1 Pwa 10
10
Seba ka-pɛ wom yera taane
1Seba teo ka-pɛ wom déem nigi Pɛ Solomon yere na zaŋe jei maama ne de o na zuli Baŋa Wɛ tei to. O ma zaŋe o vo Jerusalem se o faŋe‑o de bwia yalo na dana to o nii. 2O déem pɛ se o tontoŋena dedɛ tɔge ded‑o ba vo, dedaane kona yalo na zeŋe talwoŋ-ywei dwi dwi, de sabu-seŋa, de kandwa-nyenno dedɛ to. O na yi Solomon tei to mo o bwei‑o bwia yalo maama o boboŋa na jaane se o bwei to. 3Pɛ Solomon de ma leiri o bwia yam maama. Ya ná maŋe ya chana tei de, o wane o leiri ya maama. 4Seba teo ka-pɛ wom ma maane Solomon swa yam maama na ye tei to. O ta ma na pɛ sɔŋɔ kolo o na lɔge to, 5de wodiiru telo o na yeini o di to, de o na kwɛ o tontoŋena bam jeiŋa jei tei, de balo na zeŋe o wodiu de wo-nyɔɔro ba pa‑o to na zo gare-nyenno telo to, dedaane pɛɛra yalo o na yeini o zwɛ o ma o ke kaanem Baŋa Wɛ diga kam ne to. O na maane tento maama to, ko ma pa o ni yɛ.
6O ma ta de pɛ wom o we, “A ta na wo a tete teo ne ye a ni n yera seina yalo maama to seene ko ye chega mo. 7Ko ná dae amo tete mo na tu a na tento maama to, a ya wó ta we ko ye vwa mo. A nam na nigi wonnu telo to wo yi tei maama a yi dento zem na nɛ to chichworo. Nmo swa yam de n jejegero tem daga te dwoi ba na taga tei ba bere-ne to. 8Nmo nɔɔna bam de n tontoŋena bam tiini ba jege yu-ywoŋo, ba na wo n tei ne dɛ maama ba cheigi nmo swa taana yam to ŋwaane. 9N Tu Baŋa Wɛ wom maŋe de tia, de o wo na dɛ nmo ye o kuri‑m se n di paare Isarele tiina baŋa ne to. Baŋa Wɛ na swoi Isarele dwi tiina taa wuu to ŋwaane mo o kuri‑m se n ji ba pɛ, se n daare n tɔge chwoŋa n ta‑n bora chega bora n pa-ba.”
10Ka-pɛ wom déem ma kwei sabu-seŋa na dwoi kilo morro tena (4,000) to o pa Solomon, ko woli de talwoŋ-ywei, de kandwa-nyenno dedɛ. Nɔɔn-nɔɔno nam ta wo fɔge o ja talwoŋ-ywei selo na daga se yi selo Seba ka-pɛ wom na kwei o ja o ba o pa Pɛ Solomon to.
11Pɛ Hiram nabwooru telo déem na zege Ofiri ne te ja sabu-seŋa te ba te pa Pɛ Solomon to ta ma ja da-ŋonno#10:11 da-ŋonno = Juniper de kandwa-nyenno dedɛ na nwoŋi da to te ba te pa‑o. 12Pɛ wom ma kwei dɛ sem o ma ke nateina#10:12 nateina naa ywoa se ya woli Wɛ diga kam ne, de pɛ sɔŋɔ kom ne. O ma daare o ma dɛ sem o ke kwanno dwi dwi o pa balo na leeni to. Da-ŋonno tem konto tiini te lana te dwoi telo maama na tu te yi Isarele teo de zem maama to.
13Pɛ Solomon déem kwei kolo maama Seba ka-pɛ wom na laga to o pa‑o mo. Ko dae wonnu telo o boboŋa na jaane se o pa‑o to yerane, se ko ye ka-pɛ wom na lwoori kolo maama o tei ne to mo o pɛ‑o o woli da. Ka-pɛ wom de o kwaga kam laam ma jwoori ba teo.
Solomon jejegero na daga tei to
14Bene maama wone Solomon déem yeini o jwoŋi sabu-seŋa kilo morro finlei-tetɔ (23,000) mo, 15ko woli de lampwoo kolo o na jwoŋi bimbeera, de pipim-piina, de Arabia pwa bam maama, de Isarele teo kateira yiga tiina bam tei ne to.
16Pɛ Solomon déem kwei sabu-seŋa o ma mɔ nantan-kamuna bia yalei (200) mo. O déem kwei sabu-seŋa na yi kilo terepɛ to mo o ma turi se dedoa dedoa. 17O ta ma ke nantan-balwa bia yatɔ (300), ye o kwei sabu-seŋa na yi kilo telei to o ma turi se dedoa dedoa. O ma kwei-se o ke diga kalo ba na bwoi we ‘Lebanon Goa’ to wone.
18Pɛ wom ta ma pa se ba kwei tuu yeila ba ma ke paare yituŋ-zɔŋɔ ba pa‑o. Ba ma daare ba ma sabu-seŋa kalo na ye chekke to ba turi ko yera. 19Nateini delo na jege natein-yia yaredo to mo diini de yi paare yituŋu kom. Ko kwaga kam maa ye kukulu ko baŋa seeni.#10:19 naa maa jege na-mɔra yuu nyenyego. Ko je selei sem maama maa jege nywoŋo nyenyego se takeiri ne. 20Nateini dem natein-yi maama de maa jege nywoŋo nyenyero telei de baŋa ne, jazem de jagwia seeni, se ko ke nywoŋo nyenyero fuga-telei. Logo baŋa teene maama ne paare yituŋu tera ko na nye de Pɛ Solomon nyem kom.
21Ko ná ye Pɛ Solomon na-zwe sem maama, ko woli de o zela yalo maama na wo ‘Lebanon Goa’ diga kam ne to, ba mɛ sabu-seŋa mo ba ke te maama. Ba wo mɛ lu-nyenno ba ke te kolokolo, te na ba jege yuu Solomon paare maŋa kam ne to ŋwaane. 22Pɛ wom déem jege nabwor-kamunnu dedɛ te na woli de Pɛ Hiram nabwooru tem te beeri pipiu ŋwaane to. Bena yatɔ maama wone o nabwooru tem wó zeŋe sabu-seŋa, de lu-nyenno, de tuu yeila, de kali-faaro, de kali dwi dwi mo te ba te pa‑o.
23Pɛ Solomon déem mo ye nadum de swa tu o dwoi pwa maama logo baŋa ne. 24Logo baŋa nɔɔna dwi maama maa swoi se ba taa tui o tei ba cheigi yi-poro taane delo Baŋa Wɛ na pɛ‑o to. 25Ba nam ná yeini ba tui, ba dedoa dedoa maa wó ja o pɛɛre o ba o pa Solomon. Bene maama wone ba déem jaane lu-nyenno wonnu, de sabu-seŋa wonnu, de gwaaro, de terale nuga#10:25 terale nuga naa jara-keim zela, de talwoŋ-ywoŋa dwi dwi, de sisein-nɔɔna, de bona-sisei ba tui ba pa‑o.
26Solomon déem ma la jara-keim torokooro moro de bia yana (1,400), dedaane sisein-nɔɔna morro fuga-telei (12,000). O déem pɔɔre se sedwonna o yage teene delo o na kuri se ŋwaane to ne. Sedaara maa wo Jerusalem ne mɛ o na zoore to. 27O paare dim maŋa ne, lu-nyenno tiini te daga Jerusalem ne ne kandwa tei. Sedare da-ŋonno de maa ba jege zore nenɛɛne kaporro na daga tei wɛ-zoore seeni bwollu tem ne to. 28Nɔɔna déem vei Ejipti de Silisia teene dem mo ba kwei sabu ba yeigi sisei ba pa Solomon. Ko maa ye o pipim-piina mo yeini ba yeigi-se Silisia teo ne, ye ba ŋwe kolo na maŋe to. 29Ko ná ye jara-keim toroko, ba yeini ba yeigi-ko Ejipti ne de lu-nyenno sabu-dala bia yaredo (600) mo. Siseiŋa maa yeigi de lu-nyenno sabu-dala bi de finnu (150). Pɛ wom pipim-piina bam déem yeini ba kwei torokooro de sisein-nɔɔna dedɛ ba yeigi ba pa Hiti tiina pwa bam de Aram tiina pwa mo.
Currently Selected:
1 Pwa 10: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
