1 Samuwel 12
12
Samuwel bane Isarele tiina bam
1Samuwel ma ŋɔɔne de Isarele tiina bam o we, “Amo seene a cheigi abam kwora woŋo kolo maama á na tage de amo to baŋa ne. A ma tiŋi pɛ se o taa nii á baŋa ne. 2Ko zege a nɔn-donne maŋa ne mo a wo abam yiga ne se ko ba ko yi zem. Leile konto a tiini a kwe ye a yuu peere. Amo bia laam ye baara mo, ye ba wo á wone. Pɛ wom laam leiri amo yuu ne mo, se o taa nii á baŋa ne. 3Nii-na ne da, a jale a tete mo Baŋa Wɛ dedaane o pɛ wom yiga ne. Ta-na chega: abam wɔ mo amo vere o nabea naa o bonaga? Wɔ mo a nam ke‑o swa a pini? A bɛɛse wɔ mo abam wone? Wɔ mo sugi amo yia de pɛɛre se ko kwoli o keim-balɔrɔ? Amo ná tusi tei kolo maama wone, se á ta á bere-ne, se a jwoori a yiri-te a pa abam.” 4Nɔɔna bam ma leiri‑o ba we, “Kɔtaa! Nmo wo pini debam, n ma‑n wo bɛɛse debam. Nmo ta wo fɔge n jwoŋi vwa pɛɛre nɔɔno tei ne.”
5Samuwel daa ma leiri o we, “Zem dɛ dento ne, Baŋa Wɛ de o pɛ wom zege amo chega kam kwaga ne we abam wo nɛ amo tusim kolokolo baŋa ne.” Nɔɔna bam ma leiri ba we, “Ɛɛ! Baŋa Wɛ zege ye o nia.”
6Samuwel daa ma ta de nɔɔna bam o we:
“Baŋa Wɛ déem mo kuri Moses dedaane Aron ye o tɔge banto baŋa ne o ja abam kwoa bam o nwoŋi Ejipti ne.#Nwoŋim 6:26 7Ta‑á zege konto, se a lage a bwɛ abam mo Baŋa Wɛ yiga ne, se ko tɔge dedaane Baŋa Wɛ na ke wo-kamunnu telo maama o ma jwoŋi abam de á kwoa bam o yage to.#Lei 78:4 8Jakob de o dwi tiina déem na jeini Ejipti ne to, mo abam nabaara bam déem keeri ba jare Baŋa Wɛ. Wɛ ma pa Moses de Aron vere-ba ba ja nwoŋi Ejipti ne ba ba ba zoore tega kanto á laam na tei to ne.
9De konto de, á nabaara bam ma ba ba swei ba Tu Baŋa Wɛ wom swia. Konto ŋwaane mo o ke-ba ba dona jeŋa ne. Ko ma pa se Sisera wolo na ye Hazora teo jar-keira bam yiga tu to, de Filisi tiina bam, dedaane Moaba pɛ wom de o nɔɔna bam wane á nabaara bam ba di jara wone.#Yiga tiina 4:3 10Á kwoa bam déem daa ma keeri ba jare Baŋa Wɛ ye ba we, ‘Debam tusi mo. Dé pipiri dé yage Baŋa Wɛ zula ye dé daare dé zuli Baal dedaane Asetare jwona yam. Nam jwoŋi debam n yage dé dona jeŋa ne, se dé laam wó jwoori dé taa zuli‑m.’ 11Baŋa Wɛ ma kuri Gideon, de Baraki, de Jefeta, dedaane amo, Samuwel o pa abam. Wɛ ma tɔge nɔɔna bam konto baŋa ne o jwoŋi abam o yage á dona bam maama jeŋa ne, se á ta‑á wae á zoore de yazura.
12Abam nam na yɔɔre á na Amon tiina pɛ Nahasi na lage o kwaare jara de abam to, mo á tage de amo á we, ‘Lage pɛ n pa debam, se o taa nii dé baŋa ne.’ Á tage konto ye abam Tu Baŋa Wɛ wom ya mo maŋe o ye abam pɛ. 13Á nam nii-na á pɛ wom mo tento. O maa ye pɛ wolo á na lwoori Wɛ o ŋwaane ye Baŋa Wɛ kuri‑o o pa abam to. 14Nam seene-na yia á ta‑á kɔre Baŋa Wɛ se á daare á ta‑á zuli‑o ye á tɔge o chwei sem. Yé se-na á zwa á ve o nia yam. Abam maama de á pɛ wom ná tɔge á Tu Baŋa Wɛ konto dwoŋi, ko wó taa lana ko pa abam. 15Ko daare á na pɛ se á zwa se, ye á ve se á sɛ o nia yam, Baŋa Wɛ de wó lɔ abam de á pɛ wom kwaga ne mo.
16Nam ta‑á zege á na zege mɛ konto to, se Baŋa Wɛ wó ke wo-kamunu á yibia ne leile konto. 17Maŋa kanto dae te-pwoŋa mo na? Amo nam wó lwoori Baŋa Wɛ se o pa doa ba ka taa baga ka wuura ye ka nena. Abam ná nɛ do-fɔrɔ kom, á wó maane we á tiini á sa chwoŋa ye á chɔge Baŋa Wɛ yiga mo, de á na tage we á lage pɛ to.”
18Samuwel na seene o lwoori Baŋa Wɛ to, Wɛ ma pa do-fɔrɔ ba ka baga ye ka nena dɛ dem konto ne. Ko ma pa nɔɔna bam maama tiini ba kɔre Baŋa Wɛ dedaane Samuwel. 19Ba ma ta de Samuwel ba we, “Pwopwo, ja n Tu Baŋa Wɛ wom teiŋa n pa debam se dé yé te. Debam laam seene dé lɔre we dé wɛleera yam daga, ye dé ta woli ya wone mo dedaane dé na we dé lage pɛ to.”
20Samuwel laam ma leiri-ba o we, “Chega to, abam seene á ke wo-balɔrɔ. Nam yé ta‑á kɔre-na foone. Ko laam nam jege se á ta‑á tɔge Baŋa Wɛ de á wo maama mo, se á daa yé lɔ o kwaga ne. 21Yé zuli-na jwona. Yanto ba jege dam, ya nam bá wane abam ya jwoŋi ya yage cham wone. Ya ye wo-yɔɔro yerane mo. 22Baŋa Wɛ bá sɛ o ve abam balo na ye o nɔɔna bam to, o tete yere-zɔŋɔ kom ŋwaane. Kokuri to, wonto mo kuri abam se o pa á ta‑á ye o tete nɔɔna. 23Se ko ná ye amo, a ta wó taa lwoori Baŋa Wɛ a pa abam. Ko ya ná dae konto, a ya wó ke wɛleere mo.#Kolosia 1:9 Amo za wó taa bere abam chwo-laaro telo na maŋe se á tɔge to. 24Ta‑á kɔre-na Baŋa Wɛ se á daare á ta‑á zuli‑o de á bochare maama. Guli-na wo-kamunnu telo maama o na ke o pa abam to. 25Nam ta‑á yei-na we, abam de á pɛ wom ná misi á yuni keim-balwaaro wone, Wɛ wó pa á yera maama saare tega baŋa ne mo.”
Currently Selected:
1 Samuwel 12: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
