1 Samuwel 16

Samuwel le David se o jwa ba o ji pɛ

1Dɛ dedwe mo Baŋa Wɛ tage de Samuwel o we, “Amo maŋe a ve Sɔɔl we, o daa bá taa ye Isarele tiina pɛ. N nam wó keeri o ŋwaane taa se n vo n maŋe yei ne mo? Zaŋe n kwei n kwara kam n su-ka de nuga, se n daare n vo Jesse sɔŋɔ Bɛtelehem ne. Kokuri to, amo kuri o bia bam dedoa mo se o ji pɛ.”

2Samuwel maa we, “Amo wó ke tetɛ mo a vo a ke konto? Sɔɔl ná niga, o wó go-ne mo.” Baŋa Wɛ ma leiri‑o o we, “Ja na-chwɛ n woli da, se n laam ta we n tu se n ke kaanem mo n pa Baŋa Wɛ. 3Ta daare n bwoŋi Jesse se o ba o taa wo kaanem dem wone. Amo wó bere‑m n na wó ke kolo ye a pa se n lɔre wolo a na kuri se o ji pɛ to. N ma n ná nɛ kotu mo n jege se n lwo nuga o yuu ne, se n tiŋi‑o paare.”

4Samuwel ma ke kolo Baŋa Wɛ na bere to, ye o vo Bɛtelehem. O na yi da to, teo kom nakwa ma nwoŋi ba jeeri‑o ye ba yera sae. Ba ma bwei‑o ba we, “Ko ye ywoni mo ye n vei n beene na?” 5Samuwel ma leiri-ba o we, “Ɛɛ, a tu de ywoni mo. Amo tu ywo se a ke kaanem mo a pa Baŋa Wɛ. Kwɛ-na á tete, se á ba á gwaane de amo se dé ke kaanem dem.” O ma vo o le Jesse de o bia bam pa ba kwɛ ba tete ye o daare o bwoŋi-ba se ba vo kaanem dem jeiga.

6Jesse dedaane o bia bam na yi da to, Samuwel ma na o bu-kwea Eliabi. O ma ta o wone we, “N nɛ naa n wo nɛ, baaro wonto na zege Baŋa Wɛ yiga ne to mo ye wolo o na kuri se o tiŋi pɛ to.” 7Baŋa Wɛ ma ta de Samuwel o we, “Yé jeeli n daŋe baaro wom yibia pwooni na ye tei to baŋa ne, naa o na ye nɔn-wagele to ne. Amo ve wonto mo. Amo Baŋa Wɛ ba nii wonnu o nae-te nenɛɛne nabiina na nae tei to. Nabiina nii ba nae pwooni yiga kam mo, Baŋa Wɛ nam nii o nae bochare-yi dem ne mo.”#Lei 147:10-11

8Jesse laam ma bwoŋi o bu Abinadaba o pa o vo Samuwel tei se o na‑o. Samuwel ma ta o we, “Baŋa Wɛ wo kuri wonto de.” 9Jesse daa ma toŋe Samma o tei ne. Samuwel ta maa we, “Baŋa Wɛ wo kuri wonto de.” 10Jesse bere o pa o bia barepɛ maama mo vo Samuwel tei ba da o yiga ne ba kɛ, ye Samuwel we, “Baŋa Wɛ wo kuri banto wolowolo.” 11O laam ma ga ga o bwei Jesse o we, “Nmo bia bam maama mo konto na?” Jesse ma ta o we, “Jeŋa-bu wom mo daare. Wonto nam wo pei sem kwaga ne mo o yere-se.” Samuwel maa we, “Toŋe n bwoŋi‑o se o ba. Wonto ná wo tu ywo-seeni, dé bá wane dé ke kaanem dem se dé di.”

12Jesse ma pa ba bwoŋi o jeŋa-bu David ye o ba. O maa ye lanno ye yazura yi‑o lanyerane. O yibia ta maa pwomma. Baŋa Wɛ ma ta de Samuwel o we, “Zaŋe n lwo nuga o yuu ne, se wonto mo a kuri.”#1 Samuwel 9:17 13Samuwel ma kwei kwara kam de ka wo nuga o lwo David yuu ne, o chorro tem yibia ne. Sento nɛ sem ni ne mo Baŋa Wɛ Jworo chugi David baŋa ne de dam. Ko maa wo o tei ne taa, ko zege dɛ dem konto ne se ko taa via. Samuwel laam ma jwoori o vo Rama.

David toŋa o pae Pɛ Sɔɔl

14 Baŋa Wɛ Jworo ma nwoŋi ko daare Sɔɔl. Baŋa Wɛ ma leiri o kwei jwori-lɔŋɔ o pa ko yeini ko daane‑o. 15Sɔɔl tontoŋena bam ma ta‑o ba we, “Dé maane we Wɛ mo pɛ se jwori-lɔŋɔ ba ko jege‑m ko daana. 16Pɛ, dé ye nmo tontoŋena mo. Konto, yage se dé beeri jei sem maama ne dé nii wolo na wae o tae kɔnɔ chekke to. Baŋa Wɛ ná pɛ se jwori-lɔŋɔ kom ba n baŋa ne ye kotu ná tage o kɔnɔ kom, nmo wo wó to.” 17Sɔɔl ma pa-ba ni o we, “Kwaane-na á beeri nɔɔno wolo na tae kɔnɔ lanyerane to á ja á ba á pa-ne.” 18Sɔɔl tontoŋena bam dedoa ma leiri o we, “Amo nɛ nɔɔno wodwoŋi, o ye Bɛtelehem tu Jesse bu mo. O yei kɔnɔ tam lanyerane. Nɔɔno wom ye babea ye o yei jara keim. O ni taane de ywomma, ye o yibia pwomma. Baŋa Wɛ maa wo o tei ne.”

19Sɔɔl ma toŋe kwora Jesse tei ne ye o we, “Nmo bu David wolo na yere n pei sem to mo a laga. Pa o ba a tei.” 20Jesse ma ja bonaga o daare o kwei bworobworo, dedaane lɔɔ de ko wo sana, de bo-chwɛ o daŋe ka baŋa ne. O ma toŋe o bu David se o ja o vo o pa Sɔɔl.

21Ko ke konto mo ye David da o zo Sɔɔl tontoŋena bam wone. Sɔɔl déem maa tiini o swoi David. O ma le‑o se o taa ye wolo na wó taa zei o jara zela yam to. 22Sɔɔl ma toŋe kwora o pa Jesse o we, “Amo wo tiini ko pwoli de n bu David. Konto to, yage se o maŋe a tei ne o taa toŋa o pa-ne.”

23Maŋa kalo maama Wɛ ná yeini o pa jwori-lɔŋɔ kom zo Sɔɔl, David wó ta o kɔnɔ kom mo. Konto ná yeini ko ke, Sɔɔl wo wó to mo, ye ko gara ko pa‑o. Jwori-lɔŋɔ kom maa yeini ko viiri ko daare‑o.

Currently Selected:

1 Samuwel 16: KBG

Highlight

Copy

Compare