1 Pwa 6

Solomon na lɔge Wɛ diga kam tei to

2 Tigisim 3:1-14

1Solomon déem zaŋe o bobo Baŋa Wɛ diga kam lɔɔm. Ko déem ya ke bena bia yana de funɔnɔ (480) mo ye Isarele tiina bam yage Ejipti teo. Ko maa ye Solomon paare dim bena yana bene dem chane selei chana kam yere na ye Zivi to wone mo.#2 Samuwel 7:13

2Diga kalo Solomon na lɔge o pa Baŋa Wɛ to maŋem na ye tei to mo tento: Ka dedɔrem seeni ye naba-laara fintɔ mo. Ka kaywalem baŋa maŋem maa ye naba-laara fuga. Ka wɛ-baŋa maŋem maa ye jatwogo de noa ni maŋem kuni fintɔ. 3Diga kam napɔrɔ kaywalem maŋem déem ye naba-laara fuga mo se ko maŋe de diga kam tete. Ko dedɔrem maa ye naba-laara yanu. 4O ma kwei dɛ o ma o ke takwor-balwa Wɛ diga kabira kam yera ne. 5Diga kam sɛ setɔ seeni o ta ma lɔ di-balwa o kaare kabira kam pwooni yiga seeni. 6Di sem lɔge se daŋe da-baŋa mo kuni betɔ. Kuri seeni diga kam kaywalem maŋem ye naba-laara yalei de chichworo mo. Tetare diga kam de kaywalem maŋem maa ye naba-laara yatɔ, ye baŋa seeni diga kam kaywalem maŋem ye naba-laara yatɔ de chichworo. Ba déem na lɔge di-kamunu kom kabira kam to, ba pɔɔre mɛ di-balwa bei sem na wó peini da to. Ba ke konto se ba daa yé lu bɔɔna kabira kam yera ne ba lɔ mo.

7Ba déem vei peero jei mo ba sare kandwa yalo ba na wó ma ba lɔ Wɛ diga kam to pa ya maŋe daane. Ba laam ma zeiŋi-ya ba ja ba diga kam lɔɔm jei, se sɔɔ yé taa ke ka lɔɔm maŋa ne, ko ná maŋe ko ye dwooru naa luuru telo maama sɔɔ de.

8Ni delo na zoore di-balwa bam tega di sem to jeeri Wɛ diga kam tega-kuri seeni saŋa kam mo. Nateina maa zege dáane ya dɔɔle ya diini tetare di sem, de wɛyuu di sem.

9Solomon déem ma pa ba lɔ Wɛ diga kam ba ti. O ma daŋe bei kabira kam baŋa ne ye o daare o ma Sedare da-pelwaro o lware se baŋa ne o ma pu diga kam. 10Di-balwa balo o na lɔge o kaare Wɛ diga kam to dedoa maama wɛ-baŋa maŋem déem ye jatwogo de noa ni maŋem kuni benu mo. Ba déem mɛ Sedare bei mo ba twoŋi di sem konto de Wɛ diga kam daane.

11 Baŋa Wɛ déem pɛ Solomon ni o we, 12“Ko ná ye Wɛ diga kanto kam nmo na lage n lɔ n pa-ne to, nmo ná seene n sɛ a nia yam, de a chullu tem, ye n tɔge a bera yam, amo wó tɔge nmo baŋa a ke a su ni delo a na pwooli de n kwo David to. 13Amo wó taa zoore a nɔɔna Isarele tiina bam tetare ne taa. Amo daa bá viiri a daare-ba.”

14Solomon déem ma pa ba lɔ Wɛ diga kam ba ti. 15O ma kwei Sedare da-pelwaro mo o kwoli ka wo kabira kam, ko zege ka tega kam seeni se ko yi mɛ ba na ne to. O laam ma lware ka tega kam dedaane da-ŋonno#6:15 da-ŋonno = Pine, Cypress. 16O ma zege diga kam wo kwaga kam seeni o maŋe naba-laara fuga se o lɔ kabira o ma che Wɛ di-yun-gala kam se ka tiini ka taa ye wose Wɛ ŋwaane. O laam ma kwei Sedare da-pelwaro o ma kwoli kabira kam konto ko zege ka tega kam seeni se ko yi mɛ ba na ne to. 17Wɛ di-yuu kom tete ma daare naba-laara finlei ye ka wo di-yun-gala kam yiga ne. 18Ba ma gɔgere kunkwollu de ga-punnu nyenyero ba ke Sedare dɛ sem yera ne. Diga kam wo kandwa daa ba nae, ba na mɛ Sedare dɛ ba kwoli ko maama to ŋwaane. 19O ma kwɛ di-yun-gala kam se ba laam kwei Wɛ ni-gwonim dakaa kam ba ba ba zege da. 20Diga kam konto dedɔrem baŋa maŋem déem ye naba-laara fuga. Ka kaywalem baŋa maŋem de maa ye naba-laara fuga, ye ka wɛ-baŋa maŋem ye jatwogo de noa ni maŋem kuni finlei. O ma taare ka wo kom maama de sabu-seŋa. O ta ma kwei Sedare dɛ o ma ke kaanem bimbini ye o daare o ma sabu-seŋa o kwoli-de. 21Solomon ma yɔɔre o kwei sabu-seŋa o ma kwoli Wɛ diga kam maama o daare o kwei sabu-seŋa chegero o ma che Wɛ di-yun-gala kam ni dem. 22Konto dwoŋi mo Solomon déem pɛ ba kwei sabu-seŋa ba ma ba kwoli Wɛ diga kam maama ba vo ba ti. Ko ta ná ye kaanem bimbini delo na ye Wɛ di-yuu kom nyem to, o ma taare-de de sabu-seŋa.

23Solomon déem ma pa ba kwei Olivi dɛ ba gɔgere cherubi nyenyero telei se ba kwei-te ba zege Wɛ di-yun-gala kam wone. Se dedoa maama wɛ-baŋa maŋem maa ye jatwogo de noa ni maŋem kuni fuga. 24-26Ya maama jege vɔna yalei yalei mo. Vɔŋɔ dedoa maama dedɔrem maa ye jatwogo de noa ni maŋem kuni benu. Ko na zege cherubi dedoa vɔŋɔ kweelim jei ne se ko yi ko dwoŋi kom vɔŋɔ na kweeli mɛ to ye jatwogo de noa ni maŋem kuni fuga mo. Cherubi nyenyero telei tem maama mae daane mo.

27Solomon ma kwei cherubi selei sem o zege Wɛ wara-jei di-yun-gala kam wone. Se vɔna yam yarege pa se cherubi dedoa vɔŋɔ dwei kabira kam daa dedoa, ye kadwoŋi kam vɔŋɔ de dwei daa kadwoŋi kam. Se wo vɔna yam de ma dwei daane. 28O ma daare o kwei sabu-seŋa o ma taare cherubi selei sem. 29O ma pa ba gɔgere cherubi, de konkware, de ga-punnu nyenyero ba ke di-yun-gala kam de di-yuu kom maama wo kabiri sem yera ne. 30O ta ma kwei sabu-seŋa o ma kwoli di selei sem maama tega.

31-32Wɛ di-yun-gala kam ni dem jege bworru telei mo ba na mɛ Olivi dɛ ba ke. Solomon ma pa ba gɔgere cherubi, de konkware, de ga-punnu nyenyero ba ke te yera ne. Ba laam ma kwei sabu-seŋa ba ma taare bworru tem maama. Ba kwei dɛ mo ba ke ni dem ne pa se de jege sɛ senu.

33Ni delo na zoore Wɛ diga kam tete wone to, ba ma kwei Olivi dɛ ba ma ke ni dem sɛ sena. 34Ba ma kwei da-ŋonno ba ma ke bworru telei ba kwaare ni dem ne. Bworo maama maa wae ko pira. 35Solomon ma pa ba gɔgere cherubi, de konkware, de ga-punnu nyenyero ba ke te yera ne. Ba ma kwei sabu-seŋa ba taare te maama pa ko mara ko mara. 36Ba ma lɔ kabira Wɛ diga kam yera ne ba che ka tetare konkɔlɔ kom. Ba ma lware kandwa kuni betɔ ba daŋe da-baŋa ne, ye ba daare ba daŋe Sedare da-kwollu kandwa yam baŋa ne, ye ba lɔ konto ba di.

37Solomon paare dim bena yana bene dem wone mo, ba déem chwi Baŋa Wɛ diga kam kuri. Ko ye Zivi chana kam wone mo konto. 38Ka ma guri o paare dim bena fuga-dedoa bene dem wone. Ko maa ye chane nana chana kam yere na ye Bula to mo konto. Wɛ diga kam de ka yera wonnu maama ma lɔ fase, ne Solomon na jaane o boboŋa se o ke tei to. Ba déem kwei bena yarepɛ mo ba lɔ ka maama ba guri.

Currently Selected:

1 Pwa 6: KBG

Highlight

Copy

Compare