1 Samuwel 7
7
1Kiriaf-Jeerim tiina bam ma seene ba ba ba kwei Baŋa Wɛ ni-gwonim dakaa kam. Ba ma ja-ka ba vo ba zege nɔɔno wodwoŋi sɔŋɔ ne, o yere na ye Abinadaba. O déem zoore peo yuu ne mo. Ba ma kuri wonto bu Eleaza ye ba pwɛ‑o se o taa nii dakaa kam baŋa ne.
Samuwel nii Isarele tiina bam baŋa ne
2Wɛ ni-gwonim dakaa kam déem maŋe Kiriaf-Jeerim ne ka dáane taa, nenɛɛne bena finlei.#1 Tigisim 13:5 Isarele tiina bam maa keeri chekke, ye ba lwoori Baŋa Wɛ se o jwoŋi-ba o yage. 3Samuwel déem ma zaŋe o ta de Isarele tiina kɔgɔ kom maama o we, “Abam ná seene á seene yia mo se á jwoori Baŋa Wɛ tei ne, ko nam ye se á le Asetare jwona yam de jwo-yɔɔro tem maama á tetare ne á dole á yage, se á daare á lwei á wo maama á pa Baŋa Wɛ. Abam ná zuli wonto yerane, o wó jwoŋi abam Filisi tiina bam jeŋa ne o yage.” 4Isarele tiina bam ma seene ba dole Baal dedaane Asetare jwona yalo na wo ba tetare ne to ba yage. Ba laam ma sɛ se ba taa zuli Baŋa Wɛ yerane.
5Samuwel ma toŋe ni o pa Isarele tiina bam se ba maama la ba jeeri Mizipa ne, se o de lwoori Baŋa Wɛ o pa-ba.#Yiga tiina 20:1 6Nɔɔna bam ma seene ba vo ba jeeri Mizipa ne. Ba na gilimi ba ti to, ba ma mɔ na ba lwo tega ne ba pa Baŋa Wɛ. Dɛ dem konto maama ne, ba ya vɔge ba nia mo ye ba we, “Dé seene dé ke lwarem dé chɔge Baŋa Wɛ yiga.” Isarele tiina bam déem na wo Mizipa ne konto to, Samuwel mo tu o ji ba yiga tu.#1 Samuwel 10:17
7Filisi tiina bam déem ma ni we Isarele tiina bam jeeri daane Mizipa ne. Ba dedɛɛra banu bam ma la ba jar-keira bam ba ke daane se ba vo ba kwaare jara de Isarele tiina bam. Isarele tiina bam na nigi ko ŋwa to, mo foone tiini de zo-ba. 8Ba ma ta de Samuwel ba we, “Fɔge n ta‑n lwoori dé Tu Baŋa Wɛ! Ta ja o teiŋa debam ŋwaane, se o jwoŋi debam Filisi tiina bam jeŋa ne o yage.” 9Samuwel ma kwei pi-choa o go o zwɛ ka maama puna o ma o kaane o pa Baŋa Wɛ. O laam ma kaase o lwoori Baŋa Wɛ Isarele tiina bam ŋwaane. Baŋa Wɛ de ma sɛ o wɛ-lworo kom.
10Samuwel ta na wora o ke kaanem dem o pa Baŋa Wɛ to, mo Filisi tiina bam fɔɔre ba twɛ se ba ja jara yam ba yi Isarele tiina bam. Ba ma yi da de Baŋa Wɛ zege wɛyuu ne o pa se doa tiini ka bage-ba pina-pina! Foone ma tiini de ja Filisi tiina bam, pa se ba duri Isarele tiina bam yiga ne ba jage jei maama ne! 11Isarele tiina bam ma da ko ŋwaane ba zege Mizipa ne, ba pare Filisi tiina bam taa, ba vo ba yi Bɛte-Kara kuri seeni. Ba maa jege-ba ba goe konto ye ba via.
12Samuwel ma kwei kandwɛ-kamunu o chwi-de Mizipa dedaane Sɛn tetare laŋa ne. O ma pa kandwɛ dem yere we, ‘Ebeneza’#7:12 Ebeneza kuri mo ye Zeinim kandwɛ., ye o ta o we, “Se ko ba ko yi tento maama to, Baŋa Wɛ mo zeini debam.” 13Ko dɛ konto baŋa ne mo, ye Isarele tiina bam wane Filisi tiina bam. Baŋa Wɛ déem ma che-ba, pa se ba daa wo lɛɛne Isarele laŋa kam ne.
Samuwel ta na ŋwe to, Baŋa Wɛ déem lɔge Filisi tiina bam kwaga ne mo. 14Isarele tiina bam ma jwoori ba jwoŋi teene delo maama na wo Ekoron dedaane Gafa laŋa ne ye Filisi tiina bam ya vere-de ba tei ne to. Isarele tiina bam déem jwoori ba na ba tega kam ni maama mo. Yazura déem maa wora Isarele tiina bam dedaane Amori tiina bam laŋa ne.
15Samuwel déem nii Isarele tiina bam baŋa ne taa, ko vo ko yi o toone mo. 16Bene maama ne, o déem yeini o vei o kare teene dento mo: Bɛtel, de Giligal, dedaane Mizipa. Jei sento maama ne mo o yeini o kwɛ nɔɔna bam taana o pa-ba. 17O nam ná yeini o ti, o daa yeini o jwoori Rama mo o vo o jeini o tete sɔŋɔ ne. O na wora to, o ta ma nii Isarele tiina bam baŋa ne. O déem ma lɔ kaanem bimbini Rama ne o pa Baŋa Wɛ.
Currently Selected:
1 Samuwel 7: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
