1 Samuwel 14

1Dɛ dedwe mo Sɔɔl bu Jonatan tage de nɔn-doŋo wolo na yeini o zei o jara zela yam to o we, “Pa se dé bɛ dé vo mɛ Filisi tiina jar-keira bam na vei ba tigi to.” O nam wo pɛ se o kwo Sɔɔl lɔre ko ni ne.

2Sɔɔl déem maŋe Gibea teo kom laŋa kam seeni mo. O maa jei Pomegara tio kodwoŋi na wo Migoron ne to kuri ne. Jar-keira balo na daare ba maŋe o tei ne to maa ye nenɛɛne bia yaredo. 3Nɔɔna bam konto wone dedoa déem ye Ahituba bu Ahija. O maa ye Wɛ kaanem tu ye o jege kaanem gare-wogo kom. Ahituba déem ye Ikaboda choro de Finehase bu mo, ye o ta ye Eli naa. Eli déem ya ye Baŋa Wɛ kaanem tu Siloo ne mo. Nɔɔna bam maama nam wo lɔre we Jonatan nwoŋi ba tei ne.

4Chwoŋa kam na wo Mikimasa zwonnu tem ne ye Jonatan jeeli se o tɔge da o kɛ o vo o yi Filisi tiina jar-keira bam tei to, déem tigi pe-kamunnu telei tetare ne mo. Te dedoa yere déem mo ye Bozezi, ye kodwoŋi kom yere ye Senɛ. 5Peo dedoa déem jeeri baŋa seeni daa kam mo, ye ko yɔɔre Mikimasa. Kodwoŋi kom de maa wo tega-kuri seeni daa kam ne, ye ko yɔɔre Geba.

6Jonatan ma ta de nɔn-doŋo wolo na zei o jara zela yam to o we, “Nam pa dé bɛ dé yi nɔn-kafɛ tento na wo mɛ to! Dɛ delo Baŋa Wɛ wó woli debam se dé wane-ba. Baŋa Wɛ ná lage o jwoŋi o nɔɔna bam o yage, kolokolo bá cheiŋi‑o. Dé ná daga naa dé ná muri de, ko maama ye bedwe mo Wɛ tei ne.” 7Nɔn-doŋo wom ma leiri‑o o we, “Ke kolo maama n na boŋe n ja se n ke to, se a zege n kwaga ne de a wo maama.” 8Jonatan maa we, “Nam pa dé fɔɔre dé vo dé bere dé tete Filisi tiina bam. 9Ba ná tage ba bere debam we, ‘Ta‑á zege-na á cheigi debam se dé beene á tei’, de wó maŋe da mo, de bá di dé yi ba tei. 10Ko daare ba ná tage we, ‘Titwoni-na á di peo kom á ba-na ywo-seeni’, dé wó di dé yi-ba mo. Konto wó bere we Baŋa Wɛ mo seene o kwei-ba o ke debam jeŋa ne.”

11Banto balei bam ma vo ba zege mɛ Filisi tiina bam na wó na-ba to. Filisi tiina bam ma ta ba bere daane ba we, “Nii-na! Hiburu tiina bam laam wora ba pi ba nwoŋi bɔɔna yalo ba ya na seigi da to wone mo.” 12Ba laam ma tɔɔle ba ta Jonatan dedaane nɔn-doŋo wom ba we, “Tutwoni á yi-na ywo-seeni, se dé wane dé bere abam woŋo.” Jonatan ma ta o tontoŋeno wom o we, “Ta‑n tɔge a kwaga n diini, se Baŋa Wɛ mo ke nɔɔna bam konto Isarele tiina bam jeŋa ne.”

13Jonatan laam ma gwane o di peo kom, ye o tontoŋeno wom tɔge o kwaga. O ma jeeri Filisi tiina bam de jara o mage o de tega ne. O ná mage wolo o de tega ne, nɔn-doŋo wom wó tɔge o kwaga o go kotu. 14Ba na dɛ yiga ba jeeri Filisi tiina bam de jara konto to, Jonatan de o tontoŋeno wom déem go nɔɔna finlei mo jeiga dedoa ne, ka wo gaale naba-laara fintɔ.

15Foone ma tiini de ja Filisi tiina jar-keira balo maama déem na wo pwola ne to, de balo na nwoŋi vero ŋwaane to, de balo na yere ba tigisim jei to, de ba teo kom nɔn-bia bam maama. Tega kam ma ziziŋi, kokuri to Baŋa Wɛ mo ke se foone dem konto taa wora.

16Sɔɔl nɔɔna balo na zege Gibea ne ba tole ba nii kolo na wora ko ke to ma na we, Filisi tiina bam jage mo ye ba duri jei maama ne. 17Sɔɔl laam ma ta o nɔɔna bam maama o we, “Jeeli-na dé nɔɔna bam maama ni, se dé lɔre balo na tere ywo-seeni to.” Ba na jeeli ba ti to, mo ba maane we Jonatan de nɔn-doŋo wolo na zei o jara-keim zela yam to mo tera. 18Wɛ kaanem tu Ahija déem na jege kaanem zela yam o tei ne to, Sɔɔl ma ta ded‑o o we, “Ja gare-wogo kom n fɔɔre n yi ywo-seeni se dé bwei Baŋa Wɛ dé nii dé wó ke tɛ mo.” 19O ta na wora o ŋɔɔne de kaanem tu wom konto to, ba ma ni vuvuga sɔɔ na tiini ko zaŋe Filisi tiina bam tigisim jei sem ne. Sɔɔl ma ta‑o we, “Le n jeŋa gare-wogo kom ne. Maŋa daa tera se dé bwei Baŋa Wɛ dé nii.”

20Sɔɔl dedaane o jar-keira bam maama ma ke daane ba yɔɔre Filisi tiina bam jei sem se ba kwaare jara de-ba. Ba ma vo ba na we vuvuga tiini ka to Filisi tiina bam wone ye ba kwaare jara da-baŋa ne. 21Hiburu tiina balo ya na tɔge de Filisi tiina bam ba ke jara yam ba woli-ba to laam ma jwoori ba lɛɛne ba pu Isarele tiina balo na wo Sɔɔl de Jonatan tei ne to. 22Ko daare Isarele tiina balo ya na seigi Efrayim zwonnu laŋa kam ne to de ma ba ba ni we, Filisi tiina bam kwaane ba duri se ba lu Isarele tiina jeŋa ne mo. Ba de ma nwoŋi ba tɔge ba pare-ba de fora. 23Ba déem pɛ Filisi tiina bam konto ba pu mo taa ba vo ba gaale Bɛte-Aven. Mo chwoŋa kalo wone Baŋa Wɛ déem na dɛ o ma o jwoŋi Isarele tiina bam o yage dɛ dem konto ne to.

Jara yam kwaga kikia

24Dɛ dem konto ne mo Isarele tiina bam yera tiini ya bwona, kana na jege-ba to ŋwaane. Kokuri to, Sɔɔl déem ya dugi duuri mo ye o daare o pa ni dento o nɔɔna bam o we, “Wolo maama ná di wodiu zem ko lwoori wɛ-zoore maŋa ye a ta wo yiri a jene a dona bam baŋa ne, se sɔɔlem taa wo kotu yuu ne.” Ko ma pa se dɛ dem konto, o nɔɔna bam wolowolo wo laŋe wodiu o ni ne.

25Sɔɔl jar-keira bam maama ma tɔge gaao wone, mɛ teeni na gaale to ba kɛ. Ba ma na we tooro mo wora jei sem maama. 26Ba na dɛ da ba kɛ ye ba na tooro tem konto to, ba wolowolo wo laŋe-te. Sensɔla kam mo ba déem kɔre. 27Ko daare Jonatan déem wo nigi we o kwo dugi mo o pa nɔɔna bam. O ma kwei o nacheiga kam o twe o ma laŋe to-nuga. O laam ma weeri de o jeŋa o di. O yera ma daŋe, ye o ta wara. 28Nɔɔna bam dedoa ma ta de Jonatan o we, “Nmo kwo nam dugi mo o yage dé jar-keira bam baŋa ne we, ‘Lɛɛro taa wo wolo maama na wó di wodiu zem to baŋa ne.’ Ko ye konto ŋwaane mo dé maama bwona tento ye kana jege debam.” 29Jonatan ma ta o we, “Chega to, a kwo pɛ ko zo á maama yera chekke. Nii a na di tooro tem fenfee ye a jwoori a na dam tei! 30Dé nɔɔna bam ya ná nɛ chwoŋa se ba di wodiu kolo maama ba na vere Filisi tiina bam tei ne to, ko ya bá taa gare na? Tento ba ya wó na dam se ba go Filisi tiina bam dedɛ ba dwoni ba zem na go tei to.”

31Dento dɛ dem ne, Isarele tiina bam zege Mikimasa ne ba pare Filisi tiina bam taa ba vo ba yi Ayijalon. Ba na wane-ba ba ti konto to, dedaane ba yera yam bugi dedɛ kana ŋwaane. 32Ba ma ke lela ba pɛ wonnu telo ba na vere Filisi tiina bam tei ne to se ba na wodiu ba di. Ba ma go pei, de naane, de na-mɔre, ba daare ba jege nɔna yam ba buri ba di gweeni, ye vara bam jana wo lwoori ba lu tega ne.

33Nɔɔna ma ta Sɔɔl ba we, “Nii debam nɔɔna bam na ke wɛleere delo Baŋa Wɛ yiga ne. Ba jege nɔna mo ba done de ya yera jana.” Sɔɔl ma ta o we, “Abam chɔge á chega de Baŋa Wɛ. Bibili-na kandwɛ-kamunu á ja á ba ywo-seeni á pa-ne.” 34O daa ma ta o we, “Véi-na á da nɔɔna bam wone á ta se ba maama ja ba naane dedaane ba pei sem ba ba ywo-seeni. Ba jege se ba go vara bam maama kandwɛ dem baŋa ne ba daare ba di ywo mo. Ko dae se ba done nɔna yam de ya yera jana ba ma ke wɛleere Baŋa Wɛ yiga ne.” Tete dem konto ne, nɔɔna bam maama ma ja ba vara ba ba ba go dáane. 35Sɔɔl de ma lɔ kaanem bimbini se o ma o zuli Baŋa Wɛ. Mo bimbini delo o na dɛ yiga o lɔ o pa Baŋa Wɛ to.

36Sɔɔl ma ta de o nɔɔna bam o we, “Nam pa-na se dé vo dé pare Filisi tiina bam tete dento wone se ko taa nii te-pora maŋa ne. Dé wó go-ba ye dé daare dé vere ba zela. Dé yé daare nɔɔno dedoa de.” Ba ma leiri‑o ba we, “Ke kolo maama n na boŋe n ja se n ke to.” Kaanem yiga tu wom ma ta o we, “Yage-na se dé bwei Baŋa Wɛ se dé lɔre o boboŋa.” 37Sɔɔl ma bwei Wɛ o we, “A ja jara a jeeri Filisi tiina bam se n pa dé di-ba na?” Baŋa Wɛ maa wo leiri‑o dento dɛ dem ne.

38Ko ma pa Sɔɔl ta de Isarele jar-keira yiga tiina bam o we, “Á ba-na ywo se dé lɔre wɛleere dwi dɔ mo dé ke zem. 39A dugi dedaane Ŋwea Tu Baŋa Wɛ na pae Isarele tiina di ba jara to a we, wolo maama na ke wɛleere dem to wó te mo. Ko ná maŋe ko ye amo bu Jonatan de, o bá lu.” O na tage konto to, ba maama wone nɔɔn-nɔɔno wo leiri taane.

40Sɔɔl laam ma ta de Isarele jar-keira bam o we, “Abam maama véi-na dáa á zege kɔgɔ dedoa, se amo de a bu Jonatan de zege ywo-seeni.” Nɔɔna bam ma sɛ ye ba we, “Ke kolo nmo na boŋe n ja se n ke to.” 41Sɔɔl ma lwoori Isarele tiina Baŋa Wɛ wom o we, “Popo, bere-ne woŋo kolo ŋwaane n na wo leiri debam lworo kom zem to. Ko ná ye amo, naa a bu Jonatan yiga mo, pa se Yurim kandwɛ dem bere. Ko nam ná ye Isarele tiina kɔgɔ kom yiga mo, se n pa Tumim kandwɛ dem bere.”#Jeelim 27:21 Jɔrɔ kom ma ja Jonatan de Sɔɔl, ye ko yage Isarele tiina kɔgɔ kom. 42Sɔɔl daa ma ta o we, “Laam pa Wɛ kuri amo de a bu Jonatan tetare ne.” Jɔrɔ kom ma le Jonatan.

43Sɔɔl laam ma bwei o bu wom o we, “Nmo ke bɛ mo n sa chwoŋa?” Jonatan ma ta o we, “Amo mɛ a nacheiga ni mo a laŋe tooro fenfee a di. Konto to, a nam jege se a te mo na?” 44Sɔɔl ma ta o we, “Jonatan, lɛɛro taa wo amo yuu ne nenɛɛne a ná wo pɛ se n te!”

45Isarele jar-keira bam ma ta de Sɔɔl ba we, “Konto bá ke! Ko dae Jonatan mo jaane wɔnɔ-kamunu konto o ba o pa debam Isarele tiina bam na? Debam dugi de ŋwea Tu Baŋa Wɛ yere dem we Jonatan yu-yua dedoa tete bá gɔ o yuu ne. Ko ye Wɛ mo woli‑o pa o ke kolo maama o na ke zem to!” Ko déem ke konto mo ye Isarele tiina kɔgɔ kom jwoŋi Jonatan momwɛ ba yage, ye o daa wo tege.

46Sɔɔl laam ma yage Filisi tiina bam zeilim. Filisi tiina bam ma jwoori ba tete teo.

Sɔɔl na di paare ye o ke kolo to

47Sɔɔl na tu o di paare Isarele tiina baŋa ne o ti to, o déem ke jara mo dedaane ba dona bam maama. Banto maa ye Moaba tiina, de Amon tiina, ko woli de Edom dwi tiina bam, de pwa balo na tei Zoba laŋa kam, dedaane Filisi tiina bam. O déem na jeeri balo maama to, o yeini o di-ba mo. 48Ko ta ná ye Amaleki tiina bam, o tiini o ke baare o wane-ba. Ko ma pa se o jwoŋi Isarele tiina bam o yage balo maama déem na jege-ba ba vere to jeŋa ne.

49Sɔɔl déem jege bakeiri setɔ mo: Jonatan, de Isivi, dedaane Maliki-Sua. O bukɔ-kwea yere mo ye Meraba, bukɔ-balaŋa kam yere maa ye Mikaale. 50O kaane wom déem ye Ahimaazi bukɔ mo, o yere ye Ahinoam. Nera bu Abenera déem mo ye Sɔɔl jar-keira bam yiga tu wom. Nera nam ta ye Sɔɔl kwo choro mo. 51Sɔɔl kwo Kisi dedaane Abenera kwo Nera maama kwo mo ye Abiyeli.

52Maŋa kalo maama Sɔɔl na ŋwe to, tigura dedɛ ma ke Isarele tiina bam dedaane Filisi tiina bam laŋa ne. Sɔɔl déem ná maane we nɔɔno wolo dana ye o ta jege baare, o wó pa kotu da o zo o jar-keira kɔgɔ kom wone mo.

Currently Selected:

1 Samuwel 14: KBG

Highlight

Copy

Compare