1 Samuwel 24

David yage Sɔɔl o pa o lu

1Jara yalo déem na wo Sɔɔl dedaane Filisi tiina bam tetare ne to ma ti. Sɔɔl na jwoori sɔŋɔ to mo o nigi we David wo En-Gedi kagoa kam seeni. 2O ma kuri jar-keira morro tetɔ Isarele tiina bam wone, balo na yei jara laŋa chekke to. O ma ke-ba o kwaga ne ye ba nwoŋi ba vo se ba beeri David de o nɔɔna bam jei. Ba ma vo ba yi peero tedwonna seeni ba na bwoi-te we ‘Kagoa wo bone peero’ to.

3Ba na wo chwoŋa ne to, mo ba yi jei selo nayera na yeini ba pe ba pei da to. Peo bɔɔne maa wora de na bwola de chwoŋa kam ni. Sɔɔl ma ywori o zo bɔɔne dem wone se o fo fea. Peo bɔɔne dem konto ne mo David de o nɔɔna bam de déem seigi. Banto nam jwoori ba wo yiga ne mo dáa dáa. 4David nɔɔna bam na nɛ Sɔɔl to ba ma ta de David ba we, “Nii pwola na tigi jaja ka pa‑m tei! Zem dɛ dento mo ye dɛ delo Baŋa Wɛ na tage de taane, de o na taga we, o wó kwei n dono wom o ke n jeŋa ne se nmo ke‑o n na lage tei to.” David ma vwɛ konto mɛmɛ o vo o ja Sɔɔl gɔrɔ kom kuri seeni o gwoni, ye Sɔɔl yeiri ko ni ne.

5Ko kwaga ne mo David boboŋa daane‑o dedɛ de kolo o na ke to. 6O ma ta de o nɔɔna bam o we, “Baŋa Wɛ wó che se amo kwei a jeŋa a ma a ke wolo na tei amo to zonne. Ko ye Baŋa Wɛ mo kuri‑o. Wɛ wó che se a chɔge a tu wom, kokuri to, Baŋa Wɛ swolim nuga mo wo o yuu ne.” 7Taane dem konto mo David mɛ o kuni o nɔɔna teiŋa, ye ko che pa se ba wo ke Sɔɔl kolokolo. Sɔɔl ma zaŋe peo bɔɔne dem wone o nwoŋi se o kɛ.

8David de laam ma pi o nwoŋi peo bɔɔne dem wone ye o zege dáa ne o bwoŋi Sɔɔl o we, “Pɛ! Amo tu, denlei!” Sɔɔl ma pipiri se o nii. David ma vwi o yibia tega ne o pa‑o zula, 9ye o ta o we:

“Amo kwo, bɛŋwaane mo n kare n cheigi balo na tɛ ba we amo kwaane se a chɔge‑m to taane? 10Nmo zem nɛ we, n na zo peo bɔɔne dem wone to, Baŋa Wɛ kwei nmo o ke amo jeŋa ne mo. A nɔɔna bam badwonna ya we dé go‑m mo, ye amo wo pɛ-ba chwoŋa. Amo ma ta-ba a we, ‘A bá sɛ a ke a tu wom zonne, o na ye wolo Baŋa Wɛ na kuri to ŋwaane.’ 11A kwo, fɔge n nii gare-zenzware dento a zei a jeŋa ne to! De nwoŋi nmo gɔrɔ kom kuri seeni mo. Amo na yi n yera to, a ya wó wane‑m a go. A na gwoni n gɔrɔ kom, ye a daare n tete a yage to, laam nam lɔre we a ba jege nmo lwarem puga a jei. A bere a wo lɔge nmo kwaga ne. Nmo laam ma‑n pu amo kwaga se n le a momwɛ, ye a wo ke‑m kolokolo a chɔge. 12Baŋa Wɛ nam mo wó bere debam balei wone wolo na jege bora to. Baŋa Wɛ mo wó ŋwe amo jene nmo yuu ne, dedaane n na jege amo n ke tei maama to. Se ko ná ye amo, a bá kwei a jeŋa a ma a dwei‑m de fee de. 13Faŋa tiina maa we, ‘Keim tɔge de tu mo.’ Konto to, amo bá ke nmo lwarem.

14Amo nam ye wɔ mo ye Isarele tiina pɛ pare-ne se o go? Amo ye kukuri-teka, naa yeenu mo nmo jege n zeila? Ko ba jege kuri. 15Baŋa Wɛ mo wó zo taane dento wone se o di-de debam balei laŋa ne. Wonto mo wó zege amo kwaga ne o woli-ne. O ta wó pa a na bora ye a lu nmo jeŋa ne.”

16David na tage konto maama o ti to, mo Sɔɔl bwei‑o o we, “Amo bu David, nmo kwora mo konto na?” Sɔɔl laam ma keeri baŋa baŋa. 17O ta ma ta o we, “Yage, se n jege chega, amo mo toŋe vwa. Nmo nam ke amo lanyerane, ye amo lage nmo chɔgem.#Matiyu 5:44 18Nmo zem pɛ se a lɔre we n lage a ni taane. Kokuri to, Baŋa Wɛ ya pɛ‑m pwola se n go-ne, ye n wo sɛ se n go-ne. 19Nɔɔno ná jeeri o dono ye o ja‑o, o daa wó yage‑o se o kɛ mɔle mɔle mo na? Nmo zem na ke-ne lanyerane to, Baŋa Wɛ mo wó ke zaane n yuu ne. 20Amo laam lɔre we nmo mo wó seene n ji Isarele tiina Pɛ, ye n paare dem wó zege chekke. 21A nam lwoori‑m mo se n ta n du de Baŋa Wɛ yere we, n ná tu n di paare, n bá‑n chɔge a dwi dem se de ti maama. Yé pa se a yere dem jei a kwo sɔŋɔ kom wone.”

22David ma seene o ta o du konto Sɔɔl yiga ne. Sɔɔl ma zaŋe o jwoori sɔŋɔ. David de o nɔɔna bam de ma jwoori ba vo ba seigim jei sem ne.

Currently Selected:

1 Samuwel 24: KBG

Highlight

Copy

Compare