1 Samuwel 15

Baŋa Wɛ pɛ Sɔɔl paare dem ti

1Samuwel déem tage de Sɔɔl o we, “Ko ye amo mo Baŋa Wɛ pɛ ni se a tiŋi nmo se n di paare o nɔɔna Isarele tiina bam baŋa ne. Konto to, cheigi kwora kalo Baŋa Wɛ na jege se o pa‑m to. 2Paŋwa Tu Baŋa Wɛ we:

‘A lage a waare Amaleki tiina mo ba déem na toŋe tei de Isarele tiina bam to ŋwaane. Maŋa kalo Isarele tiina bam na nwoŋi Ejipti ne ba maa beene to, Amaleki tiina bam chege ba chwoŋa ye ba jeeri-ba de jara mo.#Nwoŋim 17:14 3Konto to, vei n kwaare jara dedaane Amaleki tiina bam. Yɔɔre n chɔge-ba de ba woŋo maama. Yé ja ba ŋwaŋa. Go-na ba baara, de ba kaana, de ba bia, de ba bu-sese, ko woli de ba naane, de ba pei, de ba kona, de ba bonɛ.’ ”

4Sɔɔl ma bwoŋi o jar-keira bam o ke daane pa ba jeeri Telayim ne. Jar-keira morro fuga (10,000) mo nwoŋi Judah dwi dem ne. Nɔɔna morro bia yalei (200,000) de maa nwoŋi Isarele dwia yadaara yam ne. 5Sɔɔl laam ma da o kɔgɔ kom yiga ye ba vo Amaleki tiina teo kom. Ba ma vwɛ nabara kadwoŋi ne, ye ba cheigi se ba nwoŋi da ba zaŋe Amaleki tiina bam baŋa ne. 6Keni dwi tiina de déem zoore jei sem konto ne. Sɔɔl ma pa-ba kwora o we, “Maŋa kalo Isarele tiina bam na nwoŋi Ejipti ne ba maa kɛ to, abam kwoa déem ke-ba lanyerane. Konto to, zaŋe-na á vo yiga á daare Amaleki tiina bam, se a lage a chɔge ba maama mo. Ko nam dae se abam de da á te.” Keni tiina bam ma seene ba vo dáa ba daare Amaleki tiina bam.

7Sɔɔl laam ma jeeri Amaleki tiina bam de jara ye o di-ba. Jara yam bobo Havila ne mo ya vei taa ya yi Sura na wo Ejipti teo wɛ-puli seeni to. 8O ma ja Amaleki tiina pɛ Agagi ye o ta ŋwe. Se ko ná ye Amaleki teo nɔɔna bam maama, o go-ba mo nyɔ! 9Ko daare, Sɔɔl de o nɔɔna bam déem wo go pɛ Agagi. Ba ma yage teo kom vare-ŋona bam, naane de pei maama. Ba wo sɛ se ba go-te. Ko daare ko ná ye wo-kokware sem de telo na ba jege kuri to, ba yɔɔre ba chɔge tento maama mo nyɔ!

10 Baŋa Wɛ ma ta de Samuwel o we, 11“A wo chɔge mo, de a na pɛ Sɔɔl ji pɛ to. O lɔge amo kwaga ne mo, ye o ba sɛ se o ke a ni dem ne.” Samuwel wo ma pɛ, ye o tiini o lwoori Baŋa Wɛ tete dem maama ne o poore tega.

12Samuwel ma gwoni tega o zaŋe se o vo o beeri Sɔɔl jei. Ba ma ta ba bere‑o we, Sɔɔl vei Kamele mo, o nam chwi kandwɛ-kamunu mo o zege da se ko pa o na yere. Ba ta we, o na zege dáane to, o laam vei Giligal mo. 13Samuwel ma vo o yi Sɔɔl tei. Sɔɔl ma ware‑o o we, “Baŋa Wɛ swolim taa wo n yuu ne. Amo ke a tɔge Baŋa Wɛ ni dem chekke.” 14Samuwel ma bwei‑o we, “Chega? Bɛ nam daa mo ke ye a ni naane dem dedaane pei sem keira konto?” 15Sɔɔl ma leiri‑o o we, “Jar-keira bam mo vere vare-ŋona banto Amaleki tiina jeŋa ne ba ja ba se ba ma ke kaanem ba pa nmo Tu Baŋa Wɛ wom. Ko daare kolo maama laam na daare to, dé yɔɔre dé chɔge-te mo kula!” 16Samuwel ma bage‑o o we, “Pu n ni konto, se a ta kwora kalo Baŋa Wɛ na pɛ-ne diim tete ne to a bere‑m.” Sɔɔl ma leiri o we, “A nam cheiga.”

17Samuwel laam maa we, “Nmo ya maŋe n nii n tete we, n dae kolokolo yiga da. De ko de, Baŋa Wɛ nam mo pɛ n ji Isarele dwi tiina bam maama yiga tu. O ma tiŋi‑m se n ta‑n ye ba pɛ. 18Wonto mo pɛ‑m totoŋe se n toŋe, ye o we n véi n yɔɔre n chɔge Amaleki tiina bam, ba na ye puseŋ-nyena to ŋwaane. O bere‑m se n ke jara yam taa se ko taa nii n na ti ba maama to. 19Bɛ nam mo ye n wo sɛ o ni dem? Bɛ mo ke ye n ke lela n vo n pɛ ba jejegero tem se n ta‑n jega? Nmo toŋe lwarem mo n chɔge Baŋa Wɛ yiga!”

20Sɔɔl ma leiri o we, “Ko ná ye chega, amo ke Baŋa Wɛ ni dem mo chekke. A dɛ chwoŋa kalo o na toŋe-ne se a da to. A ma yɔɔre a chɔge Amaleki tiina bam, ye a daare a ja ba pɛ Agagi a ba ywo-seeni. 21Dé nam na di-ba to, mo a nɔɔna bam kuri pei selo na lamma to, dedaane naane delo na lamma to, ba le wonnu telo na maŋe de chɔgem to wone. Ba nam jaane-te ba ba Giligal ywo-seeni mo, se ba ma ba ke kaanem mo ba pa nmo Tu Baŋa Wɛ wom.”

22Samuwel maa we, “Kɔ mo pwoli Baŋa Wɛ wo? N ná sɛ kwora kalo o na pɛ‑m se n ke to mo naa n ná zwɛ vara ye n pae pɛɛra n ma n ke kaanem n pa‑o mo, kɔ mo gara? Nii-ywo! N ná sɛ Wɛ ni, konto gare n ná ke kaanem delo dwi maama n pa‑o.#Lei 40:6; 51:16-17; Kwor-tɛɛno 5:1; Izaya 1:11; Mika 6:6-8 23N ná lɔge Wɛ kwaga ne, konto de yi-nɛɛre ye bedwe mo. Yi-dɛɛre-nyem dedaane jwo-kaano de maa ba gare daane. Nmo na ve Baŋa Wɛ kwora kam to, o de ve‑m we n daa‑n bá‑n taa ye pɛ.”

24Sɔɔl ma leiri Samuwel o we, “Chega to, amo ke wɛleere. A ve Baŋa Wɛ kwora kam. A wo sɛ nmo na bere-ne se a ke tei to. A nam ya kɔre a nɔɔna bam mo, pa a ke banto na lage tei to. 25A nam lwoori‑m se n yage a wɛleere n ma n chɛ-ne, se n daare n da dedaane amo se dé jwoori sɔŋɔ, se a daa wane a zuli Baŋa Wɛ.” 26Samuwel ma leiri‑o o we, “Amo bá tɔge‑m a jwoori. Kokuri to, nmo ve Baŋa Wɛ kwora kam pa o de ve‑m we, n daa‑n bá‑n taa ye Isarele tiina pɛ.”

27Samuwel laam ma pipiri se o viiri. Sɔɔl ma ja o gɔrɔ kom ni dem seeni ye ko kaare. 28Samuwel ma ta‑o o we, “Nii! Baŋa Wɛ zem jwoori o jwoŋi Isarele tiina paare dem na wo n jeŋa ne to mo o daare‑m. O ma kwei-de o pa n dwoŋi wolo na gare‑m to. 29Isarele tiina Nenɔŋ-fɔrɔ Tu Baŋa Wɛ wom ba fɔe vwa, o taane de maa ba gɔe de yaga. Kokuri to, o dae nabiin-zwona, se o taa zae o ni.”#Jeelim 23:19 30Sɔɔl ma leiri o we, “Amo seene a ke wɛleere. De konto maama de, yé pa a na a chaveera Isarele nakwa bam dedaane ba kɔgɔ kom maama yiga ne. Nam jwoori n da de amo se a vo a zuli n Tu Baŋa Wɛ wom.” 31Samuwel ma sɛ. O ma da de Sɔɔl o jwoori pa Sɔɔl vo o zuli Baŋa Wɛ.

32Samuwel laam ma ta o we, “Ja-na Amaleki tiina pɛ Agagi á ja á ba ywo-seeni.” Agagi ma zaŋe o vo o yi o tei de baare ye o boŋe o wone we, “Cham de toone daa bá yi-ne.” 33Samuwel maa we, “Nmo mɛ n se-zɔɔ mo n pa kaana dedɛ ga ba bia. Konto chwoŋa kam ne mo nmo de nu wó ga o bia.” O ma zege Baŋa Wɛ yiga ne o kwei o se-zɔɔ kom o cha Agagi mura-mura Giligal ne.

34Samuwel ma jwoori o vo Rama. Sɔɔl de ma jwoori sɔŋɔ o tete teo Gibea ne. 35Samuwel daa wo jwoori o vo o na Sɔɔl se ko yi o toone. Sɔɔl totoŋ-naga déem za pɛ Samuwel yiga nyɔne dedɛ. Baŋa Wɛ de wo déem chɔge mo de o na pɛ Sɔɔl di paare Isarele tiina baŋa ne to.

Currently Selected:

1 Samuwel 15: KBG

Highlight

Copy

Compare