1 Pwa 4
4
Solomon tontoŋena bam taane
1Solomon déem tu o ji Isarele tiina bam maama pɛ. 2O dedɛɛra bam mo tento:
Zadoki bu Azaria mo ye Wɛ kaanem tu. 3Elihorefa de Ahija na ye Sisa bia to maa ye pɛ tɔn-poponna bam. Ahiluda bu Jehosafate maa ye wolo na tiŋi teo kom lonne twanno tem to. 4Jehoyada bu Benaya ye jar-keira bam yiga tu mo. Zadoki de Abiatara de maa ye kaanem tiina. 5Natan bu Azaria ye wolo na nii kateira yiga tiina bam baŋa ne to mo. Natan bu Zabudi maa ye kaanem tu ye o ta woli pɛ wom boboŋa kurim baŋa ne. 6Ahisara ye wolo na nii pɛ sɔŋɔ kom totoŋa baŋa ne to mo. Abeda bu Adoniram maa nii balo na toŋe totoŋ-dɛɛra to baŋa ne.
7Solomon déem tiŋi nɔɔna fuga-balei mo se ba taa nii Isarele kateira yam baŋa ne. Banto totoŋa maa ye se ba ja wodiu ba ba ba pa pɛ de o diga tiina chana dedoa bene maama wone. 8Yiga tiina bam de ba kateira yam mo tento:
Ben-Huri déem mo nii Efrayim zwonnu laŋa kam. 9Ben-Dekere maa nii Makaza, de Saalibim, de Bɛte-Semesa, de Elon-Bɛte-Hanan teene dem baŋa ne. 10Ben-Heseda maa nii Arubota, de Sokoo, de Hefera laŋa kam ni maama. 11Ben-Abinadab maa nii Dora kateiri dem maama baŋa ne. Wonto déem di Solomon bukɔ wolo yere na ye Tafata to
12Ahiluda bu Baana maa nii Taanaka, de Megido, de Bɛte-San jei selo maama na bwola de Zarefan na wo Jezerele teo tega-kuri seeni to. Jei sem konto zege Bɛte-San ne se tole konto se yi Abel-Mehola de Jokemeam teene dem maama.
13Ben-Gebere maa nii Ramofa-Gilead kateiri dem baŋa ne, ko ta woli de Gilead teene delo na ye Manasɛ tu Jayira dwi dem nyem to, dedaane Aragobi kateiri dem na wo Basan ne to, de de teene fuseredo dem ba na lɔge kabira ba kaare-de ye ba ma lu-nyenno ba gare de manchwo-nia yam to.
14Yido bu Ahinadaba maa nii Mahanayim kateiri dem. 15Ahimaazi maa nii Nafitali laŋa kam baŋa ne. Wonto de déem di Solomon bukɔ wodwoŋi yere na ye Basemafa to mo. 16Husayi bu Baana maa nii Asere laŋa kam, ko woli de Bealofa teo. 17Parua bu Jehosafate maa nii Isakara laŋa kam. 18Ela bu Simeyi maa nii Benjamin laŋa kam.
19Yuri bu Gebera maa nii Gilead kateiri dem. Ko maa ye jei selo Amori tiina Pɛ Sihon de Basan teo Pɛ Oga ya na di paare se baŋa ne to mo.
Ko ta woli da to, yiga tu dedoa déem mo jege logo kom maama o nia.
Solomon paare dim na vei yiga tei to
20Judah de Isarele tiina bam kɔgɔ déem daga dedɛ nenɛɛne buga ni kasolo na mae tei to mo. Ba di ba ni ye ba nyɔ ba sui. Ba maa jege wopwolo. 21Solomon di o paare dem teene dem maama baŋa ne se ko zege Yuferata buga kam ni ne, ko tole konto ko yi Filisi tiina tega kam ni, se ko daare ko vo ko yi Ejipti teo kom siseini dem. Solomon ta na ŋwe to, teene dento maama ŋwe ba lampwoo ye ba toŋe ba pa‑o mo.
22Wodiu kolo ba na lage dɛ maama wone se Solomon de o nɔɔna bam taa di to mo tento: mun-bwei ywollu fuseredo (60), dedaane muni ywollu bi de finlei (120), 23de naane fuga delo na nugi bigila-bigila to, de naane finlei delo na beeri gaao wone de di to, de pei bi, ko ta woli de wei, de feiri, de si, de cheeni#4:23 cheeni naa pisweeru to.
24Solomon déem tei teene delo maama na wo Yuferata buga kam wɛ-zoore seeni to de ba pwa bam mo. Laŋa kam konto zege Tipisa ne ka tole taa ka yi Gaza teo kom. Wo-zuru maa wo jei sem maama ne. 25Solomon déem ta na ŋwe maŋa kalo maama ne to lwia ba jege nɔɔna balo maama na zoore Judah de Isarele teo ne to, ko na zege Dan laŋa kam seeni se ko yi Beeriseba to. Sɔŋɔ maama ko ni twoo jege ba kare mo ba vara. 26Solomon déem chege najere morro finna (40,000)#4:26 40,000 naa 4,000 mo o zege se o sisei selo na vaŋe jara-keim torokooro to taa zege da. O ta maa jege sisein-nɔɔna morro fuga-selei (12,000).
27Chana maama wone kateiri yiga tiina fuga-balei bam dedoa dedoa jege se o ja wodiu mo o ba o pa Solomon de balo maama na di wodiu o tei ne to. Ba kwaane mo ba nii se o yé ga kolokolo. 28Ba ta jaane mena#4:28 mena = barley de ga-korro ba tui ba tiŋi ba pa sisein-nɔɔna selo na wae se duri lela to de sisei sesem sem maama. Ba maama déem ke ne ko na maŋe se ba taa ke tei to.
Pɛ Solomon swa na gaale tei to
29Wɛ na pɛ Solomon boboŋa de swa yalo to tiini ya daga dedɛ. O yi-poro kom de gaale nenɛɛne buga ni kasolo na mae tei to mo. 30O swa yam déem dana ya dwoi yi-pore-nyena balo maama na nwoŋi wɛ-puli seeni jei sem de Ejipti teo to. 31O déem jege swa o dwoi nabiina maama, ko ná maŋe ko ye Ezera dwi tu Etan, de Mahole bia batɔ Heman, de Kalekole, de Dareda mo de. O yere ma zaŋe teene delo maama na bwola da to ne. 32Solomon déem lage memaŋa morro tetɔ (3,000) mo o ke daane. O ma puli lei moro dedoa de senu (1,005) o tiŋi. 33O maa ŋɔɔne teeni de punnu dwi dwi taane, ko ná ye Lebanon Sedare teeni-kamunnu tem taane de Husopa punnu telo na puli kabiri yera ne to. O ta maa ŋɔɔne vara, de zuna, de tega-veila, de ywona dwi dwi taane. 34Logo baŋa teene pwa maama na nigi Solomon swa yam ŋwa to, mo ba toŋe ba nɔɔna se ba vo ba cheigi o ni taane.#Memaŋa 1:1; Kwor-tɛɛno 1:16; 12:9; Leiŋ-ywoŋa 1:1
Currently Selected:
1 Pwa 4: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
