1 Samuwel 10
10
1Ba na zege da konto to, Samuwel laam ma kwei Olivi nuga kabɔɔ. O ma lwo nuga kam Sɔɔl yuu ne ye o daare o kukwori‑o.#2 Pwa 9:6 O ma ta‑o o we:
“Baŋa Wɛ mo kwɛ nmo tento, ye o tiŋi‑m se n ta‑n ye o nɔɔna Isarele tiina bam yiga tu. [Nmo wó ta‑n nii ba baŋa ne ye n daare n jwoŋi-ba ba dona maama jeŋa ne n yage. Tento nam mo wó bere‑m we Baŋa Wɛ seene o tiŋi‑m se n ta‑n tei o nɔɔna bam:]#10:1 [ ... ] tera Hiburu tɔn-dwoŋo kom ne. 2Zem, nmo ná nwoŋi amo tei ne, ye n ná kɛ n yi Benjamin laŋa siseini dem, Racheli yibeeli dem na wo Zeliza ne to, n wó jeeri baara balei. Banto maa wó ta ba bere‑m we, ba jwoori ba na bonɛ selo n ya na kare n beeri to. Ba ta wó pa n maane we n kwo wom daa ba jege se lwia, se o laam jege lwia mo nmo tete ŋwaane ye o bwei o we, ‘Amo wó ke tɛ mo se a jwoori a na a bu wom?’
3Nmo ná zege dáane ye n vo n yi Tabora tei-zɔŋɔ kom, n ta wó jeeri baara batɔ na maa vei Bɛtel se ba ke kaanem ba pa Wɛ. Ba dedoa wó taa jege bebale setɔ, dedoa maa zei bworobwooru tetɔ, ye batɔ tu wom de jege lɔɔ de ko wo sa-doora bam. 4Ba ná jeeri‑m konto, ba wó ware‑m, ye ba daare ba pa‑m bworobwooru telei. Ko ná ke konto, se n jwoŋi bworobwooru tem ba jeŋa ne.
5N laam ná zege dáane, n wó vo n yi Wɛ zwoŋo kom na wo Gibea seeni to. Dáane mo Filisi tiina jar-keira bam jege tigisim jei. Nmo ná yi teo kom ni, n wó jeeri Wɛ sampwori sedwonna kɔgɔ na zege zwoŋo kom wara-jei sem ne ba maa tua. Ba maa wó taa tae kwanno dwi dwi, ye ba wɔe senyɛ, ba daare ba taa wu wui. Ba maa wó taa via ye ba pworisa. 6Baŋa Wɛ jworo laam wó ba nmo baŋa dedaane dam pa se n de woli ba wone n tɔge n ta‑n pworisa. Konto baŋa ne n lage n leiri mo n ji nɔn-gaa. 7Wo-kenkagela yam konto maama ná seene ya ke nmo yera ne, ko laam ye se n ke kolo maama na wó su n yi to, se Wɛ wora dede‑m.
8Nmo laam ma‑n wó da yiga n vo Giligal, se a laam ba. Amo nam ná tu a jeeri‑m, a laam wó ke zwɛɛm pɛɛra dedaane yazura pɛɛra a ma kaane a pa Wɛ. Nmo jege se n cheigi-ne da yarepɛ mo, se a laam ba a yi‑m Giligal ne. A ná tua, a laam wó bere‑m kolo daa na wora se n ke to.”
Sɔɔl jigi Isarele tiina pɛ
9Sɔɔl déem na pipiri se o kɛ o daare Samuwel to, mo Baŋa Wɛ pɛ o bochare leiri de ji bochare-doore. Dɛ dem konto ne woŋo maama seene ko ke ko maŋe dedaane Samuwel na tage tei to mo. 10Sɔɔl dedaane o tontoŋeno wom na dɛ ba yi Gibea to, mo ba nɛ Wɛ sampwori kɔgɔ na beene se ba jeeri-ba. Wɛ jworo ma ba Sɔɔl baŋa dedaane dam. O ma to ba wone o tɔge o pworisa. 11Nɔɔna balo déem na yei Sɔɔl faŋa to ma na o na ke tei ye o pworisi to, ye ba bwei daane ba we, “Keitaa! Bɛ mo yi Kisi bu wom tento? Sɔɔl de ga tɔge o wo sampwori sem wone mo na?”
12Jei sem konto nɔɔno dedoa ma ta o we, “Se sampwori sento sem, á yei ba kwoa na?” Ko maama na ke tei to déem ma lɛɛre ko ji sinseira we, “Sɔɔl de laam tɔge o wo sampwori sem wone mo na?” 13Sɔɔl na pworisi o ti to, o laam ma bɛ o di zwoŋo baŋa wara-jei sem.
14Sɔɔl kwo choro wodwoŋi déem ma na Sɔɔl de o tontoŋeno wom ye o bwei-ba o we “Abam ya vei yei ne mo?” Sɔɔl ma leiri o we, “Dé ya kare dé beeri bonɛ sem mo. Dé nam na wo nɛ-se to, mo dé vei Samuwel tei.” 15O kwo choro kom ma ta o we, “Nam ta n bere-ne Samuwel na tage kolo dede‑m to.” 16Sɔɔl ta ma leiri o we, “O yɔɔre o ta debam mo we dé kɔ jworo, se ba nɛ bonɛ sem.” Ko daare, Sɔɔl wo sɛ se o ta kolo Samuwel na ŋɔɔne ded‑o paare dim ŋwaane to.
17Samuwel déem ma bwoŋi Isarele tiina bam maama se ba ba Mizipa ba jeeri Baŋa Wɛ yiga ne.#1 Samuwel 7:6 18Ba na lage daane to, o ma ta de-ba o we, “Isarele tiina Baŋa Wɛ wom kwora mo tento: Isarele tiina bam, amo mo jaane abam a nwoŋi Ejipti ne a ba ywo-seeni. Amo ta ma vere abam Ejipti tiina jeŋa ne, ye a jwoŋi abam a yage teene delo maama déem na bɛɛse abam to jeŋa ne. 19Abam Tu Wɛ ye wolo na yeini o vere abam á cham de á yaara maama wone to mo. De konto de, abam ta lɔge Wɛ kwaga ne mo ye á we, á lage pɛ se o taa wo á yiga ne. Konto ŋwaane nam ba-na á tigisi á tete Baŋa Wɛ yiga ne, dwi de dwi, sɔ-yuu de sɔ-yuu.”
20Samuwel laam ma bwoŋi Isarele dwia yam maama se ba nwoŋi dwi de dwi ba zege o yiga ne. Wɛ ma kuri Benjamin dwi dem ba maama wone. 21Samuwel daa ma pa Benjamin dwi dem tutwoni de yi, sɔ-yuu de sɔ-yuu. Wɛ ma kuri Matiri sɔ-yuu kom ba wone. Se ko kweeli to, Kisi bu Sɔɔl mo Wɛ kuri Matiri sɔ-yuu kom wone. Nɔɔna déem ma vo ba beeri‑o ba ga. 22Ba na wo nɛ‑o to, ba ta ma bwei Baŋa Wɛ ba we, “Wonto ná seene o ye nɔɔno wom, o tu ywo-seeni na?” Baŋa Wɛ ma leiri o we, “Véi-na á nii. O seigi o tete mo zela yam wone.”
23Nɔɔna déem ma duri ba vo ba vaŋe‑o ba ja ba nwoŋi pwola. Sɔɔl na tu o zege nɔɔna bam tetare ne to, ba ma na we o zege wagele wagele mo, ye o dedɔrem dwoi nɔɔna bam maama. 24Samuwel laam ma ta de nɔɔna bam maama o we, “Nii-na, nɔɔno wonto mo Baŋa Wɛ kuri o pa abam. Nɔɔn-nɔɔno tera debam maama wone se kotu dwoni de wonto.” Nɔɔna bam maama ma kaase de kwor-dɛa ba we, “Wɛ wó pa dé pɛ wom momwɛ-dɛɛre.”
25Samuwel laam ma lwoni o bere nɔɔna bam se ba lɔre paare dim totoŋ-naga na wó taa ye tei maama to. O ta ma popone tento o ke tɔnɔ wone, ye o kwei-ko o tiŋi Baŋa Wɛ yiga ne#10:25 Baŋa Wɛ yiga ne: Wɛ ni-gwonim dakaa kam teiŋa ne mo konto.. Konto kwaga ne mo o bane nɔɔna bam o pa ba jwoori ba sam. 26Sɔɔl de ma jwoori o vo o sɔŋɔ Gibea ne. Nɔɔna badwonna na ye babɛ to déem ma kwogili‑o ye ba tɔge‑o ba vo. Wɛ déem ya pɛ se banto boboŋa tɔge Sɔɔl mo. 27Nɔn-wo-korro tedwonna ba wo na ba ŋwae to de maa wora, ye ba ŋwaane ba we, “Nɔɔno wonto yi se o jwoŋi debam o yage na?” Ba na gwooni‑o konto to, ba wo sɛ se ba ja pɛɛra ba ba ba pa‑o. Sɔɔl ma chem.
Currently Selected:
1 Samuwel 10: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
