege kuri to baŋa ne mo. O na ke konto to mo pae se nɔɔno wo gweena de o dwoŋi. Ko ta maa pae se nɔɔna jaane daane, ye ba twe daane, ye ba ta boŋe lwarem ba pa daane, 5ye ba nia de ba maŋe daane. Ba yeini ba ke konto ba boboŋa na chɔge ye ba daa ba tɔge chega chwoŋa to ŋwaane. Konto maa pae se ba boŋe we, Wɛ chwoŋa tɔgem ye kolo ba na wó tɔge ko baŋa ne ba na nyɔɔre ba pa ba tete to mo.
6Ko daare ko ye chega mo we, Wɛ chwoŋa tɔgem jege nyɔɔre dedɛ ko pae balo na jege ba wonnu ye ba boŋe we tento mo maŋe to. 7Ba na loge debam to, dé wo jaane kolokolo dé ba logo baŋa. Dé nam ná lage dé yage logo baŋa, dé bá wane kolokolo dé ja dé viiri.#Lei 49:16-17 8Konto to, dé ná jege wodiiru se dé taa di, de gwaaro se dé taa zoora, dé wó pa se tento mo maŋe debam de dé wopwolo. 9Ko nam ná ye balo na boŋe se ba taa ye naduna to, sabu-laga yeini ko soge-ba mo, pa se ba to tega ne, nenɛɛne kalanchogo mo jaane-ba tei. Ba fera maa zoore wo-yɔɔro telo na wó yaare-ba to dedɛ. Konto keim dem mo yeini ko pae ba yuu yaala, ye ba yɔɔre ba na chɔgem. 10Kokuri to, nɔɔno boboŋa ná dɛ sabu-laga, wo-lwanno dwi maama wó ba da mo. Nɔɔna badaara wora ba na pɛ se ba yi zo sabu-laga, ye ba ywori Wɛ chwoŋa kam wone pa se ba jege ba tete ba yaare dedɛ.#Luka 12:15
11Ko daare nmo Timoti na ye Wɛ tontoŋeno to, n jege se n ja n tete mo dedaane wonnu tem konto. Ke n tete n ke daane se n ta‑n jege boboŋ-dɛɛra, de Wɛ kɔrɔ, ye n jege wo-dedoa de Wɛ, de swono, de pu-dɛa, de ban-peno. 12Poore n yera se n ta‑n tɔge Wɛ chwo-laao, nenɛɛne n na kwaane n zo jaŋa wone se n di yiga tei to. Konto mo nmo wó jwoŋi ŋwea kalo na ba jege kweelim Wɛ tei ne to. Ŋwea kam konto mo Wɛ bwoŋi‑m se n ba n jwoŋi, de nmo déem na zaŋe n zege nɔn-kɔgɔ yiga ne n pa se ba lɔre we, n tɔge chega chwoŋa kam to. 13Yezu Krista de déem zege Pontusi Pilata yiga ne o pa se o lɔre we, omo tɔge chega chwoŋa kam.#Jɔn 18:37 Amo nam lage a ta a bere nmo Yezu yibia ne, dedaane Wɛ wolo na pae wonnu maama ŋwea to yibia ne we, 14n jege se n yɔɔre n ta‑n tɔge chega kam konto, se nɔɔn-nɔɔno yé wane o zaŋe o na nmo wo-lɔŋɔ, se ko taa nii dɛ dem debam Teiru Yezu Krista na wó jwoori o ba o veere o tete nabiina yiga ne to. 15Maŋa kalo na maŋe to ná yia, Lam-fɔrɔ Tu Baŋa Wɛ wolo yerane na tei nɔɔna maama to laam wó pa se Yezu Krista jwoori o ba konto. Wɛ mo ye pwa maama Pɛ de dedɛɛra maama Teiru, 16ye wonto yerane mo maŋe o jege ŋwea taa wuu. O nam zoore pwooni jeiga kalo na pepele yia to wone mo, ye nɔɔn-nɔɔno bá wane o twɛ da. Nɔɔn-nɔɔno tera o na nɛ o yibia yam kɔtaa, ye nɔɔn-nɔɔno nam tera o yia na wó wane ya na‑o. Zula taa wo o tei ne, dedaane dam delo na ba jege tiim to. Ameena.
17Ko ná ye balo na ye naduna zem logo kom ne to, n jege se n kaane-ba se ba yé boŋe kamunim ba pa ba tete. Ba ba jege se ba kwei ba teena ba daŋe jejegero baŋa ne, kolo ŋwaane te nye de vio mo. Ba nam jege se ba kwei ba teena ba pa Wɛ, kolo ŋwaane o yeini o pa debam wonnu dedɛ se dé taa di ywoni te maama baŋa ne. 18Kaane-ba se ba taa ke wo-laaro dedɛ, se ba totoŋ-ŋona ji ba nadunni, se ba taa jege wo-ywoŋo ye ba pɔɔre ba wonnu tem ba zeini daane. 19Ba ná ke konto, ko wó bere we ba tiŋi wonnu mo ba pa ba tete, ye tento wó wane te woli-ba jwa seeni, te na jege kuri dedɛ te pa-ba to ŋwaane. Konto mo wó pa se ba na ŋwea kalo na ye chekke to Wɛ tei ne.
20Timoti, fɔge n ta‑n nii kolo maama Wɛ na kwei o ke nmo jeŋa ne to baŋa ne. Ja n tete dedaane wonnu telo nɔɔna na boŋe we te pae yi-poro ye te ba pae to. Tento mo ye lare-yɔɔro telo na ba woli Wɛ chwoŋa to, dedaane taana yalo na ba jege kuri to. 21Nɔɔna badaara wora ba na pae se ba jege yi-poro kom konto, ye ko laam pa se ba ywori Wɛ chwoŋa kam wone. Konto to, fɔge n ja n tete de wonnu tem konto.
Wɛ zaane dem taa wo abam tei ne.
Currently Selected:
1 Tim 6: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
