1 Pwa 3
3
Solomon lwoori swa Baŋa Wɛ tei ne
1Solomon déem ke ni mo de Ejipti teo Pa-faro wom. O ma di Ejipti pɛ wom bukɔ o ma o ke kaane. O ma ja bukɔ wom o jwoori David teo kom se ko taa nii maŋa kalo o na wó lɔ o sɔŋɔ kom, de Baŋa Wɛ diga kam, de kabira kalo na kaare Jerusalem o ti to. 2Kanto maŋa kam ne, nɔɔna daa ta ke kaanem ba pa Wɛ mo wara-jei bimbina dwi dwi baŋa ne, bɛŋwaane ba ya ta wo lɔge diga Baŋa Wɛ yere dem zula ŋwaane.
3Solomon déem swoi Baŋa Wɛ ye o sɛ se o tɔge o kwo David bera yam. De ko de Solomon ta yeini o ke kaanem de zwɛɛm pɛɛra o pa Wɛ wara-jei bimbina yam baŋa ne mo. 4Wara-jei selo na jege kuri chekke se dwoi maama to déem wo Gibeon teo ne mo. Pɛ Solomon ma vo da o ke zwɛɛm kaanem kuni moro bimbini dem baŋa ne.#1 Tigisim 16:39 5O na wora to mo Baŋa Wɛ veere o tete ded‑o dendwea wone tete ne, ye o we, “Solomon, lwoori kolo maama n na lage to amo tei ne, se amo wó ke-ko a pa‑m.”
6Solomon ma leiri o we, “Nmo déem jege a kwo David swono lanyerane, o na ye nɔn-laao na jege nmo chega ye o yɔɔre o tɔge chwoŋa to ŋwaane. N ta ma‑n ke chega n pa‑o de n na pɛ o lo bakeira se wonto leiri o yuu ne o di paare dem se ko ba ko yi zem to. 7Amo Tu Baŋa Wɛ, nmo laam pɛ amo wolo na ye nmo tontoŋeno to leiri a kwo David yuu ne a ji pɛ mo. Amo nam ta ye bu mo ye a yeiri a yiga de a kwaga, se a taa wo a nɔɔna bam yiga ne. 8Nmo nam le amo mo se a taa nii nɔɔna balo n na kuri to baŋa ne. Ba nam tiini ba ye kɔ-fɔrɔ kolo ni na ware de jeeli to. 9Nam pa-ne boboŋ-laaro se a wane a nii n nɔɔna bam baŋa ne lanyerane, se a daare a ta wae a pɔɔre lam de lwarem daane. Kokuri to, wɔ mo wó wane nmo kɔ-fɔrɔ konto o nii o tete ne?”
10Baŋa Wɛ wo ma pwoli de Solomon na lwoori kolo to. 11O ma leiri‑o o we, “Ko lana de nmo na kwaane n lwoori se a pa‑m boboŋ-laaro se n wane n ja a nɔɔna bam de chega to. N wo lwoori se a pa‑m momwɛ-dɛɛre, de jejegero, naa se a pa n dona bam na chɔgem. Nmo nam na lwoori swa se n wane n lɔre chega kam to ŋwaane, 12amo wó seene a pa‑m kolo nmo na lwoori amo tei ne to, pa se n na swa de boboŋ-laaro. Nmo swa yam wó dwoni nɔɔna balo maama na lwoori‑m ba ŋwe to, de balo maama na wó saŋe nmo kwaga se ba taa ŋwe to de. 13Kolo nmo ta na wo lwoori amo tei ne to mo a lage a kwei a pa‑m a woli da. Amo wó pa n na jejegero, de zula n ŋwea maama wone, ye pɛ wodwoŋi tera o na wó taa nye de nmo. 14Nmo ná sɛ n tɔge a chwei sem ye n sɛ a nia yam nenɛɛne n kwo David na ke tei to, amo wó seene a pa‑m momwɛ-dɛɛre”.
15Solomon ma puri o yia dɔɔne wone ye o maane we ko ye dendwea wone mo Wɛ ŋɔɔne ded‑o. O ma jwoori o vo Jerusalem o zege Baŋa Wɛ ni-gwonim dakaa kam yiga ne o ke zwɛɛm pɛɛra de yazura pɛɛra o kaane o pa Wɛ. O laam ma bwoŋi o tontoŋena bam maama pa ba jeeri ba di wodi-fɔrɔ.
Ka-bworru telei taane
16Dɛ dedwe mo ka-bworru telei tu Pɛ Solomon tei se ba kwɛ ba taane. 17Ba dedoa maa we, “Pɛ, amo de kaane wonto mo zoore sɔŋɔ dedoa wone. O wora mo ye amo lo a bu. 18Ko na ke da yalei to, mo o de loga. Debam balei yerane nam ya mo zoora ye nɔn-gaa tera. 19Tete dedwe mo kaane wonto pane o bu wom o go dɔɔne wone. 20O ma zaŋe tete-koro ne o kwei a bu wom a takeiri ne o tiŋi‑o o nyɔɔne baŋa ne, ye a tigi a dɔa. O daare o kwei o bu wolo na tege to o tiŋi a takeiri ne. 21Tega na poore se a kwei a bu wom se o ŋɔge yele to, mo a nɛ we o tege mo. Ka na poore jagesage ye a na bu wom yibia to, a maane we o dae bu wolo a na loge to.”
22Kaane wodwoŋi wom de ma ta we, “Aawo! Bu wolo na ŋwe to ye amo bu mo. Wolo na tege to maa ye nmo nyem.” Da-yiga kaane wom de maa we, “Aawo! Bu wolo na tege to mo ye nmo bu, se wolo na ŋwe to ye amo bu mo.” Ba ma mage ni-kantɔgɔ konto dwoŋi Solomon yiga ne.
23Pɛ Solomon laam maa we, “Abam maama tɛ we bu wolo na ŋwe to mo ye á bu, se bu-too wom ye á dwoŋi nyem mo.” 24O ma toŋe nɔɔno se o vo o ja se-zɔɔ o ba o pa‑o. Ba na kwei ba pa‑o to, 25o ma pa ni we, “Zage-na bu wonto na ŋwe to belei, se á pɔɔre chichworru tem telei á pa kaana balei banto.”
26Ko ná ye bu wolo na ŋwe to nu wom, o maa tiini o jege o bu wom ŋwaŋa. O ma lwoori Solomon we, “Pɛ! Kwei bu wom n pa kaane wom. Yé go‑o.” Kaane wodwoŋi wom maa we, “Zage‑o belei! Amo ná gɛa, se o de ga” 27Solomon laam ma ta we, “Yé go bu wom. Kwei‑o n pa da-yiga kaane wom, se ko ye bu wom nu mo konto chekke.”
28Isarele tiina bam maama na nigi Solomon na bore kaana bam taane dem tei to, ko ma ke-ba yaau, ba na maane we Wɛ mo pɛ‑o swa se o taa ma o bore nɔɔna bora chekke to ŋwaane.
Currently Selected:
1 Pwa 3: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
