1 Samuwel 6
6
Wɛ ni-gwonim dakaa kam jwoori Isarele teo
1Filisi tiina bam na vere Wɛ ni-gwonim dakaa kam Isarele tiina bam jeŋa ne to, ka déem maŋe ba tei ne chane serepɛ mo. 2Ba ma bwoŋi ba kaanem tiina de ba yi-nara, ye ba bwei-ba ba we, “Dé wó ke Baŋa Wɛ ni-gwonim dakaa kam tetɛ mo? Dé wó tɔge chwoŋa kɔ mo dé toŋe-ka se ka jwoori ka vo ka jeiga?” 3Ba ma leiri ba we, “Abam ná lage á toŋe Isarele tiina Wɛ dem dakaa kam se ka jwoori ka na nwoŋi mɛ to, ko nam ye se á toŋe-ka dedaane pɛɛre mo. Ko dae se dakaa kam jwoori ka vo bwori. Pɛɛre dem konto mo á lage á ma‑á ywoori ba wɛ dem, se de yage á wɛleere dem jene de ma chɛ abam. Konto mo wó pa se á jwoori á na yazura ye á daare á lɔre kolo ŋwaane o na tiini o pa ko zo á yera to.”
4Filisi tiina bam daa ma bwei ba we, “Pɛɛre dwi dɔ mo de nam wó toŋe se dé ma dé ywoori ba Wɛ dem?”
Ba daa ta ma leiri ba we:
“Jawe-chɛɔ kom na to á pwa banu bam de ba teene denu dem maama baŋa ne to, ko jege se á kwei sabu-seŋa mo, á ma á mɔ kasili-nabiina yanu dedaane baywoa yanu kamwaro, 5se te taa nye nenɛɛne telo na jege á teene dem te chɔge to. Konto mo á wó pa Isarele tiina Wɛ dem jwoŋi zula. Dɛ delo, abam ná ke konto, o wó jwoori o dɔne o je-dɛa abam baŋa ne, de á jwona yam, dedaane á tega kam maama baŋa ne, se á daa yé na cham. 6Bɛ mo ye á boŋe se á bochara ke dam yerane, nenɛɛne Ejipti tiina bam de ba Pa-faro wom de déem na ke tei to? Yé swei-na we Baŋa Wɛ ke kolo o boboŋa na lage to o yage ba baŋa ne, pa se ba ga ga ba yage Isarele tiina bam chwoŋa se ba jwoori ba tete teo. 7Konto to, kwei-na dɛ á ke toroko-doŋo. Laam beeri-na naane delei na loga, ye ba ta wo kwei-de se ba ma toŋe to. Ja-na naane dem á lei de toroko kom se de taa vaŋe-ko, se á daare á pwɛ nwa balo naane dem na loge to á pe. 8Laam kwei-na Baŋa Wɛ ni-gwonim dakaa kam á daŋe toroko kom baŋa ne. Ta beeri-na dakaa kadwoŋi, á ke sabu-seŋa wonnu telo á na mɔɔne se á ma á ywoori‑o to ka wone, se á daare á zege-ka Wɛ ni-gwonim dakaa kam takeiri ne. Abam ná ke konto á ti, se á laam kale naane dem á yage chwoŋa ne se de taa vaŋe toroko kom de via, 9ye á fɔge á nii. Naane dem ná lɛɛne debam siseini dem ye de kwei Bɛte-Semesa chwoŋa kam de maa kɛa, dé wó lɔre we ko ye Isarele tiina Wɛ dem mo seene o toŋe chanɛɛre dento o yage debam yera ne. Se naane dem ná tɔge chwo-gaa, dé wó lɔre we ko ke ko maŋe daane mo, se ko dae wo-lɔŋɔ.”
10Filisi tiina bam ma seene ba ke konto. Ba déem beeri naane delei delo na loge to mo ba lei toroko yera ne. Ko daare ye ba pe de nwa bam sɔŋɔ ne. 11Ba ma kwei Baŋa Wɛ ni-gwonim dakaa kam ba daŋe toroko kom baŋa ne, ye ba daare ba zege dakaa kalo sabu-seŋa baywoa de kasili-nabiina kamwaro tem na wo ka wone to ba ke da. 12Naane dem ma yɔɔre de kwei Bɛte-Semesa chwoŋa kam de maa kɛa. De yɔɔre de mage de yuu chwoŋa kam konto ne mo, ye de keeri de via. De daa wo ywori se de vo jazem seeni naa jagwia seeni. Filisi tiina dedɛɛra banu bam ma tɔge de kwaga ba vo ba yi Bɛte-Semesa ni ne.
13Bɛte-Semesa tiina bam déem ya wo ba bwollu tem ne mo ba gwei banina#6:13 banina = wheat. Ba ma kwoni ba yuni ba nii, ye ba na Wɛ ni-gwonim dakaa kam. Ko ma pa se ba wo tiini ko pwoli dedɛ. 14Toroko kom dɛ konto mo taa ko vo ko yi nɔɔno dedoa kara ko zege da, peo kamunu kodwoŋi teiŋa ne. Nɔɔno wom yere mo Josua. O maa ye Bɛte-Semesa tu. Nɔɔna bam ma yɔɔre ba lɔ toroko kom dɛ sem ba ma dwei mini. Ba ma daare ba go naane dem ba zwɛ ba ma ba ke kaanem ba pa Baŋa Wɛ. 15Levi dwi tiina bam déem ya gɔge Baŋa Wɛ dakaa kam toroko kom baŋa ne ba ja tu tega. Ba ta ma kwei dakaa kalo sabu-seŋa kamwaro tem na wo ka wone to ba woli da. Ba ma zege tento maama peo kamunu kom baŋa ne. Dɛ dem konto ne Bɛte-Semesa tiina bam ma ke zwɛɛm pɛɛra de pɛɛra yadwonna ba kaane ba pa Baŋa Wɛ. 16Filisi tiina dedɛɛra banu bam déem zege mo ba nii totoŋa yam konto maama. Ba laam ma jwoori ba vo Ekoron dɛ dem konto ne.
17Sabu-seŋa kasili-nabiina kamwaro tenu tem déem zege te pae teene dento mo: Asedodi, de Gaza, de Asekelon, de Gafa, dedaane Ekoron. Filisi tiina bam déem kwei tento mo se ba ma ba ywoori Baŋa Wɛ ba wɛleere dem ŋwaane. 18Ba sabu-seŋa baywoa yanu yam de maa zege ya pae teene denu delo dedɛɛra bam na nii de baŋa ne to. De maa ye te-fwaaro delo na lɔge de pe de dam to, ko woli de te-balwa bam na wo chege to. Peo kamunu kolo baŋa ne ba na zege Baŋa Wɛ ni-gwonim dakaa kam to daa ta wo Bɛte-Semesa tu Josua bwolo kom ne de zem maama mo, se ko taa ye maana de kolo na ke da to.
19Ko daare, Baŋa Wɛ déem ma go Bɛte-Semesa tiina bam nɔɔna fuserepɛ, ba na leesi ba nii Wɛ ni-gwonim dakaa kam wone to ŋwaane. Teo kom nɔɔna bam ma keeri dedɛ, de Baŋa Wɛ na toŋe tei ba yera ne to. 20Bɛte-Semesa tiina bam ma bwei daane ba we, “Debam wone wɔ mo wó wane Baŋa Wɛ wom yiga ne o zege? O tiini o ye wose mo. Dé wó pa se o dakaa kam zege ywo ka vo nɔɔno wɔ tei ne mo?”
21Ba ma toŋe kwora Kiriaf-Jeerim tiina tei ne ba we, “Filisi tiina bam jaane Baŋa Wɛ ni-gwonim dakaa kam ba jwoori ba ba ba yage ywo-seeni mo. Konto to, ba-na á kwei-ka á ja á vo á tei.”
Currently Selected:
1 Samuwel 6: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
