1 Samuwel 18
18
David de Jonatan badwoŋo kom
1Sɔɔl dedaane David ma ti ba lara yam. Sɔɔl bu Jonatan bochare dedaane David bochare déem ma ba ya meeli daane. Jonatan maa jege David swono ne o na swoi o tete tei to. 2Ko déem zege dɛ dem konto ne, Sɔɔl lɛɛre o cheiŋi David mo pa o toŋe o pa‑o. David daa wo jwoori o kwo wom sɔŋɔ. 3Jonatan na swoi David ne o na swoi o tete tei to ŋwaane, o pɛ se ba gwoni ni mo daane. 4Jonatan ma lɔɔre o gare-bwora kam, ye o kwei-ka o pa David. O ta ma le o jara gwaaro tem o kwei o pa‑o, ko woli de o se-zɔɔ kom, de o taŋa kam, dedaane o tankila kam de.
5Sɔɔl déem ná toŋe David jei selo maama ne, ko yeini ko vei yiga lanyerane mo. Konto ŋwaane Sɔɔl ma pa‑o dam o jar-keira bam tetare ne. Sɔɔl keim dem konto ma pwoli nɔɔna bam maama wo, ye ko ta pwoli o nakwa bam de wo.
6David déem na go Filisi tu wom ye jar-keira bam maa jwoori sɔŋɔ to, mo kaana nwoŋi Isarele teene dem maama wone ba ba se ba jeeri Pɛ Sɔɔl. Ba maa leeni de wopwolo, ya ba sae. Ba maa jege senyɛ ba wɔe ye ba tae kwanno.#Nwoŋim 15:20 7Ba ma di ywoni ye ba leeni ba pa daane ba we:
“Sɔɔl go o dona bam
moro de moro mo.
Se ko ná ye David,
wonto ma go o dona bam
morro fuga de fuga.”
8Sɔɔl na nigi ba leiŋa kam to, o wo déem wo dɛ ka taane dem. O bane ma zaŋe. O ma jeeli o wone o we, “Ta‑n nii tei! Ba pɛ se David go nɔɔna morro fuga fuga mo, ye ko daare amo, a go moro moro yerane mo. Ko laam nam daare paare dem mo se ba jwoŋi ba pa wonto.” 9Ko na zege dɛ dem konto ne ko maa vei to, Sɔɔl déem daa ba jege David chega. O wo ta ma gweene de David keim maama.
10Tega déem na poore to, Wɛ ma pa jwori-lɔŋɔ ba ko jwoŋi Sɔɔl de dam. O maa wo o tete diga kam ne o kare o yirisa. David maa jege o kɔnɔ kom o tae ne o na yeini o ke tei to. Sɔɔl de maa zei chichwei o jeŋa ne. 11O ma boŋe o ja we, “A lage a dole‑o mo a tane de kabira kam.” O ma dole‑o kuni belei, ye David de liisi kuni belei wom maama.
12Sɔɔl déem ma kɔre David, kolo ŋwaane Baŋa Wɛ wo David tei ne mo ye o lɔ wonto kwaga ne. 13Sɔɔl ma le jar-keira moro o ke David kwaga ne ye o pa o nwoŋi da o tei ne. David de maa yeini o to o nɔɔna bam yiga ne ye ba vo jara-keim ne. 14O ná ke woŋo kolo maama, ko vei yiga mo lanyerane, Baŋa Wɛ na wo o tei ne to ŋwaane. 15Sɔɔl ma maane we David yɔɔre o di wɔnɔ o dona maama baŋa ne. Ko ma pa o tiini o kɔre David dedɛ. 16Se ko ná ye Isarele tiina bam dedaane Judah tiina bam, banto maama swoi David mo, o na tɔge ba yiga pa se ba di ba dona to ŋwaane.
David swo Sɔɔl bukɔ o ma ke o kaane
17Dɛ dedwe mo Sɔɔl tage de David o we, “Nii a bukɔ-kwea kam Meraba. Nmo ná jaŋe Baŋa Wɛ jara yam dedaane baare, ye n jege chega n pa-ne, amo de wó pa‑m Meraba, se n ma n ke n kaane.” Sɔɔl déem tage konto ye o boŋe o tete ne o we, “Amo bá ma a tete jeŋa a ma a go David. A nam wó pa Filisi tiina bam chwoŋa se ba go‑o.”
18David ma leiri Sɔɔl o we, “Amo ye wɔ mo ye a kwo dwi dem de ye bɛ mo Isarele dwia yam wone se a wane a ji pɛ bukɔ baro?” 19Maŋa kam ma ba ka yi se ba kwei Sɔɔl bukɔ Meraba ba pa David. Ba ma jwoori ba kwei‑o ba pa Mehola tu wodwoŋi, o yere na ye Adireli.
20Sɔɔl déem ta jege bukɔ wodwoŋi, o yere na ye Mikaale. O maa lage David ni taane. Sɔɔl na lɔre ko ni ne to, o wo ma pwoli. 21Sɔɔl daa ma boŋe o tete yera ne o we, “A ná kwei Mikaale a pa David se o ma o ke o kaane, a wó wane a tɔge o ŋwaane a gane David, se Filisi tiina bam na chwoŋa se ba go‑o.” O ma ta de David o we, “Pwola ta wora se n di amo bukɔ wodwoŋi.”
22Sɔɔl ma pa o nakwa bam ni se ba soge David boboŋa ye ba we, “N kikia yam su Pɛ wom yi mo. O nakwa bam boboŋa de dɛ‑m. Konto to, sɛ se n swo o bukɔ Mikaale n ma n ke n kaane.” 23Ba ma seene ba ta botare sem konto ba bere David, ye o leiri o we, “Abam ná wo lɔre! Á boŋe we ko ye mɔle mo se nɔɔno wane o ji pɛ bukɔ baro na? Amo dae kolokolo yiga da, ye a ta ye yiniga tu.”
24Sɔɔl nakwa bam ma lwoni kolo maama David na tage to ba bere‑o. 25Sɔɔl ma jwoori o ta-ba o we, “Ta-na á bere David we, ‘Filisi tiina bam na yaare pɛ dedɛ to, o ma lage se o ŋwe jene ba baŋa ne. Konto, pɛɛre delo yerane pɛ na lage se n pa‑o o bukɔ wom ŋwaane to mo ye Filisi tiina bi fwoli-twanno.’ ” Sɔɔl déem tage konto ye o boŋe se o ja Filisi tiina bam je mo o ma o go David.
26Pɛ nakwa bam ma jwoori ba ja pɛ kwora kam ba vo David tei. David na nigi to, o wo ma pwoli de taane dem, o na wó ji pɛ wom bukɔ baro to ŋwaane. Kadiri dɛ dem na lage de yi to, 27dedaane David lwoori o zaŋe de o nɔɔna bam ye ba vo ba go Filisi tiina bia yalei. O ma ja Filisi tiina fwoli-twanno tem o ba o jeeli te ni ne o bere Sɔɔl, se o wane o ji Pɛ tembaaro. Sɔɔl ma ga ga o kwei o bukɔ Mikaale o pa David se o ma o ke o kaane.
28Sɔɔl ma lɔre jaja we Baŋa Wɛ mo wo David tei ne. O ta ma maane we o bukɔ Mikaale seene o swoi David. 29Ko laam ma fɔge ko pa o tiini o kɔre‑o. Sɔɔl ma lɛɛre o done David taa, se ko yi o toone.
30Filisi jar-keira bam déem yeini ba tui ba ke jara mo de Isarele tiina bam ba ba yaga. Sɔɔl jar-keira yiga tiina bam maama wone David mo di Filisi tiina bam se ko dwoni ba maama. Ko ma pa David yere jage jei maama ne.
Currently Selected:
1 Samuwel 18: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
