1 Samuwel 23

David jwoŋi Keila teo kom o yage

1Dɛ dedwe mo ba tage ba bere David ba we, “Filisi tiina bam mo vei se ba ke jara de Keila tiina. Ba nam vere ba mena ye ba ta wora ba fere-ya mo.” 2David ma bwei Baŋa Wɛ o we, “A véi a jeeri Filisi tiina bam de jara na?” Baŋa Wɛ ma leiri o we, “Zaŋe n vo n jeeri-ba se n jwoŋi Keila teo ba jeŋa ne n yage.”

3David nɔɔna bam ma ta‑o ba we, “Nii dé na maŋe dé wo Judah laŋa kam ne mo ywo-seeni, ye dé fona de Filisi tiina bam. Se dé laam nam ná lage dé jeeri-ba Keila ne, ko bá taa ye lɛɛro ko pa debam na?” 4David daa ma vo Baŋa Wɛ yiga ne se o bwei o lɔre o na wó ke tei to. Baŋa Wɛ ma leiri‑o o we, “Nam véi Keila leile konto, se amo wó ke Filisi tiina bam nmo jeŋa ne se n di-ba.”

5David de o nɔɔna bam ma zaŋe ba vo Keila ba jeeri Filisi tiina bam de jara. Ba ma wane-ba ye ba vere ba vara ba ja ba viiri. Ba ma go Filisi tiina bam dedɛ, ye ba daare ba jwoŋi Keila tiina bam ba yage. 6Ahimeleka bu Abiatara déem ya na duri o vo David tei Keila ne to, o ya kwei Wɛ kaanem gare-wogo kom mo o woli da.#1 Pwa 2:26-27

7Sɔɔl déem ma ni we David vei Keila mo o wora. O ma ta o we, “Wɛ laam mo kwei David o ke amo jeŋa ne, kokuri to o vei o pe o tete mo teo kolo ba na yeini ba ma bworru kamuna ba pe ko nia yam to wone.” 8Sɔɔl ma bwoŋi o jar-keira bam se ba la daane, ba vo ba gilimi teo kom ba ke tetare ne, se ba daare ba ja David de o nɔɔna bam.

9David na nigi we Sɔɔl boboŋa jaane mo se o ba o ja‑o to, o ma ta de Wɛ kaanem tu Abiatara o we, “Kwei kaanem gare-wogo kom n ja n ba, se dé ma dé lɔre Wɛ boboŋa na ye tei to.” 10David laam ma lwoori Wɛ o we, “Isarele tiina Baŋa Wɛ wom, amo nigi we Sɔɔl lage o ba ywo-seeni mo o chɔge teo kom amo ŋwaane. 11A lage a bwei a nii, Sɔɔl wó seene o ba ywo, ne amo na nigi tei to na? Keila tiina bam wó ja amo ba kwei ba ke o jeŋa ne na? Popo a lwoori‑m se n pa a lɔre ko na wó ke tei to.” Baŋa Wɛ ma leiri o we, “Sɔɔl wó ba.” 12David daa ma bwei o we, “Se Keila tiina bam, ba wó kwei amo de a nɔɔna bam ba ke Sɔɔl jeŋa ne na?” Baŋa Wɛ ma leiri‑o o we, “Ɛɛ, ba wó kwei abam ba pa‑o.”

13David na nigi konto to, o dedaane o nɔɔna bam ma ke lela ba duri ba nwoŋi Keila ne. Ba maa kare ba vei jei selo maama ba na wó wane ba vo to. Sɔɔl na nigi we David daa tere Keila ne to, o ma leiri o boboŋa ye o wo vei da.

David lugi Sɔɔl jeŋa ne

14David déem maa wo Zifi kagoa kam ne o seigi zwonnu laŋa kam gugworru tem wone. Sɔɔl de ma yɔɔre o beeri‑o mo se o wane‑o o ja. Wɛ maa wo pɛ se Sɔɔl na o jei.

15David déem wo Zifi kagoa kam jei sedwoŋi ne, Horesi ne mo. O na wora to, o ma maane we Sɔɔl nwoŋi o ba se o go‑o. 16Sɔɔl bu Jonatan de nam ya vei Horesi. O ma vo David tei, o daare o pa o na baare Baŋa Wɛ dam ŋwaane. 17Jonatan ma ta‑o o we, “Yé ta‑n fona, se a kwo Sɔɔl bá yi‑m o ja. O maŋe o yei we, nmo mo lage n ta‑n ye Isarele tiina Pɛ, se amo laam saŋe n kwaga a taa wo n takeiri ne.” 18Banto balei daa ma ke ni-sɛɛm Baŋa Wɛ yiga ne se ba taa jege chega ba pa daane. Konto kwaga ne mo Jonatan jwoori o vo sɔŋɔ. David maa maŋe Horesi ne.

19Zifi tiina badwonna ma zaŋe ba vo Sɔɔl tei Gibea ne. Ba ma ta ded‑o ba we, “Pɛ, David tu o seigi debam laŋa kam Horesi zwonnu tem ne. O wo Hakila peo kom na wo Jesimon tega-kuri seeni to yuu ne mo. 20Nmo na kwaane n beeri‑o se n ja to, nam lage dɛ se n ba dé teo kom, se dé ja‑o dé ke nmo jeŋa ne.”#Lei 54:0

21Sɔɔl ma leiri o we, “Á ke chega. Baŋa Wɛ swolim taa wo á yuu ne, de á na lage a lanyerane to! 22Nam ta kwaane-na á woli-ne fee. Jwoori-na á vo á lɔre o na wo mɛ chekke to, dedaane nɔɔna balo na nɛ‑o dáane to. Amo nigi we o tiini o wae o peperega. 23Véi-na á fɔge á beeri á lɔre o seigim jei sem maama, se á laam ba á ta á bere-ne jaja. Ko kwaga ne, a laam wó da de abam a vo. O ta ná wo laŋa kam konto ne, a wó beeri a na o jeiga. Ko ná maŋe ko ye se a beeri Judah sɔ-yuni tem maama wone mo de, a ta wó ja‑o.”

24Nɔɔna bam ma ke lela ba lwoori Sɔɔl ba vo Zifi, ye Sɔɔl laam saŋe kwaga o yi da. David de o nɔɔna bam déem ya seigi Maon kagoa kam ne mo. Ba maa wo Araba bwolo kom na wo Jesimon tega-kuri seeni to ne mo. 25Sɔɔl de o nɔɔna bam ma nwoŋi se ba beeri David jei. David de ma ni Sɔɔl ŋwa. O de o nɔɔna bam ma vo peo-kamunu kodwoŋi na wo Maon kagoa kam ne to ba seigi da. Sɔɔl ma lɔre David na wo mɛ to. O ma vo Maon kagoa kam ne o pu o kwaga vira-vira. 26Sɔɔl de o nɔɔna bam maa wo peo kom daa dedoa ne mo ba via. David de o nɔɔna bam de maa wo ko daa kadwoŋi ne ba kwaane se ba lu Sɔɔl jeŋa ne. Sɔɔl de o nɔɔna bam ma daare fee se ba yi David de o nɔɔna bam tei se ba li-ba. 27Ko nɛ ni ne mo nɔɔno duri o vo o yi Sɔɔl tei ye o we, “Ke-na lela á ba! Filisi tiina bam mo chugi ba puri debam teo kom baŋa ne!”

28Sɔɔl ma ga ga o yage David zeilim. O ma jwoori o pipiri se o vo o jeeri Filisi tiina bam de jara. Konto ŋwaane mo ba jege jei sem konto yere ba bwoi we ‘Popɔra Peo’. 29David déem ma zege dáane o vo En-Gedi o seigi jei sem konto ne.

Currently Selected:

1 Samuwel 23: KBG

Highlight

Copy

Compare