1 Samuwel 4
4
1Samuwel de déem ma lwoni Baŋa Wɛ kwora pa ka yi Isarele tiina bam maama.
Filisi tiina vere Wɛ ni-gwonim dakaa kam
Isarele tiina bam déem ma nwoŋi se ba vo ba kwaare jara de Filisi tiina bam. Ba ma vo ba tei ba vwoa Ebeneza seeni, ye Filisi tiina bam vo ba tei ba vwoa Afeka seeni. 2Filisi tiina bam ma ke ba tete daane se ba ja jara yam. Ba ma vo ba yi Isarele tiina bam de jara. Ba ma wane Isarele tiina bam ye ba go ba jar-keira morro tena (4,000). 3Isarele tiina jar-keira balo na daare to ma zege jara kapworo ne ba jwoori ba ya na tigisi daane mɛ seeni to. Ba nakwa bam ma bwei daane ba we, “Bɛ mo ke ye Baŋa Wɛ pa se Filisi tiina bam wane debam zem konto?” Ba ta maa we, “Pa-na se dé toŋe nɔɔna se ba vo Siloo ba ja Wɛ ni-gwonim dakaa kam ba ba ywo-seeni. Konto wó pa se Baŋa Wɛ taa wo dé tei ne, ye o jwoŋi debam o yage dé dona bam jeŋa ne.”#Josua 6:1-20
4Ba ma toŋe nɔɔna Siloo ne, se ba vo ba ja Wɛ ni-gwonim dakaa kam ba ja ba ba ba tei ne. Ka maa ye jeiga kalo Paŋwa Tu Baŋa Wɛ na di paare cherubi sem tetare laŋa ne to mo. Eli bia balei, Hofini dedaane Finehase mo déem dɛ ba zeŋe dakaa kam ba ja ba ba.
5Ba na jaane Wɛ ni-gwonim dakaa kam ba yi ba tigisim dem jei ye Isarele tiina bam na-ka to, mo ba déem tiini ba chwoosi wɛ-wɛ pa se tega kam maama ziziŋi. 6Filisi tiina bam ma ni sɔɔ kom. Ba ma bwei daane ba we, “Sɔɔ konto na zaŋe Hiburu tiina bam vwoa yam ne to kuri mo bɛ?” Ba ma maane we ko ye Wɛ ni-gwonim dakaa kam mo tu ka yi Isarele tiina bam na tigisi daane mɛ to. 7Ko ma pa se foone tiini de zo Filisi tiina bam. Ba maa tɛ ba we, “Cham nam yi debam na! Ba wa yam mo tu ya zo ba tetare ne konto! Dé ta wo nɛ konto woŋo dwoŋi! 8Lɛɛro yi debam! Wɔ mo wó wane o jwoŋi debam o yage wa-dɛɛra yanto jeŋa ne? Ko ye wa yam konto mo déem pɛ se chanɛɛre dwi dwi ja Ejipti tiina bam kagoa kam ne ya go. 9Filisi tiina bam, á pa-na dé di baare! Ke-na jara yam ne babɛ tei! Ko ná dae konto, dé lage dé ji Hiburu tiina bam kabɛ mo, nenɛɛne banto de déem na ye debam kabɛ tei to. Konto to, jaŋe-na de baare!”
10Filisi tiina bam déem ma ke jara yam de ba dam maama. Ba ma wane Isarele tiina bam. Isarele tiina bam ma duri ba jwoori ba sam ne. Isarele tiina balo na tege de dɛ dem ne to kɔgɔ déem tiini ko gaale dedɛ, nenɛɛne jar-keira morro fintɔ (30,000). 11Filisi tiina bam ma vere Wɛ ni-gwonim dakaa kam, ye ba daare ba go Eli bia balei bam, Hofini dedaane Finehase.
Eli toone
12Dento dɛ dem ne mo Benjamin dwi tu dedoa zege jara kapworo kom ne o duri o vo o yi Siloo. Nɔɔno wom ya kaare o gwaaro, ye kasolo taare o yuu maama, o wo na chɔge to ŋwaane.#Josua 7:6 13Eli boboŋa maama déem nam ya duri ya da Wɛ ni-gwonim dakaa kam kwaga mo, se o lɔre kolo na kea ka baŋa ne to. O ma vo o jei chwoŋa ni ne, se o cheigi o ni jara-keim dem taane. Nɔɔno wom ma ba o zo teo kom wo o ta jara yam laŋa ya na vei tei to. Ba na nigi to, teo kom tiina bam maama maa chwoosa ba yaga bɔge-bɔge.
14Eli na nigi sɔɔ kom ŋwa to, mo o bwei o we, “Bɛ mo ke ye ba chwoosa konto?” Nɔɔno wom ma ke lela o vo o yi Eli tei o ta o bere‑o kolo na ke to. 15Eli bena déem laam ya ye funogo-nana (98) mo, ye o yia yam dwei. 16Nɔɔno wom ma ta o we, “Amo nwoŋi jara kapworo kom ne mo a ma a yi tento. Zem mo a zege dáane a duri a ba.” Eli ma bwei‑o o we, “Amo bu, bɛ mo ke da?” 17Nɔɔno wom ma leiri o we, “Ko ye lɛɛro mo dé nɛa. Isarele jar-keira bam duri Filisi tiina bam yiga ne se ba lu. Ba kɔgɔ dedɛ mo tega. Nmo de bia bam Hofini dedaane Finehase de tɔge ba te mo. Filisi tiina bam ta ma vere Wɛ ni-gwonim dakaa kam ba ja ba viiri!”
18Nɔɔno wom na yɔɔre o ta kolo na ke Wɛ ni-gwonim dakaa kam yera ne to, mo Eli yale o to o kwaga ne. O déem jei teo kom manchwo-peena ni ne mo, ye o to tega ne konto. O na yale o to o kolɔ-bea baŋa ne to, mo o ba bwori pa se o te. Kokuri to, o déem kwe mo dedɛ, ye o ta tiini o nu o gaale. Eli déem ya nii Isarele tiina bam baŋa ne bena finna mo.
19Eli bu Finehase kaane wom déem jege puga mo, ye ka be ka ti se o lo. O de ma ni we ba vere Wɛ ni-gwonim dakaa kam ba ja ba viiri, ye o baro wom dedaane o baro kwo wom maama tega. O na nigi to, mo o puga dɛ ka virigi ka lage lora. O maa wo wane o wori. 20O na lage o te o lora kam baŋa ne to, kaana balo na lwori‑o se o lo to ma ta ded‑o ba we, “Nam vɔ wo, se n loge bakeira mo.” O maa wo leiri kolokolo.
21Kaane wom déem ma pa o bu wom yere mo we, ‘Ikaboda’, ye o ta yere dem kuri o we, “Baŋa Wɛ nenɔŋ-fɔrɔ kom jei Isarele tiina bam tei ne!” Ko déem ye Filisi tiina bam na vere Wɛ ni-gwonim dakaa kam to ŋwaane, de o baro dedaane o baro kwo wom maama de na tege to ŋwaane mo o tage konto. 22O ma ta o we, “Baŋa Wɛ nenɔŋ-fɔrɔ kom nwoŋi ko daare Isarele teo kom, ba na vere Wɛ ni-gwonim dakaa kam ba ja ba viiri to ŋwaane.”
Currently Selected:
1 Samuwel 4: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
