1 Samuwel 19

Sɔɔl na chuli David tei to

1Sɔɔl déem zaŋe dɛ dedwe mo o ta Jonatan dedaane o nakwa bam maama we, ba kwaane ba go David. Jonatan yiga déem nam maa tiini ka wo David wone. 2O ma vo o ta de David o we, “Amo kwo boŋe se o go‑m mo. Konto to, ta‑n jege n tete. Jwa zezeŋa ne, se n vo n seigi pwola ne n ta‑n wora. 3Amo wó da de a kwo se dé ba nmo na seigi mɛ to dé taa zega. A laam wó taa tɛ nmo taane ded‑o, se a nii o na wó leiri kolo to se a laam ba a ta a bere‑m.”

4Tega na poore to, Jonatan ma tei David o kwo Sɔɔl yiga ne. O ma ta de Sɔɔl o we, “Jan ja! Yé zaŋe n ke David n ja n chɔge, se o wo ke‑m lwarem. Chega to, kolo maama o na ke to ye se ko zeini nmo mo. 5Yé swei we o déem na vei se o go Goliafe to, ko ye o tete ŋwea mo o dole o yage. Baŋa Wɛ ma da wonto baŋa ne o di wɔnɔ o pa Isarele tiina bam maama. Nmo na nɛ konto to, n wo pwoli mo. Bɛ nam daa mo kea ye nmo lage se n ja nɔɔno wolo na wo ke kolokolo to n chɔge? Nmo ná go David, ko bá taa jege kuri.”

6Jonatan taane dem tiini de dwei Sɔɔl bochare. O ma du duuri o we, “Amo tɛ chega de ŋwea Tu Baŋa Wɛ yere we, David daa bá te.” 7Jonatan laam ma bwoŋi David ye o ta kolo maama na ke o de o kwo laŋa ne to, o bere‑o. O déem ta jaane‑o mo o vo Sɔɔl tei, pa o toŋe o pa Sɔɔl nenɛɛne boboa kam ne o ya na maŋe o toŋe o pa‑o tei to.

8Ko kwaga ne, jara daa jwoori ya chu Isarele tiina de Filisi tiina tetare ne. David déem ma di-ba ye o fe-ba pa se ba duri o yiga ne.

9Dɛ dedwe mo Sɔɔl wo o sɔŋɔ ne, ye o zei chichwei o jeŋa ne. David maa wo o tei ne o jege kɔnɔ o tae. Baŋa Wɛ ma pa jwori-lɔŋɔ ba ko jwoŋi Sɔɔl. 10O ma kwaane se o dole David de o chichwei dem o tane kabira yera ne. David ma liisi pa se chichwei dem moore de maŋe kabira kam yera ne. Tete dem konto ne David ma duri o lu.

11Sɔɔl ma toŋe nɔɔna se ba vo ba gilimi David sɔŋɔ ba yere-ko tete dem konto, se tega ná poore, se ba go‑o. David kaane Mikaale ma kaane‑o o we, “Nmo ná wo ke lela n lage jei n vo, jwa ne n lage n te mo.” 12O ma ja David o pa o tɔge takworo ne o chu, ye o duri o lu. 13Mikaale ma daare o kwei jwoni o tiŋi David sara ne. O ma kwei boŋo koro o kwɛ kwɛ o ke yuu kom seeni, ye o laam kwei gare-jale o ma kwoli ko maama. 14Sɔɔl tontoŋena bam na zo sɔŋɔ kom se ba ja David to, Mikaale ma ta de-ba o we, David weele mo. 15De konto maama de, Sɔɔl toŋe-ba mo se ba jwoori ba vo ba na David yera. O maa we, “Ja-o-na á ba ywo-seeni de o sara kam maama, se a go‑o.”

16Nɔɔna bam na jwoori ba vo ba na to, ba maane we jwoni yerane mo tigi sara kam ne, ye boŋo koro mo wo jwoni dem yuu seeni. 17Sɔɔl na lɔre kolo na ke to mo o bwei Mikaale o we, “Bɛ mo ke ye n gane-ne, ye n pa a dono wom chwoŋa se o duri o lu?” Mikaale ma leiri‑o o we, “David tage o we, a ná wo yage chwoŋa a pa‑o se o lu, o wó go-ne mo.”

18David déem na duri o lu konto to, o ma vo Samuwel tei Rama ne. O ma tole kolo maama Sɔɔl na ke‑o to o bere Samuwel. Ba laam ma da daane ba vo Nayofi ba zoore da. 19Nɔɔna ma vo ba ta de Sɔɔl ba we, “David wo Rama teo kodwoŋi ne mo, ko yere ye Nayofi.” 20Sɔɔl na nigi konto to, o ma toŋe nɔɔna se ba vo ba ja David. Ba na yi da to, ba ma na Wɛ sampwori sedwonna na zege ba pworisa, ye Samuwel wo ba yiga ne. Baŋa Wɛ jworo ma chu Sɔɔl nɔɔna bam maama baŋa ne. Ba de ma da ba to pworisim ne. 21Ba ma ta ba bere Sɔɔl kolo na ke to. O daa ma toŋe nɔɔna badwonna. Ba na yi da to, ba de bobo se ba taa pworisa mo. O daa ta ma toŋe nɔɔna o ke kuni betɔ, ye ba de to pworisim ne.

22Sɔɔl tete laam ma zaŋe o kwei Rama chwoŋa, se o da ba kwaga. O na vei o yi vole-kamunu kom na wo Seku ne to, mo o bwei nɔɔna o we, “Samuwel dedaane David wo yein-seeni mo?” Ba ma leiri‑o ba we, “Ba wo Rama teo Nayofi ne mo.”

23Sɔɔl ta na wo chwoŋa ne o maa vei Nayofi to, Wɛ jworo ma chu o de baŋa ne. O maa pworisi o via konto taa o vo o yi Nayofi. 24O na yi Samuwel tei to, mo o lɔɔre o gwaaro, ye o ta wora o pworisa dɛ dem maama wone. O ma tigi da tete dem konto maama ne, se tega ba ka poore. Ko déem ke konto mo ye ba seeri sinseira kam ba we, “Sɔɔl de tɔge o wo sampwori sem wone mo na?”

Currently Selected:

1 Samuwel 19: KBG

Highlight

Copy

Compare