1 Samuwel 11

Sɔɔl wane Amon tiina bam

1Amon tiina pɛ Nahasi déem lage o jar-keira o vo Jabese Gilead, se o li teo kom konto o jwoŋi o taa tei. Teo kom baara bam ma ta de Nahasi ba we, “Nam pa dé gwoni ni daane, se dé wó sɛ se n ta‑n tei debam.” #11:1 Tɔn-dwonnu tedwonna wone ko popone we: Amon tiina pɛ wom Nahasi déem yeini o bɛɛse Gad dwi tiina bam de Ruben dwi tiina bam pa ko tiini ko zo ba yera. O maa yeini o guri baara balo maama o na wane to jazem yi. O wo pɛ chwoŋa se Isarele tiina dedɛɛro ba o jwoŋi-ba o yage. Isarele dwi tiina balo maama na zoore Jɔdan buga kam wɛ-puli seeni to wone baaro ta wo daare ye Nahasi wo guri o jazem yi. Ko daare ye Isarele tiina morro terepɛ (7,000) déem ya lugi Amon tiina bam jeŋa ne ba duri ba vo Jabese Gilead. 2O ma leiri-ba o we, “Amo beeri chaveera mo se a ke Isarele tiina bam yera ne. Konto to, á na lage se dé gwoni ni daane, ko nam jege se a chochɔrege a le nɔɔno maama jazem yi mo ywo-seeni, se a daare a gwoni ni de abam.” 3Teo kom nakwa bam ma ta‑o ba we, “Nam pa debam pwola se dé kwei da yarepɛ dé toŋe kwora Isarele tega kam maama ne dé beeri wolim. Dé ná beeri dé pwoli ye jwoŋinu ná wo tu se o vere debam n jeŋa ne o yage, dé laam wó ba dé sɛ‑m.”

4Nɔɔna badwonna ma ja kwora kam konto ba vo ba yi Gibea. Sɔɔl teo kom mo konto. Ba ma ta taane dem ba de Gibea tiina bam zwa ne. Ba de na nigi to, ba ma kaase bɔge-bɔge. 5Konto de Sɔɔl ya zege o kara ne mo o kale o nabɛ o maa jwoori sɔŋɔ. O na nigi sɔɔ kom to, mo o bwei o we, “Bɛ mo ke nɔɔna bam yera ne ye ba kaase konto ŋɔɔ?” Ba ma lwoni kwora kalo na nwoŋi Jabese ka ba to ba bere‑o.

6Sɔɔl na nigi to, Baŋa Wɛ jworo ma chu o baŋa de dam. O wo ma pɛ. 7O ma ja o nabɛ sem selei o go. O ta ma tore tore se nɔna yam mura-mura, ye o pa nɔɔna ja-ya ba jage se ya yi Isarele tiina maama. Nɔɔna bam ná yi jei selo maama, ba wó ta tento mo ba we, “Sɔɔl de Samuwel mo wora ba lae jar-keira ba ke daane. Wolo ná wo sɛ se o nwoŋi o tɔge ba kwaga, ba lage ba ke kotu ne ba na ke tei de nabɛ sento to mo.” Foone ma tiini de zo Isarele tiina bam Baŋa Wɛ ŋwaane. Ba maama jilli ma nwoŋi se ba vo ba kwaare jara. 8Sɔɔl ma pa nɔɔna bam maama jeeri Bezeki ne. Ba na jeeli ba ni to, Isarele jar-keira bam déem ye nɔɔna morro bia yatɔ (300,000) mo. Judah jar-keira bam maa ye nɔɔna morro fintɔ (30,000).

9Sɔɔl de o kwaga nɔɔna bam ma toŋe Jabese teo nɔɔna se ba jwoori ba teo kom de kwora kanto: “Jwa we-bere maŋa ne, dé wó ba dé jwoŋi abam dé yage.” Nɔɔna bam na jaane kwora kam ba yi Jabese Gilead ye ba ta to, teo kom tiina wo ma pwoli dedɛ. 10De ko de, ba ta toŋe kwora Amon tiina bam tei ne mo we, “Ko ta wo á tei ne. Dé jwa wo á jeŋa ne, se á ke debam á na boŋe tei to.”

11Tega na lage ka poore to, mo Sɔɔl pɔɔre o jar-keira bam kuni betɔ. O laam ma pa ba nwoŋi ye ba pɔpɔ ba zaŋe Amon tiina kɔgɔ kom baŋa ne. Ba ma wane-ba, ye ba go ba dedɛ se ko vo ko yi wea berem maŋa. Balo fee na lugi to ma duri ba jage jei maama ne. Nɔɔn-nɔɔno daa wo tɔge de o dwoŋi.

12Isarele tiina bam ma yi Samuwel tei ba we, “Nɔɔna balo na gwooni Sɔɔl ye ba we, ko ya wo maŋe se o di paare debam baŋa ne to, ba wo yei ne mo? Nam pa debam chwoŋa se dé go-ba!” 13Sɔɔl maa wo sɛ ye o we, “Zem dɛ dento, yé go-na nɔɔn-nɔɔno! Kolo ŋwaane to, ko ye zem dɛ dem mo Baŋa Wɛ jwoŋi Isarele tiina bam o yage.”

14Samuwel laam ma ta de nɔɔna bam o we, “Pa se dé jwoori-na Giligal se dé kwɛ Sɔɔl paare dem se de da chwoŋa nɔɔna maama yia ne.” 15Ba maama ma seene ba vo Giligal. Ba ma fɔge ba tiŋi Sɔɔl paare dem wara-jei sem ne, ye ba daare ba ke yazura pɛɛra ba ma ke kaanem ba pa Baŋa Wɛ. Jei sem konto ne mo Sɔɔl de Isarele tiina bam maama déem chake de wopwolo.

Currently Selected:

1 Samuwel 11: KBG

Highlight

Copy

Compare