1 Samuwel 2

Hanna seini Baŋa Wɛ

1Hanna laam ma lwoori Wɛ o we,

“Amo Tu Baŋa Wɛ,

nmo pɛ se a wo pwoli dedɛ!

Amo jwoori a na dam Baŋa Wɛ ŋwaane mo.

Amo laam wó teere a dona baŋa ne,

kokuri to, a wo mo tiini ko pwoli nmo zeinim ŋwaane.

2 Baŋa Wɛ, nmo ye Wo-pwoŋo Tu ye n dwoŋi tera!

Nɔɔn-nɔɔno maa tera

o na mae dede‑m.

Peo kodwoŋi daa tera,

ko na jege dam ne debam Wɛ wom!#Izaya 44:8

3 Baŋa Wɛ ye Wɛ wolo na yei totoŋe maama ni ne to mo.

O maa bore nɔɔna bora

ba totoŋa ŋwaane.

Konto ŋwaane, yage-na ni-wɛɛle taane!

Kweele-na á kamunni ŋwɛ selo

á na jege to á yage tega ne.

4Dedɛɛra tɛ sem bwori

ye ba dam maama ti.

Nabwona dam laam za fɔge

de puli mo taa.

5Balo ya na yeini ba di ba sui to

laam wora ba beeri totoŋa

se ba ma na ba ni-wodiu.

Balo kana ya na wɔe to de laam maa di lanyerane ba sui.

Kadega kam loge bia barepɛ mo.

Wolo bia ya na daga to laam tu

o ga o bu-kɔgɔ kom.

6 Baŋa Wɛ mo jaane toone de ŋwea o tui.

O maa pae se nɔɔna tu churu,

ye o ta pae se badwonna zaŋa.

7Wonto mo pae se nɔɔna ye nabwona,

ye o ta pae se badaara ye jejegero tiina.

O wae o pa se dedoa wo tega ne,

ye o daare o zeiŋi wodwoŋi.

8O yeini o liiri yiniga tu mo

bworu wone.

O maa le nabwom o lɛɛro wone.

O laam maa pa ba taa tɔge

ba jei pa-bia tetare ne,

se nɔɔna taa pa-ba zula lanyerane.

Kokuri, tega kam baŋa maama

ye Baŋa Wɛ nyem mo,

ye wonto mo chwi woŋo maama ko jeiga ne.

9O nii balo na zege de chega ba pa‑o to baŋa ne mo.

Nɔn-balwaaro nam wó tɔge lim wone mo ba jei.

Dam yerane ware de jwoŋi nɔɔno de yage.

10 Baŋa Wɛ mo wó chɔge o dona bam maama.

O lage o zege wɛyuu ne mo o bage o yage ba baŋa ne!

Baŋa Wɛ maa wó di nabiina maama taane.

Ko nam ná ye pɛ wolo o na tiŋi to,

o wó pa‑o dam

se nɔɔna maama taa pa‑o zula.”#Luka 1:46-55

11Elikana de Hanna ma jwoori ba sɔŋɔ Rama ne. Samuwel ma maŋe Siloo ne. O déem toŋe o pa Baŋa Wɛ mo, ye kaanem tu Eli nii o baŋa ne.

Eli bia bam taane

12Eli bia balei bam déem ye nɔn-wo-korro mo. Ba yiga maa tera de Baŋa Wɛ. 13Ba ta maa yeini ba chɔge Wɛ kaanem totoŋa chullu tem. Kokuri, nɔɔna ná tu se ba ke kaanem ba pa Wɛ, ye nɔna yam ta na wora ya saŋa maŋa kalo to, mo Wɛ kaanem tu tontoŋeno wom wó da o ba ye o zei da-chɔrɔ na jege nyea yatɔ to. 14Tontoŋeno wom laam wó chu o le nɔna yalo na wora ya saŋe to wone. Ko ná maŋe ko ye kambia ne, naa nakeina ne, naa woŋo kolo maama ne, nɔna yalo maama da-chɔrɔ kom na wó tore ko zɔ to mo wó taa ye Wɛ kaanem tu wom nyem. Ba déem jege kikia yam konto mo ba ke de Isarele tiina balo maama na tu Siloo se ba ke kaanem to.

15Se ko woli da to, ba déem ná yeini ba go varem ye ba ta wo lɔɔne varem wom lara ba zwɛ bimbini dem baŋa ne se ba daare, Wɛ kaanem tu tontoŋeno wom wae o tui o tɛ we, “Pa-ne nɔn-gwei delo kaanem tu wom na wó wɔ to, se o ba lage o jwoŋi nɔn-saŋa n tei ne se o di.” 16Nɔɔno wom ná zege se o ta we, “Yage se dé ná zwɛ lara kam dé daare, se n laam le nɔna yalo n na lage to,” tontoŋeno wom wó leiri mo o we, “Aawo! Pa-ne lela! Ko ná dae konto, a laam wó vere-ya de dam mo.”

17Eli bia bam wɛleere dem déem tiini de gaale mo ye de chɔge Baŋa Wɛ yiga. Kokuri, ba déem pɛ se Baŋa Wɛ kaanem pɛɛra yam ba jege kuri.

18Se ko ná ye Samuwel, wonto déem zege o biini ne mo o toŋe o pa Baŋa Wɛ. O nam ya zo gare-wogo kolo ba na mɛ gare-fefale ba sɔ se ko taa nye de Wɛ kaanem tiina gwaaro tem to mo. 19Bene maama, o nu wom yeini o sɔ gare-bwora balaŋa mo se o pa‑o. O ná tɔge de o baro o ba wara-jei sem se ba ke bene dem kaanem, o yeini o ja gare-bwora kam mo o ja o ba o pa‑o. 20Eli de maa yeini o sɔɔle Wɛ swolim o ke Elikana de o kaane Hanna yuu ne o we, “Baŋa Wɛ wó pa kaane wonto lo bia o pa‑m, se ba leiri bu wonto yuu ne, o na kwei bu wom o pa Baŋa Wɛ to ŋwaane.” Ba de laam maa yeini ba jwoori ba sɔŋɔ.

21 Baŋa Wɛ ma seene o ke zaane o ke Hanna yuu ne. O ma lo bakeiri setɔ dedaane busankane selei. Se ko ná ye Samuwel, wonto déem ke nɔɔno mo, ye o toŋe o pa Baŋa Wɛ.

22Eli déem laam tiini o kwe mo. O ma yeini o ni o bia bam na toŋe tei maama Isarele tiina bam yera ne to. O ta ma ni we o bia bam jaane kaana balo na yeini ba la Wɛ wara-vwei dem ni ne ba toŋe to ba gwala. 23Eli ma ta de-ba o we, “Nɔɔna maama tɛ wo-lwanno telo maama abam na jege á ke to taane ba bere-ne. Bɛ mo ye á jege totoŋ-dwoa yam konto á ke? 24Amo bia bam, Baŋa Wɛ nɔɔna bam na jege á taane ba tɛ tei to ba lamma. Nam yage-na kikia yam konto. 25Nɔɔno wolo ná ke o chɔge o dwoŋi nabiinu yiga, Baŋa Wɛ ta wó wane o zege kotu kwaga ne. Nɔɔno nam ná ke o chɔge Baŋa Wɛ tete yiga mo, o lage o ke tɛ mo?” De konto maama de, Eli bia bam ta wo sɛ o taane dem. Kokuri, Baŋa Wɛ boboŋa maŋe ya ja mo se o go-ba.

26Ko daare, Samuwel déem fɔge o ke nɔɔno mo. Baŋa Wɛ dedaane nabiina maama maa lage o taane.#Luka 2:40, 52

Waarem delo na wó ba Eli sɔŋɔ baŋa ne to

27Wɛ tontoŋeno wodwoŋi déem ma ba Eli tei ye o we:

“Baŋa Wɛ ni dem mo tento: Isarele tiina bam déem ta na ye kabɛ Ejipti pa-faro wom jeŋa ne to, amo déem veere a tete dedaane nmo nabaaro Aron. 28Amo ma kuri n nabaaro wom konto Isarele dwia yam maama wone, se o taa ye amo kaanem tu. A maa pae se wonto de o dwi dem toŋe a kaanem bimbini dem totoŋa, ye ba zwɛ talwoŋ-ywoŋa ba pa-ne. Ba maa jege pwola se ba lɛ kaanem gare-wogo ba zo amo tei. A ta ma pa ba dwi dem chwoŋa se ba taa di a diga pɛɛra yam Isarele tiina bam na zwɛ ba kaane ba pa-ne to wone. 29Bɛ nam mo tei ye abam gwooni pɛɛra yalo amo na pɛ ni se á jwoŋi-ya á ma á ke kaanem á pa-ne a diga kam wone to? Nmo nam na ke tei to bere we n tiini n kɔre n bia bam se ko dwoni n na kɔre amo tei to. Kokuri, abam jege amo nɔɔna Isarele tiina bam wodi-laaro tem mo á di á nu bigila bigila.

30Amo wolo na ye Isarele tiina Baŋa Wɛ wom to ni dem mo tento: Amo déem ya pwooli mo we, á sɔ-yuu kom dedaane á dwi dem wó taa ye a kaanem tiina se ko taa vei wuu. Amo laam nam tɛ a we, ko daa bá taa ye konto. Kokuri, amo wó zuli balo dwi maama na zuli-ne to mo, se a daare a nii balo yiga na tere a wone to a chweese. 31Ta‑n yei we maŋa lage ka yi se a pa se n dwi dem ti. Nɔn-kweo daa bá taa wora n kwo dwi dem wone. Nmo diga tiina bam maama wó te ba nɔn-donne maŋa ne mo. 32Nmo wó na lɛɛro na tu amo wara-jei sem baŋa ne tei to. Nmo ta wó na amo na wó ke Isarele tiina bam lanyerane tei to, se ko daare abam dwi dem ne, nɔɔn-nɔɔno daa bá kwe se o laam te. 33Amo nam za wó pa se n bia bam wo dedoa daare se o taa toŋe a kaanem bimbini dem totoŋa. Wonto yia nam wó dwei pa se wo-chechɔgɔ yerane taa wora. Abam dwi dem na daare to maa wó te ba nɔn-donne maŋa ne.

34Nmo bia bam balei Hofini dedaane Finehase wó da daane mo ba te dɛ dedwe wone. Ko na wó ke-ba tei to ye se n wane n lɔre we kolo maama a na tage to wó ji chega. 35Amo laam wó kuri kaanem tu wodwoŋi na jege chega lanyerane to. Kotu wó taa toŋe ye o ke a boboŋa na lage kolo maama to o pa-ne. A maa wó pa se o dwi tiina fɔge ba puli lanyerane, se ba taa toŋe ba pae pɛ wolo a na wó kuri to. 36Abam dwi dem wone balo na wó daare to laam wó vo kaanem tu wom konto tei ba lwoori sabu dedaane wodiu. Ba wó ta ba we, ‘Popo, pa se debam de da dé toŋe kaanem tiina totoŋa yam, se debam de da dé laŋe wodiu.’ ”

Currently Selected:

1 Samuwel 2: KBG

Highlight

Copy

Compare