1 Pwa 8

Ba jaane Wɛ ni-gwonim dakaa kam ba zo Wɛ diga kam

1Pɛ Solomon déem pɛ ni mo yi Isarele dwi tiina nakwa bam maama se ba ba o tei Jerusalem ne. Ko ye ba pwa bam de ba sɔ-yuni tem yiga tiina bam maama mo konto. O déem ma bwoŋi-ba se ba ke daane ba ja Wɛ ni-gwonim dakaa kam na wo David teo Zion ne to ba ja ba zo Wɛ diga kam. 2Ba maama ma ke daane ba yi pɛ Solomon tei kuri delo na ke chane serepɛ chana kam ba na bwoi we Etanim to maŋa ne.

3Isarele tiina nakwa bam maama na jeeri konto to, Wɛ kaanem tiina bam ma zeiŋi Wɛ ni-gwonim dakaa kam wɛɛne 4se ba ja ba vo Wɛ diga kam. Levi tiina bam de kaanem tiina bam de ma zeŋe Wɛ wara-vwei dem de de yera zela yam maama ba ja ba kɛ. 5Pɛ Solomon de Isarele tiina kɔgɔ kom maama ma vo ba gilimi Wɛ ni-gwonim dakaa kam yiga ne. Ba ma kwei pei de naane dedɛ ba ma ba ke kaanem ba pa Wɛ. Vara bam tiini ba daga dedɛ pa se nɔɔn-nɔɔno ware ba ni o ga.

6Wɛ kaanem tiina bam ma zeŋe Baŋa Wɛ ni-gwonim dakaa kam ba ja ba zo Wɛ diga kam wone ba zege-ka di-yun-gala kam na tiini ka ye wose Wɛ ŋwaane to wone. Ba déem zege dakaa kam cherubi vɔna yam kuri ne mo. 7Cherubi selei sem vɔna yam twe mo wɛɛne ya kwoli dakaa kam de ka dɛ selo ba na mae ba zeŋe-ka to. 8Dɛ sem konto tiini se dɔra dedɛ. Ko ma pa se nɔɔno ná zo Wɛ diga kam o zege ka ni ne, o wae o tole o nae dɛ sem. Ko nam ná ye pwooni dem ne mo o zega, o ba nae-se. Se ta zege da de zem maama. 9Woŋo kolo yerane déem na wo Wɛ ni-gwonim dakaa kam wone to mo ye kandwa-pelɛ selei selo Moses déem na kwei o ke-da Sinayi#8:9 Sinayi: Hiburu = Horeb (Sinayi yere dedwoŋi) peo kom baŋa ne to.#Nwoŋim 40:20 Dáane mo Baŋa Wɛ déem gwoni ni de Isarele tiina bam maŋa kalo ba na nwoŋi Ejipti teo ne ba kɛ to.

10Wɛ kaanem tiina bam na nwoŋi Wɛ di-yuu kom ne to mo kunkwoŋo pɔpɔ ko zo ko kwoli Baŋa Wɛ diga kam maama. 11Wɛ kaanem tiina bam ware ba jwoori ba zo da ba toŋe ba totoŋa, kunkwoŋo kom na wora ye Baŋa Wɛ nenɔŋ-fɔrɔ kom pwooni yɔɔre de su jei sem maama to ŋwaane.#Ezekeli 43:5; Gurim 15:8

12Pɛ Solomon ma ware Wɛ o we, “Baŋa Wɛ, nmo maŋe n ta n we, nmo wó ta‑n zoore kunkwon-lilirru wone mo. 13Amo nam lɔge sɔ-fɔrɔ mo a pa‑m, se n ta‑n zoore ka wone taa wuu.”

Solomon ŋɔɔne de nɔɔna bam

14Isarele nɔn-kɔgɔ kom maama na zege da konto to mo Solomon pipiri o jeeri-ba. O ma sɔɔle Wɛ swolim o yage ba baŋa ne. 15O maa we:

“Baŋa Wɛ wom na ye Isarele tiina Wɛ to maŋe de tia! O yɔɔre o ke o su ni delo o na pwooli de a kwo David to mo. Wɛ déem tage o we, 16‘Ko na zege maŋa kalo a na jaane a nɔɔna Isarele tiina bam a nwoŋi Ejipti teo wone to, a ya ta wo kuri teo Isarele dwia yam tega maama wone se ba lɔ wara-jei ba ma ba zuli a yere da. A laam nam mo kuri David se o taa nii a nɔɔna Isarele tiina bam baŋa ne.’ ”

17Solomon ta ma ta o we:

“Amo kwo David ya maŋe o boŋe o ja mo se o lɔ Wɛ diga se ba taa zuli Baŋa Wɛ wom na ye Isarele tiina Wɛ to yere da. 18Baŋa Wɛ nam tage ded‑o o we, ‘Nmo ke chega de n na jaane boboŋa se n lɔ Wɛ diga se ba taa zuli a yere da to. 19Ko nam dae nmo mo jege se n lɔ diga kam n pa-ne. Se ko ye nmo tete bu mo wó lɔ diga amo yere zula ŋwaane.’ 20Leile konto Baŋa Wɛ ke o su tei maama o na pwooli we o wó ke to mo. Amo laam mo leiri a kwo David yuu ne a ji Isarele teo pɛ. A ta ma sɛ a lɔ Wɛ diga kam se Baŋa Wɛ wom na ye Isarele tiina Wɛ to yere na zula da. 21A ta ma ke jeiga Wɛ diga kam wone se ba taa zege Wɛ ni-gwonim dakaa kam da. Dakaa kam konto wone mo kandwa-pelɛ selo Baŋa Wɛ ni-gwonim dem na popone se baŋa ne to maa wora. O déem gwoni ni dem konto de dé nabaara bam maŋa kalo o na jaane-ba o nwoŋi Ejipti teo wone to mo.”

Solomon na lwoori Wɛ tei to

2 Tigisim 6:12-42

22Solomon ma vo o zege o jeeri Baŋa Wɛ kaanem bimbini dem ye Isarele kɔgɔ kom maama zege ba nia. O ma zeiŋi o je sem wɛyuu ne 23ye o lwoori Wɛ o we:

“Baŋa Wɛ wom na ye Isarele tiina Wɛ to, wɛ dedwoŋi tera wɛyuu ne naa tega baŋa ne de na nye de nmo. Nmo yɔɔre n swoi balo na tɔge n chwei sem de ba wo maama to de n na yeini n ke n sui ni delo n na gwoni de-ba se n ke to. 24Ko ná ye amo kwo David na ye nmo tontoŋeno to, nmo na tiŋi ni ded‑o se n ke tei to mo n seene n ke te maama se ko ba ko yi zem. 25Isarele tiina Baŋa Wɛ wom, a laam lwoori‑m se n ke tei n na pwooli de a kwo David ye n we o dwi dem bá ga nɔɔno se o di paare Isarele tiina baŋa ne, ne ba ná kwaane ba tɔge nmo chwei sem ne David tete na ke tei to. 26Isarele tiina Wɛ wom, nam sɛ se kolo nmo na pwooli de a kwo David na ye n tontoŋeno to seene ko ji chega.

27Amo Tu Wɛ, nmo wó seene n ta‑n zoore tega baŋa ne na? Wɛyuu de wɛ-baŋa jei sem maama ne, pwola tera ka na maŋe de nmo. Tetɛ mo diga kanto a na lɔge to wó wane ko yi n zoorem?#Izaya 66:1 28Amo Tu Baŋa Wɛ, a ye nmo tontoŋeno mo. Nam pa n yiga taa wo a wɛ-lworo kom wone. Cheigi a keira kam se n daare n sɛ a zem na lwoori‑m woŋo kolo to. 29Popo, pa se n yia taa page diga kanto baŋa ne maŋa maama, tete de wea ne. Nmo maŋe n ta we ka zege n yere dem zula ŋwaane mo. Maŋa kalo maama ne a ná zege a jeeri diga kanto a lwoori‑m, se n cheigi a wɛ-lworo kom. 30Ko ná ye amo de n nɔɔna Isarele tiina bam, dé ná zege dé jeeri nmo diga kam se dé lwoori‑m, se n jeini n wɛyuu sɔŋɔ kom ne n cheigi dé wɛ-lworo n daare n yage n chɛ debam.

31Nɔɔno ná ke o chɔge o dwoŋi yiga ye ba ja‑o ba zo nmo diga kam wone se o zege nmo kaanem bimbini dem yiga ne se o du duuri we o wo ke o chɔge, 32jeini telaao ne n cheigi o taane dem se n daare n ke kolo na maŋe to. Pɔɔre chega n tontoŋena bam tetare ne. Pa se puseŋ-nyeno wom na waarem delo na maŋe de o kikia to, se n daare n pa wolo na jege chega to na o bora.

33Nmo nɔɔna Isarele tiina bam wɛleera ná pɛ se ba dona di-ba jara wone, ye ba laam ná pipiri ba jwoori nmo tei ba zo nmo diga kanto wone ba ma n yere dem ba lwoori‑m se n duri ba yibwona se n daare n yage n chɛ-ba, 34jeini Wɛ telaao ne n cheigi ba keira kam konto. Seene n yage ba wɛleera yam n ma‑n chɛ-ba, n daare n ja-ba n jwoori tega kalo nmo na kwei n pa ba nabaara bam to.

35Nmo nɔɔna bam wɛleera ná pɛ se n ja kunkwoŋo kom pa se doa ba nena, ye ba laam ná leiri ba wo ye ba zege ba jeeri n diga kam ba ma n yere dem ba lwoori wolim nmo tei ne de n na waare-ba tei to, 36jeini Wɛ telaao ne n cheigi ba keira kam. Yage n nɔɔna Isarele tiina bam wɛleera n chɛ-ba, se n daare n bere-ba chwo-laao se ba taa tɔga. Pa se doa jwoori ka ne tega kanto n na kwei n pa n nɔɔna se ba taa tei to baŋa ne.

37Da-kore de jawe-chɛɛro ná tu te yi ba tega kam, ye jaweero naa kayere dwi dwi ná chɔge ba kara wodiiru tem, ye ba dona ná zaŋe ba teo kolo maama baŋa ne, naa ko ná ye lɛɛro telo maama mo yi n nɔɔna Isarele tiina bam, 38cheigi ba keira kam. Ba wolo maama ná zeiŋi o jea o jeeri n diga kanto ye o lwoori‑m naa o keeri o jare‑m, o wo na tiini ko chɔge to ŋwaane, 39se n jeini n wɛyuu sɔŋɔ kom ne n cheigi o keira kam konto. Yage ba maama wɛleera n chɛ-ba se n daare n woli-ba. Ke de ba dedoa dedoa se ko maŋe de ba kikia na ye tei to, nmo yerane mo na yei nabiinu boboŋa na ye tei to ŋwaane. 40Konto wó pa se n nɔɔna bam taa kɔre‑m da yalo maama ba na wó taa ŋwe ye ba zoore tega kalo nmo na kwei n pa dé nabaara bam to wone.

41Ko ta ná ye veira balo na dae n nɔɔna Isarele tiina bam dwi to, banto wae ba zege sa-teo ne ba tui ywo-seeni, ba na nigi n yere dem ŋwa to ŋwaane. 42Ko ye n yere na zaŋe de n na mɛ n dam n toŋe totoŋ-kamuna to ŋwaane mo banto yeini ba tui ywo. Ba wolo ná tu o zege o jeeri n diga kanto o lwoori‑m, 43se n jeini n wɛyuu sɔŋɔ kom ne n cheigi o wɛ-lworo kom konto. Ke n su kolo maama o na lwoori n tei ne to, se logo baŋa nɔɔna maama da ko ŋwaane ba ni nmo yere dem ŋwa, ye ba taa kɔre‑m nenɛɛne nmo tete nɔɔna Isarele tiina bam na ke tei to. Ba maa wó lɔre we diga kanto a na lɔge to seene ka ye nmo yere dem zula ŋwaane mo.

44Nmo nɔɔna bam ná nwoŋi se ba vo mɛ maama n na toŋe-ba se ba kwaare jara de ba dona, ye ba ná zege ba jeeri teo konto n na kuri to, de Wɛ diga kanto a na lɔga nmo yere dem zula ŋwaane to ba lwoori wolim nmo Baŋa Wɛ tei ne, 45se n jeini Wɛ telaao ne n cheigi ba wɛ-lworo kom, de ba na ŋɔne tei n yiga ne to, se n daare n ke chega n pa-ba.

46Nɔɔn-nɔɔno tera o na ba ke wɛleera. Nmo nɔɔna bam nam ná ke wɛleera pa se nmo bane zaŋe de-ba, n wae n yage se ba dona di-ba pa se ba ji peena sa-teo ne yiga yiga naa bwola bwola de. 47Jei sem konto ne ba boboŋa ná jwoori ye ba leiri ba wo Wɛ ŋwaane, se n cheigi ba wɛ-lworo. Ba ná zege ba dona bam teo ne ba lwoori‑m ye ba we, ‘Dé seene dé tusi mo ye dé ke lwarem de puseŋa kikia’, 48ye ba ná pipiri ba jwoori n tei de ba wo maama, nam sɛ se n cheigi ba wɛ-lworo kom. Ba ná maŋe sa-teo ne ba zege ba jeeri tega kanto n na pɛ ba nabaara bam to, de teo kolo nmo na kuri n pa n tete to, de a na lɔge diga kalo nmo yere dem zula ŋwaane to, 49se n jeini n wɛyuu sɔŋɔ kom ne n cheigi ba wɛ-lworo kom de ba keira kam n daare n ke chega n pa-ba. 50Nam kwei n nɔɔna bam na ke kolo maama ba chɔge n yiga to n yage n chɛ-ba, de ba na nwoŋi n kwaga ne tei to. Nam pa se ba dona balo na di-ba to taa duri ba yibwona. 51Kokuri to, ba ye balo n na kuri n pa n tete se ba taa ye n nyɔn-mage nɔɔna to mo. N ma‑n ja-ba n nwoŋi Ejipti teo ne mɛ ba na nɛ yaara dedɛ ne min-vogo to.

52Yuu-tu Baŋa Wɛ, ta‑n nii amo wolo na ye n tontoŋeno to baŋa ne, de n nɔɔna Isarele tiina bam baŋa ne, se n cheigi dé wɛ-lworo maŋa kalo maama dé na lwoori wolim n tei ne to. 53Kokuri to, ko ye nmo tete mo pɔɔre debam logo baŋa dwi maama wone se dé taa ye nmo tete nyɔn-mage nɔɔna bam, ko maŋe de nmo déem na tage tei n bere n tontoŋeno Moses maŋa kalo nmo na le dé nabaara bam n ja n nwoŋi Ejipti teo ne to.”

54Solomon na ware Baŋa Wɛ ye o lwoori wolim o tei ne o ti konto to, o ma zaŋe wɛɛne o zege Baŋa Wɛ kaanem bimbini dem yiga ne, mɛ o ya na kuni dwoona de teiŋa ne o zeiŋi o jea wɛɛne o lwoori to. 55O ma zege o yɔɔre Isarele tiina kɔgɔ kom ye o kwei Wɛ zaane o ma swɛ ba maama swolim. O ma ta de kwor-dɛa o we:

56“Baŋa Wɛ maŋe de tia mo, o na pɛ se o nɔɔna Isarele tiina bam laam na siu ne o na maŋe o pwooli we o wó ke tei to. O na tiŋi ni de o tontoŋeno Moses we o wó ke wo-laaro telo maama to, de dedoa tete wo dɛ na. 57Debam Tu Baŋa Wɛ wó taa wora debam tei ne, nenɛɛne o déem na wora de dé nabaara bam tei to. O bá yage debam naa o ve debam. 58O nam wó virigi dé bochara se dé taa tɔge o chwei sem, ye dé daare dé sɛ o nia yam, de o bera yam, de o chullu tem maama, ne o na pɛ dé nabaara bam se ba taa tɔge to. 59Baŋa Wɛ wó pa se o yiga taa wo a taane dento a na lwoori o yiga ne to wone maŋa maama, wea de tete. Debam Tu Baŋa Wɛ ta wó woli amo wolo na ye o tontoŋeno to de o nɔɔna Isarele tiina bam se ko maŋe de ba na lage tei dɛ wone to. 60Konto wó pa se logo baŋa dwi maama lɔre we Baŋa Wɛ yerane mo ye Wɛ chekke ye o dwoŋi daa tera. 61Abam balo na ye debam Tu Baŋa Wɛ nɔɔna to, ta‑á yei-na se á ta‑á tɔge o bera yam á daare á sɛ o nia yam maama, ne á na maŋe á ke tei zem to.”

Ba di kuri Wɛ diga kam ŋwaane

62Pɛ Solomon dedaane Isarele tiina kɔgɔ kom maama déem ma kwei pɛɛra ba ke kaanem ba pa Baŋa Wɛ. 63Solomon déem kwei naane morro finlei-telei (22,000) mo, de pei de bone morro bi de finlei (120,000) mo o pa se ba ma ba ke yazura pɛɛra ba pa Baŋa Wɛ. O de Isarele tiina bam maama ke konto mo ba ma pore Baŋa Wɛ diga kam o yere zula ŋwaane. 64Dɛ dem konto ne pɛ wom kwɛ konkɔlɔ kom na wo Baŋa Wɛ diga kam yiga ne to mo se ko taa ye ko yera Wɛ ŋwaane. O ma zege konkɔlɔ kom tetare dem seeni o kwei zwɛɛm pɛɛra, de wodiu pɛɛra, de vara lara kalo na wora yazura pɛɛra ŋwaane to o ke kaanem dem. Kokuri to, channa kaanem bimbini dem na zege Baŋa Wɛ yiga ne to muri se kaanem dem maama wane de ke de baŋa ne.

65Solomon de Isarele tiina kɔgɔ kom na wo o tei ne to kwei da yarepɛ mo se ba di kuri dem. Ba kɔgɔ kom déem daga mo ye ba nwoŋi Isarele jei maama ne, ko zege Lebo-Hamafa teo ne se ko yi Ejipti bu-nɔgɔ kom seeni, ba ba ba tɔge ba di kuri dem ba ma zuli Baŋa Wɛ. 66Tega na poore to, Solomon ma bane nɔɔna bam se ba jwoori ba sam. Nɔɔna bam ma ke pɛ wom lei. Ba na maa jwoori sɔŋɔ to, ba déem jege wopwolo dedɛ de Baŋa Wɛ na ke wo-laaro telo maama o pa o tontoŋeno David de o nɔɔna Isarele tiina bam to.

Currently Selected:

1 Pwa 8: KBG

Highlight

Copy

Compare