1 Pwa 9
9
Baŋa Wɛ daa veere o tete de Solomon
1Pɛ Solomon déem na lɔge Baŋa Wɛ diga kam, de o tete sɔŋɔ kom, de woŋo kolo maama o ya na lage se o lɔ o ti to, 2Baŋa Wɛ daa ma ba o veere o tete ded‑o o ke belei, ne o ya na maŋe o ke tei Gibeon ne to. 3Baŋa Wɛ ma ta ded‑o o we:
“Amo nigi nmo na lwoori a tei ne se a ke woŋo kolo a pa‑m to. Diga kam n na lɔga amo ŋwaane to, a seene a pɔɔre-ka se ka taa ye wose mo, se a yere dem taa wora taa wuu. Amo yi page ka baŋa ne ye a boboŋa de wó taa wo ka wone maŋa maama. 4Ko nam ná ye nmo, n ná jege chega n ŋwea ne, ne n kwo David déem na ke tei ye o yɔɔre o tɔge chwoŋa de boboŋ-laaro to, ye n ná sɛ n tɔge a nia yam, de a bera yam, de a chullu tem, 5amo laam wó pa se n dwi dem taa di Isarele teo paare taa wuu. A na pwooli tei de nmo kwo David we, o dwi dem bá ga nɔɔno se o di paare Isarele tiina bam baŋa ne to wó seene ko ji chega.
6Nmo dedaane dwi delo na wó saŋe nmo kwaga to nam ná ywori amo chwoŋa kam ne ye á ve a nia yam de a bera yam, á daare á pipiri á zuli wa yadwonna, 7amo laam wó zeili abam Isarele tiina bam se á daa yé ta‑á zoore tega kanto a na kwei a pa abam to baŋa ne. A maa wó ve diga kanto a ya na sɛ se ka taa ye wose a yere zula ŋwaane to de. Konto ná kea, dwi-gɛ tiina laam wó taa jege Isarele tiina bam mo ba mɔna ye ba gwooni-ba. 8Diga kanto maa wó yɔɔre ka to ka saare ka taa ye di-dwoŋo. Nɔɔna maama maa ná dɛ da se ba kɛ, ko wó ke-ba yaau mo, pa se ba taa chweesa ye ba tɛ we, ‘Bɛ mo ye Baŋa Wɛ pa se lɛɛro tento yi ba tega kam de ba Wɛ diga kam?’ 9Nɔɔna maa wó leiri we, ‘Ba tete mo mɛ ba kwaga ba ya ba Tu Baŋa Wɛ wom. Wonto nam ya mo jaane ba nabaara bam o nwoŋi Ejipti teo ne. Ba nam na pipiri ba tɔge wa yadwonna ye ba zuli-ya to ŋwaane mo Baŋa Wɛ pɛ se lɛɛro tento yi-ba.’ ”
Pɛ Solomon totoŋa yadwonna
10Pɛ Solomon déem kwei bena finlei mo o ma o lɔ Baŋa Wɛ diga kam de o tete sɔŋɔ kom maama. 11Solomon ma kwei teene finlei na wo Galili laŋa kam ne to o pa Tura teo pɛ Hiram, kokuri to wonto déem woli‑o de Sedare dɛ, de da-ŋonno tedwonna, de sabu-seŋa, ne o na laga tei maama se o ma o lɔ Wɛ diga kam to. 12Pɛ Hiram na zege Tura ne o vo o na teene delo Solomon na pɛ‑o to, o yi maa wo su-de. 13O ma ta de Solomon o we, “A badwoŋi, teene dento dwi mo nmo kwei n pa-ne?” O ma pa de laŋa kam yere we ‘Kabul’. Yere dem konto mo wora de zem maama. 14Hiram ya pɛ Solomon sabu-seŋa kalo dunni na yi kilo morro tena (4,000) to mo.
15Tontoŋena balo Solomon déem na pɛ se ba toŋe totoŋ-dɛɛra ba pa‑o to taane mo tento. O déem pɛ se ba lɔ Baŋa Wɛ diga kam, de o tete sɔŋɔ kom, de Millo jeiga kam, ye ba daare ba lɔ Jerusalem teo kabira kam, de Hazora teo kom, de Megido teo kom, de Gezere teo kom.
16Ko ye Ejipti Pa-faro wom déem mo maŋe o ke jara o di Gezere teo kom. O de mini mo ko wone ye o daare o go Kanaan tiina bam na zoore da to. O ma daare o kwei-ka o pa o bukɔ se o ma o zo Solomon. 17Solomon ma pa ba jwoori ba lɔ Gezere teo kom.
Solomon déem ma pa o tontoŋena bam lɔ Bɛte-Horon teo kom na wo kuri seeni to, 18de Baalafe, de Tamara na wo Judah kagoa kam ne to. 19O ta pɛ se ba lɔ teene delo o na wó taa zege wodiiru, de jara-keim torokooro, de sisein-nɔɔna da to. O ta pɛ se ba lɔ o boboŋa na jaane kolo maama se o lɔ to mo Jerusalem ne, de Lebanon ne, de jei selo maama o na di paare da to.
20-21Solomon na fe nɔɔna balo se ba taa toŋe totoŋ-dɛɛra ba pa‑o to déem ye Amori tiina, de Hiti tiina, de Pɛrizi tiina, de Hivi tiina, de Jebusi tiina mo. Banto dae Isarele dwi tiina ye ba ya ta daare Isarele tega kam ne. Banto nam ye dwia yalo Isarele tiina bam déem na wo yɔɔre ba chɔge to bia mo. Ba ta ye kabɛ mo de zem maama. 22Ko nam ná ye Isarele tiina bam tete, Solomon déem wo pɛ se banto ji o kabɛ. O nam pɛ se ba ji o jar-keira, de o dedɛɛra, de o jar-keira yiga tiina, de o jara-keim torokooro dira, dedaane o sisein-dira yiga tiina mo.
23Dedɛɛra balo na nii tontoŋena bam baŋa ne ba pa Solomon to déem ye nɔɔna bia yanu de finnu (550) mo. Ba déem maa nii o totoŋa yam maama baŋa ne.
24Pɛ Solomon kaane wolo na ye Ejipti Pa-faro wom bukɔ to déem zege David teo kom ne o vo sɔŋɔ kolo Solomon na lɔge o pa‑o to. Solomon ma lɔ Millo jeiga kam o woli da.
25Kuni betɔ bene maama wone mo Solomon yeini o ke zwɛɛm pɛɛra de yazura pɛɛra bimbini delo o na lɔga o pa Baŋa Wɛ to baŋa ne. O ta ma zwɛ talwoŋ-ywoŋa o pa Baŋa Wɛ. Konto baŋa ne mo o déem pɛ se Wɛ diga kam zege ka ti.
26Pɛ Solomon déem pɛ se ba ke nabwor-kamunnu dedɛ Ezion-gebera ne ba pa‑o. Teo kom konto bwola de Elofe na wo Nane-soŋo kom ni ne Edom tega baŋa ne to mo. 27Pɛ Hiram ma toŋe o nɔɔna balo na yei nabwooru yuŋim to badaara se ba vo ba gwaane de Solomon nɔɔna bam ba toŋe. 28Ba ma yuŋi nabwooru tem ba vo ba yi Ofiri ye ba na sabu-seŋa dedɛ dáane. Ba ma ja sabu-seŋa kilo morro fuga-tena (14,000) ba jwoori ba vo ba pa Pɛ Solomon.
Currently Selected:
1 Pwa 9: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
