1 Samuwel 5
5
Wɛ ni-gwonim dakaa kam
1Filisi tiina bam déem na jaane Wɛ ni-gwonim dakaa kam ba vere Isarele tiina bam jeŋa ne konto to, ba déem zege Ebeneza ne ba ja-ka ba vo ba teo kolo yere na ye Asedodi to mo. 2Ba ma ja-ka ba zo ba jwo-dɛɛre diga kam ye ba daare ba zege-ka jwoni dem kamɔgɔ kom teiŋa ne. Jwoni dem yere mo ye Dagon. 3Tega na poore to, Asedodi tiina bam ma zaŋe ba vo ba zo diga kam. Ba ma na we Dagon to o yibia baŋa ne Baŋa Wɛ ni-gwonim dakaa kam yiga ne. Ba déem ma jwoori ba gɔ-de ba chwi de zega jei sem ne.#Yiga tiina 16:23 4Tega daa na poore to, mo ba nɛ we jwoni dem daa ta to Baŋa Wɛ ni-gwonim dakaa kam yiga ne. Jwoni dem yuu dedaane de jataala maama bwori mo te tigi diga kam ni ne dáa dáa. De yera yam yerane mo daare. 5Konto mo pɛ se, dedaane zem maama, balo maama na yeini ba zo Dagon diga kam ne to ba sɛ se ba nɔne diga kam ni dem jei sem ba kɛ, ko ná maŋe ko ye balo na tu se ba kaane Dagon to de.
6 Baŋa Wɛ ma pa ko tiini ko zo Asedodi tiina bam yera. Ko ma ni balo na zoore jei sem konto maama ne to ye foone zo-ba. O ma pa se kasili-nabiina ŋone ba yera ne. 7Asedodi tiina bam na maane kolo na jege ko ke to, ba ma laare ba we, “Ko ye Isarele tiina Wɛ dem mo wora o waare debam, dedaane dé wɛ Dagon. Dé yé pa se wonto ni-gwonim dakaa kam maŋe debam tei ne ywo.” 8Ba ma la Filisi tiina dedɛɛra bam ba ke daane se ba jeini ba bane. Ba ma bwei-ba ba we, “Dé laam nam wó ke tɛ mo dedaane Isarele tiina wɛ dem dakaa kam?” Ba ma bwɛ ba ja ye ba we, “Pa-na se nɔɔna kwei-ka ba ja vo Gafa.”#5:8 Gafa déem ye Filisi tiina teo kodwoŋi mo. Ba ma seene ba ja-ka ba vo ba yi da.
9Wɛ ni-gwonim dakaa kam na yɔɔre ka yi Gafa ka zege da to, mo Baŋa Wɛ pɛ se ko tiini ko zo teo kom konto tiina bam de yera. Vuvuga ma to teo kom jei maama ne. O ma de kasili-nabiina ba yera ne, nɔn-kweero dedaane bu-balwa maama. 10Ba daa ma pa Wɛ ni-gwonim dakaa kam vo Ekoron.#5:10 Ekoron déem ye Filisi tiina teo kodwoŋi mo.
Ba na jaane-ka ba yi teo kom wo to, mo Ekoron tiina bam chwoosi ba yage ba we, “Ba jege Isarele tiina wɛ dem dakaa kam mo ba beene ywo! Nii ba na lage ba go debam de dé dwi dem maama tei!” 11Ba ma toŋe ba la Filisi dedɛɛra bam ba ke daane, ye ba ta ba we, “Toŋe-na Isarele tiina wɛ dem dakaa kam se ka jwoori ka na nwoŋi mɛ to. Se ko ná dae konto, ka wó wane ka go debam dedaane dé dwi dem maama ka ti.” Vuvuga ma to teo kom maama ne, ba na kɔre toone to ŋwaane. Baŋa Wɛ ma pa se ko tiini ko zo ba yera. 12Balo na wo tege to, kasili-nabiina mo ŋone ba yera ne. Nɔɔna bam déem maa kaase bɔge-bɔge.
Currently Selected:
1 Samuwel 5: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
