1 Samuwel 20

Jonatan na woli David tei to

1David déem ma zege Rama teo Nayofi ne o duri se o lu Sɔɔl, ye o daare o vo Jonatan tei. O ma bwei Jonatan o we, “Amo bere a ke bɛ mo a chɔge ye n kwo kwaane se o go-ne? Bɛ lwarem mo a ke‑o?” 2Jonatan ma leiri‑o o we, “Wɛ bá sɛ se ko ke konto. Nmo bá‑n te. Amo kwo bá ke woŋo ye o wo tage o pa a maane ko ni ne. Ko ná maŋe ko ye wo-balaŋa naa wo-kamunu, o yeini o ba seigi-ne. Ko bá wane ko ke konto!”

3David ma ta o du ye o we, “Jonatan, ko seene ko ye chega mo we n kwo beeri se o go-ne mo. O nam yei we nmo yiga tiini ka wo amo wone. Mo kokuri o wo pɛ se n lɔre o boboŋa, o na ba lage se o chɔge nmo wo to ŋwaane. Ŋwea Tu Baŋa Wɛ na seene o wora to, amo dugi wonto yere ŋwaane, de nmo tete yere ŋwaane we, amo tiini a bwola de toone.” 4Jonatan maa we, “Nmo na lage se a ke kolo maama to, a wó ke a pa‑m.”

5David ma leiri o we, “Nmo yei we jwa ne mo chan-doŋa kuri dem di. Ko maa jege se a taa tɔge a wo balo na jeini dedaane pɛ ba di wodiu to mo. Nam sɛ se a vo pwola a seigi da se ko vo ko yi jwa yiga dedaan-ni ne. 6Nmo kwo ná maane we a tera ye o bwei a bwia, se n ta we, ‘David ya lwoori chwoŋa mo a tei ne se o ke lela o vo Bɛtelehem o woli de o diga tiina se ba tɔge daane ba ke kaanem, nenɛɛne ba na yeini ba ke bene maama wone o sɔ-yuu kom maama ŋwaane to.’ 7Tɔ. Nmo ná tage konto, ye n kwo ná we, ‘Ko lamma’, ta‑n yei we kolokolo bá yi-ne. Se n taane dem baŋa ne, o bane ná zaŋe, lɔre se o boboŋa jaane se o go-ne mo. 8Ja! Nam ke woŋo konto n pa-ne, debam na ke ni-sɛɛm daane Baŋa Wɛ yiga ne to ŋwaane. Nmo nam daa‑n ná maane we a seene a ke lwarem mo, se nmo tete go-ne. Yé ja-ne n vo n pa n kwo.”

9Jonatan ma leiri o we, “Wɛ bá sɛ se ko ke konto. Amo ya ná maane we a kwo boboŋa jaane se o go‑m mo, a ya bá ta a bere‑m na?” 10David ma bwei‑o o we, “Konto to, n kwo ná leiri nmo de ban-zɔŋɔ, wɔ mo wó pa se a lɔre ko ni ne?” 11Jonatan maa we, “Pa se dé nwoŋi dé vo pwola kam wone.” Ba ma tɔge daane ba kɛ.

12Ba na zege da konto to, Jonatan ma ta de David o we, “Isarele tiina Baŋa Wɛ wom taa ye maana tu debam balei laŋa ne we, ko ná ke da yalei, amo wó bwei a kwo a lɔre o boboŋa na ye tei de nmo to. O boboŋa yam ná lamma, a wó pa n maane. 13O boboŋa nam ná jaane se o chɔge‑m, a ta wó pa‑m kwora, ye a daare a yage chwoŋa a pa‑m se n duri n lu. Baŋa Wɛ nam wó pa se ko tiini ko ni amo, nenɛɛne a ná wo ke kolo a na we a wó ke to. Amo ta lwoori Baŋa Wɛ mo a pa‑m, se o taa wora dede‑m nenɛɛne o déem na wo amo kwo tei ne tei to. 14Amo de lwoori‑m se n yé swei a swia. Amo ta ná ŋwe, ta ta‑n jege amo swono kom, ne Baŋa Wɛ na jege debam swono tei to. Amo nam ná tege de, 15se n ta ta‑n jege amo bia bam swono se ko taa vei wuu. Baŋa Wɛ ná tu o ba o chɔge nmo dona bam maama pa se ba yera saare logo baŋa ne, se n yé yage swono kom konto de a dwi dem.”#2 Samuwel 9:1

16Jonatan déem tɔge konto mo o ma o fɔge o ke ni-sɛɛm dedaane David de o dwi dem. O ma ta o we, “Baŋa Wɛ wó pa se David dona bam maama bere‑o chega.” 17Jonatan ta ma pa David tɔge o swono kom baŋa ne o du duuri ba ni-sɛɛm dem ŋwaane. Kokuri to, o déem tiini o swoi David mo nenɛɛne o na swoi o tete tei to.

18Ko kwaga ne, Jonatan ma ta de David o we, “Jwa dɛ dem mo ye chan-doŋa kuri dem. Nɔɔna bam wó lɔre we nmo tera, nmo jeiŋa jei sem na wó taa zege kafɛ to ŋwaane. 19Tega daa na wó poore to, se n zaŋe n kɛ yiga yiga n vo mɛ n na seigi boboa kam ne to, se ko maŋe dedaane Ezeli kandwɛ dem teiŋa ne. Laam ta‑n cheigi-ne dáane. 20Amo ná tua, a wó kwei a taŋa a ke nenɛɛne a lage a ta chena mo a jeeri kandwɛ dem konto. Chena yatɔ mo a wó ma a ta. 21A maa wó pa bu wolo na wo a tei ne to vo o beeri che-tɛɛra yam. Amo ná tage de bu wom a we, ‘Nii mo! Chena yam wo n saŋa kanto ne mo ya twɛ ywo-seeni. Kwei-ya n ja n ba.’ Se n ta‑n yei we ko ye yazura mo. Konto, n wó wane n nwoŋi n na seigi mɛ to n ba. Kokuri to, ŋwea Tu Baŋa Wɛ yere ŋwaane kolokolo bá ke‑m. 22A nam daa ná tage de bu wom a we, ‘Chena yam wo nmo yiga ne mo ya kɛ ya gaale‑m,’ se n lage jei n duri n viiri. Konto ye se n lɔre we Baŋa Wɛ mo pɛ‑m chwoŋa se n viiri. 23Nam yé swei debam balei ni-sɛɛm dem swia! Baŋa Wɛ mo ye maana tu debam laŋa ne taa wuu, se dé wane dé ke dé su ni-sɛɛm dem.”

24David déem ma vo o seigi pwola kam ne. Chan-doŋa kuri dɛ dem na yi to, pɛ Sɔɔl ma jeini de o dedɛɛra bam se o di kuri dem wodiu. 25O ma jeini o na maŋe o yeini o jei mɛ to ye o sale kabira. Jonatan ma jeini o jeeri‑o. Abenera de ma jeini Sɔɔl takeiri ne. Ko daare ye David jeiŋa jei sem mo tigi kafɛ. 26Sɔɔl ma na, ye o wo tage kolokolo dɛ dem konto ne. Kokuri to o ya boŋe we, “Dɛ delo woŋo mo chege David yiga pa se o wo tu. Tento o lage o kwɛ o tete se ko maŋe de chullu tem mo, se o laam ba o di kuri dem.” 27Tega daa na poore chan-doŋa da yalei dɛ dem ne to, Sɔɔl ma maane we David daa ta tera. O ma ga ga o bwei o bu Jonatan o we, “Bɛ mo ke ye Jesse bu wom wo tu se o di kuri dem wodiu diim dedaane zem maama?”

28Jonatan ma leiri‑o o we, “David seene o lwoori chwoŋa mo amo tei ne se o liisi fee o vo Bɛtelehem. 29O tage de amo we, ‘Ja! Debam diga kam mo jege kaanem se dé ke dé ma di kuri dé teo kom ne. Amo zembaaro ma toŋe o bwoŋi-ne. Nam sɛ dé badwoŋo kom ŋwaane, se n pa a vo se a jwoori.’ Konto ŋwaane nam mo pɛ se David zem tere ywo-seeni se o di wodiu nmo tei ne.”

30Sɔɔl na nigi Jonatan na tage kolo to, o bane ma zaŋe o baŋa ne ye o we, “Nmo dae amo bu chekke! N jege yi-dɛɛre ne n nu mo tei! A maane we n lɔge amo kwaga ne, ye n daare n tɔge Jesse bu David kwaga mo. Nmo na ke tei to ye n tete de n nu wom chaveera mo. 31Ta‑n yei we Jesse bu wom ta ná ŋwe, nmo bá wane n di ywoni. N bá‑n na chwoŋa se n di paare dem. Ke lela n toŋe nɔɔna se ba ja‑o ba ba ywo-seeni, se o jege se o te mo!” 32Jonatan ma leiri o kwo o bwei o we, “Bɛŋwaane mo o jege se o te? O ke kɔ mo o ja o chɔge?” 33Konto baŋa ne mo Sɔɔl kwei o chichwei o dole Jonatan se o kwaane o go. Jonatan laam ma maane we Sɔɔl seene yia mo se o go David. 34Jonatan ma pɛ o zaŋe wodiu kom baŋa ne de ban-zɔŋɔ, ye o daa wo di kolokolo chan-doŋa da yalei dɛ dem ne. O wo déem ma tiini ko chɔge de o kwo na jege kolo o toŋe David yera ne to.

35Tega na poore to, Jonatan ma zaŋe o da dedaane bu o vo pwola kalo David na seigi to, ne ba na maŋe ba bane ba tiŋi tei to. 36O ma ta de bu wom o we, “Duri n vo n twɛ che-tɛɛra yalo a na wó ta tento to n ja n ba n pa-ne.” Bu wom na bobo se o duri to, mo Jonatan vaŋe taŋa o ta chene o pa de gaale‑o de kɛ yiga ne. 37Bu wom na yi chene dem na to jei selo ne to, Jonatan ma tɔɔle o ta‑o o we, “Ta‑n via! Chene dem kɛ de wo n yiga ne mo.” 38O ta ma tɔɔle o we, “Ke lela! Yé ta‑n zega! Ta‑n via!” Bu wom ma twɛ chene dem ye o jwoori o pa o tu wom. 39Bu wom nam wo lɔre keim dem konto kuri. Jonatan dedaane David yerane mo yei kolo na wora to. 40Jonatan laam ma kwei taŋa kam de ka chena yam o pa bu wom. O ma ta‑o se o ja-ya o jwoori teo kom wone.

41Bu wom na kɛ o daare to, David ma zaŋe kandwa yalo kwaga ne o ya na seigi to, o nwoŋi o vo o yi Jonatan tei ye o daare o vwi o yibia tega ne kuni betɔ. O de Jonatan ma kukwori daane ye ba keera. David nam mo tiini o keeri o dwoni Jonatan. 42Jonatan laam ma ta de David o we, “Wɛ taa wo n tei ne! Za n yé swei we dé ke ni-sɛɛm mo daane Baŋa Wɛ yere ŋwaane we, Baŋa Wɛ ye maana tu debam balei laŋa ne, dedaane dé dwia yam laŋa ne se ko taa vei wuu.” Ba na ŋɔɔne ba ti to, David ma zaŋe o kɛ. Jonatan de ma jwoori o vo teo kom wo.

Currently Selected:

1 Samuwel 20: KBG

Highlight

Copy

Compare