1 Samuwel 25

David de Abigali taane dem

1Samuwel déem ma ba o te. Isarele tiina bam maama ma jeeri o teo kom ne, se ba di o lua. Ba ma kwei‑o ba suli o tete teo Rama ne.

Ko kwaga ne, mo David vei o wo Paran kagoa kam wone. 2-3Kaleb dwi tu wodwoŋi déem zoore Maon teo kom ne, o yere mo Nabale. O déem ye nadum chekke. O maa jege pei morro tetɔ, ye o bone de ye moro. O maa jege tega Kamele seeni o nii o vara baŋa ne. O kaane yere déem mo ye Abigali. O maa ye boboŋa tu ye o yibia tiini ya lamma. Ko daare Nabale tete, wonto wo lona dedɛ ye o ta jege ban-jworo. Ko ma maŋe dedaane Nabale de o nɔɔna bam wo Kamele ne ba wora ba fane o vara bam koro.

4David déem na wo kagoa kam ne konto to, mo o nigi we Nabale tu se o fane o vara bam koro. 5O ma le o nɔn-donno tem fuga, o toŋe-ba Nabale tei ne ye o we, “Véi-na Nabale tei Kamele ne á da amo ŋwaane á ware‑o. 6Ta-na ded‑o we: ‘Wɛ wó pa nmo de n sɔŋɔ tiina maama yazura de momwɛ-dɛɛre! Wɛ wó pa se n jeŋa wonnu maama ke lanyerane! 7Amo nam nigi we nmo wora n pa ba fane n vara bam koro mo. A maa lage se n maane we, nmo nayera bam ya na wo debam tei ne to, dé wo daane-ba. Maŋa kalo maama ba na wo Kamele seeni to, ba kolokolo wo jei. 8Nam bwei n tontoŋena bam n nii, se ba wó ta konto mo. Zem na ye kuri dim dɛ to mo a lwoori‑m se n ke a nɔn-donno tem lanyerane, dé badwoŋo kom ŋwaane. Pa debam zeina yalo maama n na jege n jeŋa ne to.’ ”

9David nɔɔna bam ma ja o kwora kam ba vo ba pa Nabale. Ba laam ma zege se ba jwoŋi leira. 10Nabale ma leiri-ba o we, “David mo ye wɔ? Amo yeiri‑o. Jesse bu wonto nɛ o tete na? Leile konto, tontoŋeno wolo maama ná jeini o boŋe ga, o wó zaŋe mo o lɔ o tu kwaga ne se o taa tei o tete. 11Amo bá sɛ se a kwei a wodiu dedaane a na a pa nɔn-yɔɔro telo a na yeiri mɛ ba na nwoŋi to. A bá kwei vara balo a na go se a tontoŋena di to a pa abam.”

12David nɔɔna bam ma jwoori ba vo David tei, ye ba ta kolo maama Nabale na tage to ba bere‑o. 13David ma ta de o nɔɔna bam o we, “Nɔɔno maama kwei o se-zɔɔ o vɔ o teiŋa ne diŋ-diŋ!” Ba ma kwei ba se-zɔɔro tem ba vɔ. David tete de ma vɔ o se-zɔɔ kom o teiŋa ne. O maa tɔge nɔɔna bia yana yiga o maa vei Nabale baŋa. Nɔɔna bia yalei ma daare, se banto taa yere ba zela yam.

14Nabale tontoŋeno wodwoŋi ma ta de Nabale kaane Abigali o we, “David mo zege kagoa kam ne o toŋe nɔɔna debam tu Nabale tei ne se ba ware‑o, ye o twe-ba lanyerane. 15Chega ŋwaane nam, nɔɔna banto ya yɔɔre ba ke debam lanyerane mo. Ba wo daane debam. Maŋa kalo maama dé na wo ba tei ne dé beeri gaao kom wone to, dé kolokolo wo jei. 16Dé na jege dé pei sem dé yere gaao kom wone to, David nɔɔna bam mo kwoli debam, wea dedaane tete maama wone. 17Konto to, fɔge n jeeli se n nii n na wó ke kolo n woli dé maama to. Kokuri lɛɛro mo lage te yi dé tu wom de o sɔŋɔ kom maama, de o na tiini o ye puseŋ-nyeno, ye o ba sɛ o jwoŋi bera to ŋwaane.”

18Abigali ma ke lela o ke woŋo maama daane. O maa jege bworobwooru bia yalei (200), de sana lɔɔro telei, de pei senu ba ya na wɔge-se to, de men-wɔa ywolo-kamunu, de kekan-wogila bwɛ bi (100), de kapere-kora maasa bia yalei (200). O ma kwei wonnu tem konto maama o vɔ bonɛ baŋa ne. 19O ma ta de o tontoŋena bam o we, “Ja-na wonnu tento á ta‑á wo yiga ne se amo de wó saŋe á kwaga a ba.” Konto maama to, o wo pɛ o baro wom maane ko ni ne.

20Abigali ma di o bonaga baŋa ne o kwei chwoŋa o maa via. O wo chwoŋa kam ne mo, se ko maŋe dedaane mɛ na gugwoli ko kaare peo kom to. David de o nɔɔna bam maa tu peo kom yuu ne ba beena. Ba ma jeeri daane. 21David ya boŋe o ja we, “A yɔɔre a yaare a tete mo kafɛ ye a déem wora a yere Nabale jea wonnu kagoa kam wone. Amo ke‑o lanyerane pa se o kolokolo wo jei. Laam nam nii o na mɛ balɔrɔ mo o jwoori o leini lanyerane delo a na ke‑o to. 22Amo nam dugi de Wɛ se o pa lɛɛro yi amo, nenɛɛne tega daa ná poore ye a wo go baara balo maama na ye o dwi tiina to pa se ba wolowolo wo daare de dedoa de.”

23Abigali na yɔɔre o na David to, mo o zege o bonaga kam yuu ne o faŋe o chu. O laam ma chɔɔle o yibia tega ne o ware David. 24O ma ja David nadwooni ye o we:

“Amo tu, pa-ne pwola se a ŋɔɔne fee dede‑m. Ja! Sɛ se ko maama taa ye amo yiga, se n daare n cheigi a taane. 25Amo tu, yé pa se Nabale na ke tei to daane‑m, se o ye puseŋ-nyem mo. O yere na ye Nabale to, de kuri mo ye ‘nɔn-jworo’. Chega to, o ma seene o toŋe jworim. Se ko ná ye amo, a wo nɛ nɔɔna balo nmo na toŋe a baro tei ne to.

26Amo tu, a nɛ we ko ye Baŋa Wɛ mo chege nmo, se n yé ma lwarem n ma n ŋwe n dona. O ma che‑m se n yé ma n jeŋa n go-ba. Ŋwea Tu Baŋa Wɛ na seene o wora to, amo dugi wonto yere ŋwaane, de nmo tete yere ŋwaane we, nmo dona maama de balo dwi maama na boŋe balɔrɔ ba pa‑m to wó guri nenɛɛne Nabale na lage o guri tei to mo. 27Amo nam lwoori‑m mo se n jwoŋi pɛɛra yanto n tontoŋ-kana jeŋa ne, a na jaane a ba to, n pɔɔre-ya n pa n nɔɔna bam. 28Amo tu, a nam lwoori‑m mo se n ma n chɛ-ne de a ná ke kolo a ja a chɔge. Amo yei we Baŋa Wɛ wó pa n paare dem fɔge de zege taa, nmo na ye wolo na jaŋe Baŋa Wɛ jara n pa‑o to ŋwaane. Wɛ bá sɛ se n ke lwarem n ŋwea maama wone. 29Nɔɔno ná pare nmo se o go‑m, n Tu Baŋa Wɛ mo wó taa kwoli‑m se cham yé yi n ŋwea. Ko nam ná ye n dona bam, o ta maa wó pa se ba ŋwea yɔɔre ka jei, nenɛɛne nɔɔno na kwei kandwɛ o ke napana wone, ye o laam dole-ka pa kandwɛ dem jei tei to. 30A yei we Baŋa Wɛ wó seene o ke wo-laaro telo maama o na gwoni ni se o ke o pa‑m to. O ta wó pa se n ji Isarele tiina pɛ. 31Ko maama ná kea, nmo boboŋa daa bá chɔge, nenɛɛne n ya ná go nɔɔna kafɛ yerane. Nmo boboŋa bá daane‑m de n na mɛ n tete jeŋa n ŋwe n jene nɔn-gwia baŋa ne to. Amo tu, Baŋa Wɛ ná tu o ke‑m lanyerane konto, se n guli amo de gula.”

32David ma ta Abigali o we:

“Amo wó seini Isarele tiina Baŋa Wɛ wom mo, kokuri to, wonto mo toŋe‑m se n ba n jeeri-ne zem dɛ dento. 33A nam ta ke Wɛ lei nmo de ŋwaane. N ye boboŋa tu. Swa taane delo n na tage to ŋwaane, amo ta wo mɛ a jeŋa a go nɔɔna se a ŋwe a jene ba baŋa ne. 34Chega to, Baŋa Wɛ mo chege amo chwoŋa se a yé chɔge abam. Nmo ya ná wo ke lela n ba n jeeri debam, tento n baro wom de o nɔɔna maama na ye baara naa bakeiri to ya tega. Dé ya wó go baaro dwi maama na wo o sɔŋɔ kom ne to, se tega daa ba ka poore. Amo dugi de Isarele tiina Ŋwea Tu Baŋa Wɛ wom mo we a tɛ chega mo konto.”

35David ma jwoŋi Abigali pɛɛra yam ye o daare o ta‑o o we, “Jwoori n vo sɔŋɔ, se n daare n pa n wo taa tiga. Amo wó ke n na tage tei n bere-ne to.”

36Abigali ma jwoori o vo sɔŋɔ. O na nɛ o baro Nabale to, o ma maane we o ke wodi-fɔrɔ nenɛɛne pɛ na wó ke tei to mo. O ke kuri mo o pa nɔɔna se ba tɔge ba di. O ma di ywoni o ba o bugi de sana. Konto ŋwaane Abigali wo tage kolokolo de o baro wom dento tete dem ne. 37Tega laam na poore ye sana bam nwoŋi Nabale yia ne to, mo o kaane wom tole kolo maama na ke to o bere‑o. Nabale na nigi to, o bochare ma tiini de baane, ye o yera yam maama bobo se ya taa toa. 38Da fuga na ke ya woli da to mo Baŋa Wɛ fere Nabale pa o te.

39David na nigi we Nabale tege to, o ma seini Wɛ ye o we, “Amo wó ke Baŋa Wɛ lei, kokuri to, o bere we a jege chega Nabale yiga ne dedaane o na twe-ne to. O ta ma che a jeŋa pa se a wo toŋe lwarem, ye o daare o pa se Nabale keim-balɔrɔ kom jwoori ko to o tete yuu ne.” David laam ma toŋe kwora o pa Abigali we, o lage‑o mo se o ma o ke o kaane.

40David nɔɔna bam ma vo Kamele ba ta de Abigali ba we, “David mo toŋe debam n tei ne se dé ja‑m dé ba se n ta‑n ye o kaane.” 41O ma chɔɔle o yibia tega ne ye o leiri-ba o we, “Amo ye David tontoŋ-kana mo. A maa wó sɛ se a zare o tontoŋena bam nɛ.” 42Abigali ma ke lela o zaŋe o di bonaga, ye o pa o ka-nyaana banu tɔge‑o ba vo. Ba ma pɛ David nɔɔna bam kwaga ba pu ba vo ba yi David tei, pa se o ji o kaane.

43David nam ya maŋe o di Jezerele teo bukɔ Ahinoam mo o ma o ke o kaane. Abigali laam ma woli da o ye o kaane. 44Se ko ná ye o ka-kwea kam na ye Sɔɔl bukɔ Mikaale to, Sɔɔl déem ya kwei‑o mo o pa o zo Layisi bu Paliteli. Nɔɔno wom konto déem nwoŋi Galim mo.#2 Samuwel 3:14-16

Currently Selected:

1 Samuwel 25: KBG

Highlight

Copy

Compare