1 Samuwel 26

David daa ta yage Sɔɔl o pa o lu

1Ziifi tiina badwonna déem ma zaŋe ba vo Gibea ye ba ta de Sɔɔl ba we, “David tu o seigi Hakila peo kom yuu ne, jei selo na jeeri Jesimon kagoa kam ne to mo.”

2Sɔɔl na nigi konto to, o ma la Isarele tiina jar-keira morro tetɔ balo na yei jara laŋa chekke to, ye ba vo Zifi kagoa kam se ba beeri David jei. 3Ba na yi chwoŋa kalo na wo Hakila peo kom teiŋa ne to ba ma zege ba chwi ba vwoa jei selo na jeeri Jesimon to ne. David ma maŋe kagoa kam wone. O ma ba o ni we Sɔɔl tu se o beeri o jei. 4O ma toŋe nɔɔna se ba ŋɔ ba nii Sɔɔl na wo mɛ to, ye ba lɔre we o seene o yi kagoa kam seeni.

5David na lɔre to, o laam ma zaŋe o vo o yi mɛ Sɔɔl de o nɔɔna bam na tigi to. O ma maane Sɔɔl de o jar-keira yiga tu Abenera na tigi mɛ chekke to. Abenera maa ye Nera bu. Sɔɔl maa tigi o dɔa ye jar-keira bam maama laam maa gilimi‑o ba ke tetare ne. 6Hiti tu Ahimeleka dedaane Joaba nyaane Abisayi mo zege David tei ne. Abisayi nu maa ye Zeruya. David ma bwei-ba o we, “Abam wɔ mo wó tɔge de amo, se dé vo dé yi Sɔɔl de o nɔɔna bam na tigi mɛ to?” Abisayi ma leiri o we, “Amo wó tɔge‑m se dé vo.”

7Dɛ dem konto tete ne David dedaane Abisayi ma lɔɔre ba vo Sɔɔl de o jar-keira bam tiga jei sem. Ba na yi da to, dedaane Sɔɔl tigi o jar-keira bam tetare ne mo o dɔa. O chichwei ma moore tega ne de maŋe de o yuu kom seeni. Abenera dedaane jar-keira bam maama maa gilimi‑o ba ke tetare ne, ye ba de dɔa. 8Abisayi ma ta de David o we, “Nii Baŋa Wɛ zem na kwei n dono wom o ke n jeŋa ne tei! Nmo ná sɛ, amo wó vaŋe o chichwei dem mo a le a jwoori a zɔ‑o a moore a yage tega ne. A maa wó zɔ‑o bedwe mo ye o te, a bá zɔ belei.”

9David ma leiri‑o o we, “Yé ke zonne o yera ne! Nɔɔno ná mage pɛ wolo Baŋa Wɛ na kuri to, kotu tusim wó taa wo o yuu ne. 10Ŋwea Tu Baŋa Wɛ yere ŋwaane, wonto mo wó mage Sɔɔl o go. Wɛ wae o pae se o toa o tete toone, naa o te jara-keim baŋa ne. 11Baŋa Wɛ nam wó che amo se a ma a jeŋa a go wolo Baŋa Wɛ swolim nuga na wo o yuu ne to. Nam pa se dé kwei o chichwei dem, de na moore o yuu seeni to, dedaane o na-kunkwolo kom dé ja dé viiri.” 12David ma gɔ Sɔɔl chichwei dem ye o daare o kwei o na-kunkwolo kom te na zege te maŋe o yuu seeni to, ye ba kɛ. Nɔɔn-nɔɔno nam wo nɛ-ba. Nɔɔn-nɔɔno de wo lɔre kolo na ke to. Ba maama maa tigi ba dɔa ye ba wo zaŋe, Baŋa Wɛ na pɛ ba tiini ba dɔ ba lusi to ŋwaane.

13David dedaane Abisayi ma jwoori ba tɔge bwolo kom ba bɛ daa kadwoŋi kam ne. Ba ma vo ba di peo kodwoŋi yuu ba zege da, ye pwola daga banto de Sɔɔl nɔɔna bam tetare laŋa ne. 14David laam ma nii Sɔɔl jar-keira bam seeni ye o tɔɔle o bwoŋi Abenera o we, “Abenera, nmo wora na? Zaŋe n leiri-ne!” Abenera de ma tɔɔle o leiri o we, “Nmo ye wɔ mo ye n ke sɔɔ konto n bwoŋi pɛ wom?” 15David ma jwoori o leiri‑o o we, “Abenera, nmo dae babea n dwoi Isarele jar-keira bam maama mo na? Bɛ mo ke ye n ware n pɛ wom se n ta‑n yera? Ba ya tu mo se ba go n tu wom. 16Nmo na ke tei tento to ba lana. Ŋwea Tu Baŋa Wɛ yere ŋwaane, nmo dedaane n kwaga nɔɔna bam maama maŋe se á te mo, kolo ŋwaane á wo fɔge á yere a tu wom Baŋa Wɛ na kuri to. Laam nam fɔge-na á nii! Pɛ wom chichwei dem ya na wo o yuu seeni to wo yei ne mo? Se o na-kunkwolo kom de bɛ?”

17Sɔɔl ma lɔre David kwora kam ye o bwei‑o o we, “Amo bu David, nmo mo konto na?” David ma leiri‑o o we, “Pɛ, amo mo konto.” 18O ta ma ta o we, “Amo na ye n tontoŋeno to, bɛ laam nam mo ke pa se nmo yɔɔre n pare amo konto se n zeili n ja? A ke bɛ mo a tusi? 19Amo tu, a lwoori‑m mo se n cheigi a taane dento. Ko ya ná ye Baŋa Wɛ mo na pɛ se n pare amo tento, a teene we o wó jwoŋi pɛɛre a jeŋa ne ye o leiri o boboŋa yam. Se ko ná ye nabiina mo kwei amo yuu ba mage de nmo nyem, Baŋa Wɛ wó pa se ba na lɛɛro. Kokuri to, ba fe-ne ba le a nabaara tega kam ne, Baŋa Wɛ na pɛ se ka taa ye amo nyem to, ye ba daare ba pa se a kare a zoore jwo-kaana teene ne. Ba laam maa we, a taa kaane jwona. 20Nam yé pa se a jana lu ka ke sa-teena tega ne, yiga yiga dedaane tega kalo na ye Baŋa Wɛ nyem to. Amo bere a ye wɔ mo? Yeenu dento, mo Isarele tiina pɛ tɔge-ne o para? Naa a ye luga mo ye n jege-ne n choa peero tem ne?”

21Sɔɔl ma ta David o we, “Amo bu David, jwoori n ba amo tei! Amo mo ke lwarem. Amo nam daa ba boŋe se a ke‑m zonne. Kokuri to, n zem bere we a jege lonne nmo yibia ne, ye n wo go-ne. Chega to, amo toŋe jworim. A tiini a tusi mo.” 22David daa ta maa we, “Pɛ, nii n chichwei dem mo tento. Toŋe n nɔn-donno tem dedoa se o ba o jwoŋi o ja o ba o pa‑m. 23Baŋa Wɛ mo yeini o bore o pa nɔɔno maama de o na jege chega de wo-dedoa tei to. Baŋa Wɛ ya pɛ-ne pwola se a go‑m zem, ye a wo ke konto, nmo na ye pɛ wolo o na kuri to ŋwaane. 24Amo zem na pɛ se n ŋwea kam jege kuri amo yibia ne to, a lwoori Wɛ mo se amo de ŋwea kam taa jege kuri o yibia ne se o taa cho-ne cham dwi maama wone.”#Lei 54:7

25Sɔɔl laam ma ta David o we, “Amo bu, Baŋa Wɛ swolim taa wo n tei ne. Nmo ná ke kolo maama, ko wó ke lam ko pa‑m.”

David ma kwei o chwoŋa o maa kɛa. Sɔɔl de ma jwoori o vo sɔŋɔ.

Currently Selected:

1 Samuwel 26: KBG

Highlight

Copy

Compare