1 Samuwel 9

Samuwel kuri Sɔɔl se o ji pɛ

1Benjamin dwi tu wodwoŋi déem mo wora, o yere mo Kisi. O maa ye nadum. O déem ye Abiyeli bu mo. O kwo-nakwe yere maa ye Zerora ye wonto de kwo yere ye Bekorafa. Banto déem nwoŋi Benjamin dwi tu Afiya sɔ-yuu kom ne mo. 2Kisi bu dedoa déem wora, o yere mo ye Sɔɔl. O maa ye nenɔm ye o dwoŋi tera Isarele tiina bam maama wone. O déem ye nɔn-wagele mo chekke. O maa ye nɔn-doŋo ye o tiini o dɔra o dwoi o yuudwonna bam maama.

3Dɛ dedwe mo Kisi bonɛ sedwonna ywori se jei. O ma ta o bu Sɔɔl o we, “Ja dé tontoŋena bam wone dedoa se á vo á beeri bonɛ sem.” 4Sɔɔl ma seene o ke konto. Wonto de o tontoŋeno wom ma tole Efrayim zwonnu laŋa kam maama, de Salisa jei sem maama, ba beeri bonɛ sem ba ga. Ba ma kɛ ba vo ba yi Saalim, ye ba wo nɛ-se dáane de. Ba ma daare ba tɔge Benjamin laŋa kam maama. Ba ta maa wo nɛ bonɛ sem jei sem konto mɛ mɛ.

5Ba laam ma beeri ba vo ba yi Zufa. Sɔɔl ma ta de o tontoŋeno wom o we, “Pa se dé jwoori sɔŋɔ. Tento wɛɛne, amo kwo daa ba nii bonɛ sem, o laam jei o boŋe debam boboŋa mo, dé na daane to ŋwaane.” 6Tontoŋeno wom ma leiri‑o o we, “Nii, Wɛ tontoŋeno dedoa wo teo konto ne. Nɔɔna tiini ba nege‑o, kokuri, kolo maama o na tɛ to yeini ko ke konto mo. Pa se dé beeri o jei dé vo, se dɛ delo wonto wó bere debam chwoŋa kalo de na wó tɔge to.”

7Sɔɔl laam ma bwei‑o o we, “Dé nam ná lage dé vo nɔɔno wom tei, bɛ mo dé wó ja dé vo dé pa‑o ye dé wodiu maama ti tento to? Kolokolo daa tera dé tampɔro tem wone, naa woŋo wora?” 8Tontoŋeno wom ma leiri‑o o we, “Nii mo! Amo jege sabu-dale balaŋa. Amo wó kwei dento mo a pa‑o, se o bere debam chwoŋa kalo dé na wó da to.” 9Faŋa to, Isarele tiina bam déem ná lage se ba vo Wɛ ni-jwoŋinu tei ba bwei woŋo Wɛ tei ne, ba yeini ba ta we, ‘Pa-na se dé vo dé na Yi-naro wom.’ Kokuri, ba déem bwoi Wɛ sampwori sem we, ba ye yi-nara mo. 10Sɔɔl laam ma ta o tontoŋeno wom o we, “Ko nam lamma, dé kɛ.” Ba ma kwei chwoŋa ba maa vei teo kolo Wɛ tontoŋeno wom na zoore da to.

11Ba na wora ba diini zwoŋo se ba vo ba yi teo kom to, mo ba jeeri bukwa na nwoŋi teo kom wone ba maa vei buga se ba mɔ na. Ba ma bwei-ba ba we, “Yi-naro wom zem wo ywo na?” 12Bukwa bam ma leiri ba we, “Ɛɛ! Nam ke-na lela, se o yɔɔre o wo abam yiga ne mo. Zem mo o daa ta tu debam teo. Kokuri, o lage o woli dé nɔɔna bam wone se ba ke kaanem zwoŋo yuu wara-jei bimbini dem baŋa ne. 13Á ná zo teo kom wo, á wó wane á yi‑o ye o ta wo diini o yi mɛ kaanem dem na wó ke to. Nɔɔna bam wó taa jei ba cheigi wonto mo se o ba o lwoori Wɛ swolim o ke kaanem dem baŋa ne, se wonto de nɔɔna bam maama laam wane ba di wodiu. Nam véi-na, se á wó na‑o.”

14Ba ma vo ba zo teo kom wone. Ba na maa zoore to, mo Samuwel de maa beene se o jeeri-ba. O déem wo chwoŋa ne mo, o diini o maa vei kaanem jei sem. 15Dɛ delo tega na wó poore se Sɔɔl ba o yi teo kom to, mo Baŋa Wɛ déem nam ya lwoori yiga o ta de Samuwel o we, 16“Jwa kanto maŋa ne, amo wó toŋe Benjamin dwi tu dedoa se o ba n tei. Ko ye se n lwo swolim nuga mo o yuu ne, se n ma n tiŋi‑o se o taa ye amo nɔɔna Isarele tiina bam yiga tu. Se wonto mo wó jwoŋi a nɔɔna bam o yage Filisi tiina jeŋa ne. Kokuri, a nii a na a nɔɔna bam cham dem, ye ba keira kam de yi-ne.”

17Samuwel yi na tu de peere Sɔɔl to, mo Baŋa Wɛ tage ded‑o o we, “Nɔɔno wonto mo a tage o taane a bere‑m to. Wonto mo wó taa nii amo nɔɔna bam baŋa ne.”#1 Samuwel 16:12 18Samuwel na wo teo kom manchwo-peena ni ne to mo Sɔɔl fɔɔre o vo o yi o tei. O ma bwei‑o o we, “Ja! Bere debam Yi-naro wom na zoore mɛ to.” 19Samuwel ma leiri‑o o we, “Amo mo ye Yi-naro wom. Nam da-na amo yiga se dé di zwoŋo kom baŋa dé vo kaanem jei sem. Zem mo dé wó tɔge daane dé di kaanem dem wodiu. Jwa zezeŋa ne, a ta wó ta kolo maama na wora to a bere‑m, se a daare a yage‑m chwoŋa ne se n viiri. 20Pa se n boboŋa taa tiga, se ko ná ye bonɛ selo na jei da yatɔ zem tento to, ba jwoori ba na-se. Nam lɔre we, Isarele tiina bam maama yi page nmo de n kwo sɔŋɔ kom baŋa ne mo.”

21Sɔɔl ma leiri o we, “Amo nam nwoŋi Benjamin dwi dem wone mo. Isarele dwia yam maama wone, Benjamin dwi dem mo tiini de muri. Amo ta na nwoŋi diga kalo ne to mo ye kalo nɔɔn-nɔɔno na yeiri ka ni ne to. Tetɛ mo ye nmo ŋɔɔne taane dento n pa-ne?”

22Samuwel déem ma ja Sɔɔl de o tontoŋeno wom o vo o zo jeerim diga kam wone. O ma pa se ba jeini mɛ yuu tiina na jei to.#9:22 Samuwel déem na ke-ba tei to bere we, banto mo jege yuu ba dwoi nɔɔna fintɔ bam maama. Balo ba na bwoŋi se ba jeeri da to maa ye nenɛɛne nɔɔna fintɔ. 23Samuwel ma ta de wolo na saŋe ba wodiu kom to o we, “Kwei nɔne delo a ya na pɛ‑m ye a ta dede‑m se n tiŋi de yera to n ja n ba n pa-ne.” 24Wodi-saŋeno wom ma kwei chwei dem de de nɔna yam maama o ja o vo o zege Sɔɔl yiga ne. Samuwel laam ma ta de Sɔɔl o we, “Ko ye nmo nyem mo. Di n na lage tei to, se a maŋe a tiŋi nɔne dento n ŋwaane mo, ye a laam bwoŋi nɔɔna banto maama se dé di daane.”

Dento dɛ dem ne, Sɔɔl dedaane Samuwel ma di wodiu daane. 25Ba na di ba ti to, ba ma zege da ba tu ba jwoori teo kom wone. Samuwel ma ja Sɔɔl o di sɔŋɔ kom nayuu baŋa ye ba lara.#9:25 ba lara naa ba kwɛ Sɔɔl peiga jei 26Tega na jege ka poore to, mo ba gwoni tega ba zaŋe. Samuwel ma ta de Sɔɔl ya na wo nayuu kom ne to o we, “Nam zaŋe n ti n yiga, se a bane‑m a yage chwoŋa ne se n viiri.” Sɔɔl na zaŋe o tu nayuu kom ne to, o de Samuwel ma nwoŋi pwooni ba kwei chwoŋa ba maa kɛa.

27Ba na vei ba yi teo kom ni dem to, Samuwel ma ta de Sɔɔl o we, “Ta de n tontoŋeno wom se o tɔge yiga o taa via.” Sɔɔl tontoŋeno wom na kɛ o ti to, mo Samuwel daa tage o we, “Zege konto, se a ta Wɛ kwora kam a bere‑m.”

Currently Selected:

1 Samuwel 9: KBG

Highlight

Copy

Compare