1 Samuwel 21

Sɔɔl na tɔge David nɛ tei to

1David déem ma vo Nobi. Wɛ kaanem tu maa wora, o yere mo Ahimeleka. David na tu o tei to, Ahimeleka ma nwoŋi se o jeeri‑o ye o yera sae. O ma bwei David o we, “Bɛ mo ye n vei n yerane ye nɔɔn-nɔɔno ba tɔge dede‑m?” 2David ma leiri‑o o we, “Pɛ mo toŋe-ne. O nam we a yé pa nɔɔn-nɔɔno lɔre ni delo o na pɛ-ne to. Ko ná ye a nɔɔna bam, a tage de-ba se ba taa cheigi-ne jei sedwoŋi ne mo. 3N jege wodiu n tei ne na? Lage bworobwooru tenu naa woŋo kolo maama dwi n na jege to n pa-ne.”

4Kaanem tu wom ma leiri‑o o we, “Bworobworo kolo yerane na wo amo tei ne to ye kolo na yeini ko tigi da Baŋa Wɛ ŋwaane to mo. Nmo de n nɔɔna bam nam ná wo peini de kaana da yanto ne, á wó wane á kwei-ko á di.” 5David maa we, “Chega to, debam de kaana wo yi daane. Amo nɔɔna bam ná maŋe ba yeini ba beeri yɔɔ yerane mo de, ba wó taa cho ba tete de kaana Wɛ ŋwaane. Konto laam na ye wo-chɛɔ to, ko tiini ko ke dwono mo!”

6Kaanem tu Ahimeleka ma kwei bworobworo kolo ya na tigi da Wɛ ŋwaane to o pa David. Bworobworo kom konto nam yeini ko wo Baŋa Wɛ yiga ne mo. Ba maa yeini ba jwoori ba kwei-ko ye ba daare ba leiri ba tiŋi bworobworo-loŋo da. Konto to, bworobworo kolo ba na jwoori ba kwei Baŋa Wɛ yiga ne to yerane mo wo kaanem tu wom tei ne.#Matiyu 12:3-4; Maake 2:25-26 7Sɔɔl tontoŋeno dedoa déem maa wora, o yere na ye Doegi. O maa ye Edom tu ye o kwori o ye Sɔɔl nayera bam yiga tu. Dɛ dem konto ne wonto déem wo Ahimeleka tei ne, o na jege se o kwɛ o tete Baŋa Wɛ yiga ne to ŋwaane.#1 Samuwel 22:9-10

8David ta ma bwei Ahimeleka o we, “Nmo wó ta‑n jege chichwei naa se-zɔɔ n tei ne na? Pɛ wom tontoŋa kam tiini ka lomma mo pa se a wo nɛ pwola se a kwei a se-zɔɔ kom. A maa ba jege jara zele de zele.” 9Ahimeleka ma leiri o we, “Se-zɔɔ kodwoŋi wora. Ko ye Filisi tu Goliafe wolo nmo déem na go Ela bwolo kom ne to nyem mo. Ko nam kukuli de gɔrɔ ko tigi a gare-wogo kom kwaga ne. N ná lage-ko se n kwei. Se-zɔɔ kodwoŋi daa tera.” David ma leiri o we, “Se-zɔɔ tera ko na dwoi-ko. Amo wó jwoŋi-ko.”

10Dɛ dem konto ne David déem ma zaŋe o duri se o lu Sɔɔl yiga ne. O ma vo o yi Gafa teo pɛ Akisi tei. 11Pɛ Akisi dedɛɛra bam na nɛ David to, ba ma ta de Akisi ba we, “Nɔɔno wonto ye David mo, ba teo pɛ wom. Ko dae konto na? O teo kom nɔɔna bam yeini ba sae ye ba leeni ba seini‑o mo ba we:

‘Sɔɔl go o dona bam

moro de moro.

Se ko ná ye David,

wonto ma go o dona bam

morro fuga de fuga.’ ”

12David na nigi konto to, o ma jeeli nɔɔna bam taane dem maama, ye ko pa foone tiini de ja‑o de Gafa teo pɛ Akisi. 13Konto ŋwaane, David na yeini o wo ba tei ne to, o maa ke nenɛɛne o yirisi mo. O déem kare o ke yuu-vuvuga kikia mo, ye o jege ba teo kom manchwoŋo ni bworru o kwɛɛra yɔɔ yɔɔ ye o beiri te yera ne. O ta maa yage o twana yam pa se o lileeru nwoŋi te bɔɔre ya maama. 14Pɛ Akisi ma ta de o nɔɔna bam o we, “Abam wo nɛ we nɔɔno wonto ye chichwoo mo na? Bɛŋwaane mo á nam jaane‑o á ba amo tei? 15Amo gɛ chichwooru mo ye á ja‑o á ba amo tei na? A ba lage se wonto taa wo a sɔŋɔ ne o jege-ne o daana!”#Lei 34:0; 56:0

Currently Selected:

1 Samuwel 21: KBG

Highlight

Copy

Compare