1 Samuwel 13

Sɔɔl ve Baŋa Wɛ ni dem

1Sɔɔl déem jege bena fintɔ#13:1 fintɔ wo popone Hiburu twanno tem wone. mo ye o bobo se o di paare. O déem nam di paare Isarele tiina baŋa ne bena finna-yalei mo.#13:1 finna wo popone Hiburu twanno tem wone.

2Sɔɔl déem ma kuri Isarele tiina bam wone nɔɔna morro tetɔ se ba taa wo o tei ne. Nɔɔna morro telei ma maŋe Mikimasa ne, ko woli de Bɛtel zwonnu laŋa kam ne. Nɔɔna moro de maa wo o bu Jonatan tei ne. Banto ma vo Gibea na wo Benjamin laŋa kam ne to. Sɔɔl ma pa Isarele tiina jar-keira balo maama na daare to jwoori ba sam.

3Jonatan déem ma vo Gibea mɛ Filisi tiina jar-keira kɔgɔ kodwoŋi na gilimi to. O na yi da to, o ma jeeri-ba de jara ye Filisi tiina bam maama ni ko ŋwa. Sɔɔl de ma pa ba wu nabwanno Isarele teo kom maama wone se Hiburu tiina bam nwoŋi jara keim ŋwaane. 4Isarele tiina bam ma ni we Sɔɔl mo wane Filisi tiina jar-keira kɔgɔ kolo na wo Gibea ne to o zeili. Konto nam mo pɛ Isarele tiina bam kikia maama lwoi Filisi tiina bam momwa ne. Isarele tiina jar-keira bam maama ma sɛ Sɔɔl kwora kam ye ba vo ba jeeri‑o Giligal ne.

5Filisi tiina bam de déem ma bwoŋi ba jar-keira bam se ba nwoŋi ba kwaare jara dedaane Isarele tiina bam. Ba jara torokooro déem ye morro tetɔ (3,000) mo. Balo na diini sisein-nɔɔna to maa ye morro teredo (6,000). Ba jar-keira maama ni déem ware de ga de ti. Ba daga dedɛ nenɛɛne naneo ni kasolo mo tei. Ba ma tɔge daane ba vo Mikimasa ba chwi ba vwoa da. Jei sem konto jeeri Bɛte-Aven wɛ-puli seeni mo. 6Isarele tiina bam ma na we ko tiini ko zo ba yera, Filisi tiina bam na jege-ba ba peene to ŋwaane. Ba ma duri ba vo ba seigi peero bɔɔna wone, de punnu wone, de gugworru wone, de gwonnu wone, de vola wone se ba wane ba lu. 7Ba badwonna bere ba bɛ Jɔdan buga kam ye ba zo Gad dedaane Gilead laŋa kam ne mo.

Sɔɔl ma maŋe Giligal ne. Foone ma ja nɔɔna balo na wo o tei ne to pa se ba yera sae pɔm-pɔm. 8O déem peene mo se o cheigi Samuwel na wó ba maŋa kalo to. O ma cheigi da yarepɛ ne Samuwel na tage tei to. Samuwel yuu na ba nae to, Sɔɔl nɔɔna bam laam ma bobo se ba jage ba daare‑o. 9Sɔɔl ma ga ga o we, “Ja-na zwɛɛm pɛɛra yam dedaane yazura pɛɛra yam á ba á pa-ne.” O na jwoŋi-te nɔɔna bam tei ne to, mo o kwei varem wom o wora o zwɛ o ma o ke kaanem. 10O na yɔɔre o ti kaanem dem to dedaane Samuwel dɛ o yi da. Sɔɔl ma vo se o jeeri‑o o daare o zaane‑o.

11Samuwel ma bwei Sɔɔl o we, “Bɛ mo konto n kea?” Sɔɔl ma leiri‑o o we, “Maŋa kalo nmo na pɛ se n ba to na yia ye n ta wo tu to, amo nɔɔna bam ya wora ba jage ba daare-ne. Filisi tiina jar-keira bam de ma jeeri daane Mikimasa ne se ba kwaare jara dedaane debam. 12Amo ya ta maa jege lwia we ba wó ba Giligal ywo-seeni ba zaŋe a baŋa ne, ye a ta wo lwoori Baŋa Wɛ zeinim jara yam ŋwaane. Konto to amo boŋe we ko fee mo se a ke lela a ke kaanem dem.”

13Samuwel ma ta o we, “Nmo tiini n toŋe jworim dedɛ. Nmo wo tɔge ni delo nmo Tu Baŋa Wɛ na pɛ‑m se n da to. N ya ná dɛ-de chekke, Baŋa Wɛ ya wó pa nmo de n dwi dem di paare Isarele tiina baŋa ne, se ko taa vei wuu. 14Nam nii! N paare dem daa bá taa wora taa. Baŋa Wɛ maŋe o beeri o na nɔɔno wolo kikia na dɛ o wo to, ye o laam wó pa wonto mo taa nii o nɔɔna bam baŋa ne, nmo na wo dɛ Baŋa Wɛ ni dem to ŋwaane.”

15Samuwel ma zege Giligal ne o kwei o chwoŋa o maa kɛa. Nɔɔna balo ta na wo Sɔɔl tei ne to ma tɔge ded‑o ba vo Gibea na wo Benjamin laŋa kam ne to. Sɔɔl ma jeeli ba ni daane, o na we ba ta yi nɔɔna bia yaredo (600).

16Sɔɔl de o bu Jonatan dedaane ba kɔgɔ kom maama maa maŋe Benjamin teo Gibea ne ba tiga. Filisi tiina bam de maa maŋe Mikimasa ne ba tiga. 17Filisi tiina jar-keira badwonna ma zege ba na gilimi mɛ to ne ba pɔɔre ba tete kuni betɔ. Ba maa yeini ba nwoŋi se ba taa mage ba dona ye ba vere ba wonnu. Popɔra dedoa déem kwei Ofera chwoŋa kam na wo Suwali laŋa kam seeni to mo. 18Ba popɔra kadwoŋi de ma kwei Bɛte-Horon chwoŋa kam, ko daare ye popɔra kalo na daare to de kwei chwoŋa kalo na vei siseini dem laŋa ne, mɛ na maŋe de Zeboyim bwolo kom de kagoa kam to.

19Kanto maŋa kam ne, luru tera Isarele tiina teene dem maama wone. Kokuri to, Filisi tiina bam mo déem ya tage ba we, “Dé yé pa Hiburu tiina bam pwola se ba ke se-zɔɔro dedaane chichwoa ba ma daane debam.” 20Konto ŋwaane ko fee mo se Isarele nɔɔna maama vo Filisi tiina bam tei se ba dwori ba vaane, de ba dwoora, de ba sekware, de ba seene maama. 21Ko ná ye vaane, Filisi tiina bam maa yeini ba pa ba ŋwe sabu-dala yalei se ba dwori-de ba pa-ba. Ko daare ko ná ye dwoora, de pengasa, de chichwoa, ba wó ŋwe sabu-dale dedoa mo.

22Konto ŋwaane, dɛ dem na yi se Isarele tiina bam ke jara yam to, nɔɔno wolo maama na wo Sɔɔl de o bu Jonatan kwaga ne to ba jege se-zɔɔ naa chichwei o jeŋa ne. Sɔɔl de Jonatan yerane mo jege jara zela yam konto.

Jonatan kwaare jara de Filisi tiina

23Filisi tiina bam déem ma pa ba jar-keira kɔgɔ kodwoŋi vo ba che Mikimasa zwonnu chwoŋa kam.

Currently Selected:

1 Samuwel 13: KBG

Highlight

Copy

Compare