1 Samuwel 28

1Ko na wora ko wora to, mo Filisi tiina bam déem lage ba jar-keira ba ke daane se ba kwaare jara dedaane Isarele tiina bam. Akisi ma ta de David o we, “Ko jege se n ta‑n yei we, nmo de n nɔɔna bam wó woli amo kɔgɔ kom wone mo, se dé vo dé ke jara yam.” 2David ma leiri‑o o we, “Dáane mo nmo wó wane n lɔre a na wó toŋe tei a pa‑m to.” Akisi ma leiri‑o o we, “Nmo na sɛ amo konto to, amo wó pa se n ta‑n yere-ne taa wuu.”

Sɔɔl vei o vo chichiri voro

3Samuwel déem nam ya maŋe o te, ye Isarele tiina bam maama di o lua. Ba ma daare ba kwei‑o ba suli o tete teo Rama ne. Sɔɔl nam lwoori yiga mo o zeili chichiri vora de yi-nara maama Isarele tega kam ne.#Nia Gulim 18:10-14

4Filisi jar-keira bam ma vo Sunem ba gilimi daane. Sɔɔl ma bwoŋi Isarele tiina bam o ke daane pa se ba jeeri Giliboa ne. 5Sɔɔl na yɔɔre o dole o yi o na Filisi jar-keira bam to, mo foone zo‑o, o bochare de ma di kwaa. 6O ma kwaane o bwei Baŋa Wɛ se o nii o na wó ke kolo to. Baŋa Wɛ nam wo sɛ o leiri‑o. Ko ná ye dendwea, naa Yurim de Tumim kandwa yam, naa sampwori, Baŋa Wɛ wo tɔge se baŋa ne o pa‑o leira de fenfee de. 7Sɔɔl laam ma ta de o nakwa bam o we, “Véi-na á beeri kaane wolo na wae o bwei chira se o lɔre kolo na wora to á pa-ne. Ko jege se a vo kotu tei ne mo a nii a yiga.” O nakwa bam ma ta‑o ba we, “Kaane wodwoŋi mo wo Endora ne, o na nae chekke.”

8Sɔɔl laam ma zaŋe tete ne o kwei gwaaro telo na dae o nyem to o zo. O na leini o tete konto to, o ma tɔge dedaane o nɔɔna balei ye ba nwoŋi se ba vo kaane wom tei. Ba na yi da to, Sɔɔl ma ta de kaane wom o we, “Kwei n voro zela yam se n bwoŋi chiru wodwoŋi n pa-ne. Pa chiru wolo a na wó bwoŋi o yere to nwoŋi o ba amo tei.”#Izaya 8:19

9Kaane wom ma leiri o we, “Nmo nam yei Sɔɔl na ke kolo ye o zeili chichiri vora de yi-nara maama pa se ba nwoŋi Isarele tega ne to. Bɛ mo ye n lage n kwei kalanchogo n ma n ja amo? Nmo laam ma n lage se ba go amo de!” 10Sɔɔl ma ta o du o we, “Amo dugi de Ŋwea Tu Baŋa Wɛ yere we, n ná toŋe a totoŋe dem n pa-ne, n bá‑n na waarem ko ŋwaane.” 11Kaane wom ma bwei‑o o we, “Wɔ mo n lage se a bwoŋi se o nwoŋi o ba?” Sɔɔl ma leiri o we, “Bwoŋi Samuwel chiru n pa-ne.”

12Kaane wom na yɔɔre o na Samuwel to, mo o laare cheppe! O ma pipiri o ta de Sɔɔl o we, “Bɛ mo ke ye n gane-ne konto? Nmo mo ye Pɛ Sɔɔl!” 13Sɔɔl ma leiri‑o o we, “Yé ta‑n fona, za n ta kolo n na nɛ to n bere-ne.” Kaane wom ma ta o we, “A nɛ chiru mo na nwoŋi tega ne, ye o zaŋe o beene.” 14Pɛ wom ma bwei o we, “O nyenyego ye tetɛ mo?” Kaane wom ma leiri o we, “O ye nɔn-kwea mo na beene ye o zo gare-dedɔrɔ.”

Sɔɔl ma maane we ko seene ko ye Samuwel mo. O ma vwi o yibia tega ne se o pa‑o zula. 15Samuwel ma bwei Sɔɔl o we, “Bɛ mo ke ye n daane-ne konto? N jaane-ne n jwoori n ba ywo-seeni se a ke bɛ mo?” Sɔɔl ma ta o we, “A wo mo dia, ye a yeiri a na wó ke kolo to. Kokuri to, Filisi tiina bam jeeri-ne mo de jara. Baŋa Wɛ nam lɔge amo kwaga ne mo. O daa ba tɔge sampwori baŋa ne, naa dendwea baŋa ne se o leiri-ne. Konto ŋwaane nam mo tei a bwoŋi‑m se a lɔre a na wó ke tei to.”

16Samuwel ma ta o we, “Baŋa Wɛ nam na lɔge nmo kwaga ne pa se o ji n dono to, bɛ mo ye n daa‑n bwoŋi-ne se n bwei n nii n na wó ke tei? 17Baŋa Wɛ na ke kolo de nmo to ye kolo a na wuuri a ta a bere‑m to mo. O jwoŋi paare dem nmo jeŋa ne mo, ye o kwei-de o pa n dwoŋi. David mo konto! 18Kokuri to, Baŋa Wɛ déem pɛ‑m ni se n chɔge Amaleki tiina bam de ba wonnu tem maama, o bane na zaŋe de-ba to ŋwaane. Nmo nam wo sɛ n ke o ni dem konto chekke.#1 Samuwel 15:9 Konto nam mo pɛ se Baŋa Wɛ zem ke‑m tento. 19Ko na wó ke tei to, Baŋa Wɛ lage o kwei nmo de Isarele tiina bam o ke Filisi tiina bam jeŋa ne mo. Jwa dɛ dem ne, nmo de n bia bam de wó te ye á ba churu ywo-seeni á woli amo wone. Ko ná ye Isarele jar-keira bam maama, Baŋa Wɛ wó ke-ba Filisi tiina bam jeŋa ne mo.”

20Sɔɔl na nigi taane dem konto maama to, mo o to tega ne o tigi da konto yirr. Samuwel taane dem ma tiini de pa foone zo‑o. O yera maa bwomma, o na wo di wodiu dɛ dem konto ne wea de tete maama to ŋwaane. 21Kaane wom ma fɔɔre o yi Sɔɔl yera, ye o maane we o bochare tiini de fwei. O ma ta‑o o we, “Ja, amo tu! Amo na sɛ nmo ni to, a yɔɔre a ve a ŋwea mo, ye a ke nmo na lage tei to a pa‑m. 22Konto to, a lwoori‑m mo se n sɛ amo na wó ta kolo to. Yage se a ke wodiu fee se n di. Konto wó pa n na dam se n wane n jwoori n viiri.”

23Sɔɔl ma ve ye o we, “Amo bá di wodiu.” O nɔɔna bam ma tɔge de kaane wom ba lwoori‑o. O laam ma sɛ. O ma kwaane o zaŋe wɛɛne, ye o daare o jeini gadwogo baŋa ne. 24Kaane wom ya jege na-paale o sɔŋɔ ne o na jege-de o kɔne to. Sento nɛ sem ni ne o ma ja-de o go. O ta ma kwei muni o ma fɔge bworobworo kolo na ba jege sabɔle ko wone to. 25O na ti wodiu kom yiga to, o ma kwei-ko o pa Sɔɔl dedaane o nɔɔna bam. Ba ma di ye ba daare ba gwoni tega ba zaŋe ba viiri.

Currently Selected:

1 Samuwel 28: KBG

Highlight

Copy

Compare