1 Samuwel 22

David seigi o tete Sɔɔl tei ne

1David déem ma zege Gafa teo kom ne, o duri o vo o seigi peo kodwoŋi bɔɔne wone. Jei sem konto bwola dedaane Adulam teo mo.#Lei 57:0; 142:0 O chorro de o sɔŋɔ tiina bam maama na nigi we o wo dáane to, ba ma vo o tei. 2Ko ta woli da, nɔɔna balo maama na wo cham wone to, de balo na jege nɔɔna jena to, ko woli dedaane balo maama ŋwea na ba ywomma to maama ma la ba vo David tei ne. Ba maama kɔgɔ déem ye bia yana mo. David ma ji banto maama yiga tu.

3David déem ma zege dáane o vo Moaba teo Mizipa. O ma ta de Moaba pɛ wom o we, “A lwoori‑m mo se n pa a kwo dedaane a nu taa wo nmo tei ne, se ko taa nii a na tu a lɔre Wɛ na jege kolo se o ke o pa-ne to.” 4David ma ja-ba o vo o yage Moaba pɛ wom sɔŋɔ ne. Ba maa wo pɛ wom tei ne maŋa kalo maama David déem na kare o seigi o tete jei sem konto ne to.

5Dɛ dedwe Wɛ sampwora Gaadi ma ba o ta de David o we, “Daa‑n yé maŋe gugworo kom ne ywo-seeni! Zaŋe n nwoŋi n vo Judah.”#2 Samuwel 24:11 David ma pɛ o zaŋe o vo o zoore Herefa kagoa kam wone.

Sɔɔl pɛ ba go Nobi teo kaanem tiina

6Sɔɔl déem maa wo Gibea teo zwoŋo kodwoŋi yuu ne. O maa jei sana kuri ne, ye o zei chichwei o jeŋa ne. O dedɛɛra bam maama maa kaare‑o ba zega. Sɔɔl laam ma ba o lɔre we ba nigi David ŋwa mo. 7O ma ta de o nɔɔna bam o we, “Abam, Benjamin tiina bam, á boŋe we Jesse bu David ná di paare, o ta wó taa yei á ni ne, se o pa abam kare de kadwi ye o daare o pa á taa wo o jar-keira bam yiga ne na? 8Ko ye konto ŋwaane mo á ke ni daane se á lɔ amo kwaga ne na? Amo tete bu Jonatan mo ke ni dedaane Jesse bu wom se ba chɔge-ne, ye abam wolowolo wo pɛ se a lɔre ko ni ne. Abam bere we á yiga tere amo wone. Amo bu wom maŋe o soge a tontoŋeno pa se o kwaane o na pwola o go-ne, ye á wo tage á bere-ne!”

9Edom tu Doegi de déem tɔge o wo Sɔɔl nɔɔna bam tei ne. O na nigi Sɔɔl na tage kolo to, o maa we, “Maŋa kam a na wo Nobi ne to, mo a nɛ Jesse bu wom na tu Ahituba bu Ahimeleka tei. 10Ahimeleka ma bwei Baŋa Wɛ se o lɔre David yiga na ye tei to. O ta pɛ David wodiiru, ye o daare o kwei Filisi tu Goliafe se-zɔɔ kom o woli da o pa‑o.”#1 Samuwel 21:7

11Sɔɔl na nigi konto to, o ma toŋe o bwoŋi Ahimeleka dedaane o sɔŋɔ tiina maama se ba ba o tei. Banto déem ye Wɛ kaanem tiina mo Nobi teo ne. Ba maama na yi Sɔɔl tei to, 12o ma ta o we, “Ahituba bu, cheigi ywo!” O de ma leiri o we, “Pɛ, a cheiga.” 13Sɔɔl ma bwei‑o o we, “Bɛ mo ke ye nmo sɔ ni dedaane Jesse bu wom, se á ke á chɔge-ne? Nmo pɛ‑o wodiu, de se-zɔɔ, ye n ta ma‑n sɔɔle Wɛ n kwɛ o chwoŋa. Konto ma pa se o lɔ amo kwaga ne, ye o zem tɔge amo nɛ tento se o go-ne!”

14Ahimeleka ma leiri pɛ wom o we, “Pɛ, nɔɔn-nɔɔno tere nmo tontoŋena bam wone ye o jege chega o pa‑m nenɛɛne David na jege nmo chega tei to. O ta maa ye n bukɔ baro. Babɛ selo na yere nmo to maama wone, o wo ba yiga ne mo. O ta maa jege yere nmo sɔŋɔ kom maama wone. 15Chega to, ko dae dento dɛ ne mo a bobo se a sɔɔle Wɛ a pa‑o. A nam ke a chɔge mo na? Yé ja taane dento n jeeri amo de a sɔŋɔ tiina bam, se amo yeiri taane dem kolokolo ni ne.”

16Sɔɔl ta maa we, “Ahimeleka, nmo dedaane n dwi dem maama jege se á te mo.” 17O ma ta de balo na zege ba yere‑o to o we, “Zaŋe-na á go Baŋa Wɛ kaanem tiina bam! Kokuri to, ba sɔge ni dedaane David se ba chɔge-ne. Ba maane we David maa duri se o lu amo mo, ye ba wo tage ba bere-ne.” Pɛ dedɛɛra bam maa wo sɛ se ba ma ba je ba dwei Baŋa Wɛ kaanem tiina bam.

18Sɔɔl ma pipiri o ta de Edom tu Doegi o we, “Nmo nam zaŋe n go Baŋa Wɛ kaanem tiina bam!” Doegi ma seene o mage-ba o go. Wɛ kaanem tiina funɔnɔ banu mo tege de dɛ dem konto ne, ye ba maama zoore kaanem gare-wogo kom mo. 19Sɔɔl ma vo Nobi teo kom, mɛ kaanem tiina bam na zoore da to. O ma go teo kom nɔɔna bam maama. O pɛ ba go baara, de kaana, de ba bia, ko bere ko woli bu-sese de mo. Ba ta ma go ba naane, de ba bonɛ, ko woli de ba pei maama.

20Wolo yerane déem na lugi to mo ye Abiatara. O maa ye Ahimeleka bu mo, ye o kwo-nakwe ye Ahituba. O ma duri o vo o woli David kɔgɔ kom wone. 21O ma lwoni o bere‑o Sɔɔl na go Baŋa Wɛ kaanem tiina bam tei to. 22David ma leiri‑o o we, “Dento dɛ dem a na maŋe a na Doegi na wora to, a maane we o wó vo o ta o bere Sɔɔl o na nɛ kolo to. Abam sɔŋɔ kom maama na tege to, ko ye amo yiga mo. 23Konto ŋwaane, ta‑n wo amo tei ne. Yé ta‑n kɔre foone. A yei we Sɔɔl beeri debam balei mo se o go. Nmo nam ná wo amo tei ne, cham bá yi‑m.”

Currently Selected:

1 Samuwel 22: KBG

Highlight

Copy

Compare