1 Samuwel 8

Isarele tiina we ba lage pɛ

1Samuwel déem ma ba o kwe dedɛ. O ma pa o bia bam ni se banto taa nii Isarele tiina bam baŋa ne. 2O bu-kwea kam yere mo ye Joweli. Wolo na saŋe wonto kwaga to yere maa ye Abija. Ba déem yeini ba jeeri Beeriseba ne mo, ye ba nii Isarele tiina bam baŋa ne. 3Samuwel bia bam nam wo tɔge ba kwo wom nɛ-bwora kam. Ba déem tɔge sabu-laga mo. Ba maa sɛ se nɔɔna yeigi-ba de sabu, ye ba daare ba kweele chega kam ba yage tega ne de ba na bore nɔɔna taana tei to.

4Isarele nakwa bam laam ma la ba jeeri daane, ye ba vo Samuwel tei Rama ne. 5Ba ma ta ded‑o ba we, “Leile konto, nmo tiini n kwe mo. N bia bam nam ba tɔge nmo nɛ-bwora. Konto to, tiŋi pɛ n pa debam, se kotu taa nii dé baŋa ne, nenɛɛne teene dedwonna dem na jege pwa tei to.”#Nia Gulim 17:14

6Nakwa bam na tage we ba lage pɛ to déem tiini ko daane Samuwel dedɛ. O ma lwoori Wɛ ko ŋwaane. 7Baŋa Wɛ ma leiri o we, “Cheigi nɔɔna bam taane dem, se n sɛ n ke kolo maama ba na tage dede‑m to. Kokuri, ko dae nmo mo ba ve, se ko ye amo mo ba we ba daa vae se a taa ye ba pɛ. 8Ba maŋe ba zege ko dɛ ne mo ba ve amo ye ba daare ba tɔge jwona kwaga, ko zege a na jaane-ba a nwoŋi Ejipti ne to, se ko ba ko yi zem dɛ dem. Ba laam maa wora ba ke nmo ne ba na maŋe ba ke amo de tei to. 9Konto to, za n sɛ ba kwora kam, se n daare n kaane-ba dedɛ se ba lɔre ba pɛ wom na wó toŋe tei ba yera ne to.”

10Samuwel laam ma tole Baŋa Wɛ na tage kolo to maama o bere nɔɔna balo na tu o tei se ba beeri pɛ to, 11ye o we, “Wolo abam na beeri se o di paare á baŋa ne to na wó toŋe kolo á yera ne to mo tento: o lage o fe á bakeiri mo se ba ji o jar-keira. O wó pa ba badwonna taa chwo o jara-keim torokooro, se badaara taa diini sisein-nɔɔna, ye badaara duri torokooro tem yiga ne ba kwɛ chwoŋa kam ba pa‑o. 12O ta lage o kuri á bia bam wone mo se ba taa ye o jar-keira yiga tiina, se badwonna taa nii nɔɔna moro baŋa ne, ye badwonna de taa nii nɔɔna finnu baŋa ne. O ta wó fe á bia bam mo se ba taa toŋe o kare sem ne ba vara ye ba daare ba zage mena. O wó pa ba ke jara zela de torokooro zela dwi maama se o ma kwaare jara. 13Ko ná ye á bukwa bam, o maa wó pa ba taa ke talwoŋ-ywoŋa dwi dwi ba pa‑o. Ba badaara de maa wó saŋe ba pa‑o, se badwonna de taa fɔge bworobworo. 14Pɛ wom lage o vere á kare selo na tiini se lamma to mo, de jei selo á na dugi Vini de Olivi teeni se wone to, se o daare o kwei-se o pa o tontoŋena. 15O ta maa wó jwoŋi á mena de á tio-bia fuga maama wone popɔra dedoa, se o kwei o pa o kwaga nɔɔna de o tontoŋena. 16Ko ta ná ye abam tete tontoŋena, baara de kaana, de á naane, de á bonɛ, o lage o jwoŋi balo maama na lana to mo o taa tei se ba taa toŋe ba pa‑o. 17O ta lage o jwoŋi á vare-mumugu fuga maama wone popɔra dedoa mo. Abam tete de nam wó ji o kabɛ. 18Dɛ dem ná tua ye á jege pɛ, á wó tiini á chwoosi á lwoori Baŋa Wɛ se o woli abam, pɛ wom na bɛɛse abam tei to ŋwaane. Dɛ dem konto ne Baŋa Wɛ nam ba lage o cheigi á taane dem.”

19Nɔɔna bam maa wo sɛ Samuwel kwora kam. Ba ma ta‑o ba we, “De konto maama de, debam ta lage pɛ mo se o taa di paare dé baŋa ne. 20Dé lage se dé taa nye nenɛɛne teene dedwonna dem na ye tei to mo. Dé pɛ wom wó taa nii dé baŋa ne, ye o ta wó tɔge dé yiga se dé yeini dé kwaare jara dwi maama!”

21Samuwel ma cheigi nɔɔna bam ni taane dem maama, ye o de vo o lwoni woŋo maama o bere Baŋa Wɛ. 22Baŋa Wɛ ma leiri o we, “Nam sɛ ba taane dem n daare n tiŋi pɛ n pa-ba.” Samuwel ma sɛ, ye o yage ni o pa Isarele tiina bam se ba maama jwoori ba sam.

Currently Selected:

1 Samuwel 8: KBG

Highlight

Copy

Compare