1 Pwa 2

David na pɛ Solomon bera yalo to

1Ko na yi se David te to, mo o bwoŋi o bu Solomon ye o ta o bere‑o we:

2“Ko bá dáane se amo te, ne nabiina maama na jege se ba te tei to. Nam ke dam n ke n tete kuri ne se n bere we n ye babea mo. 3Ta‑n yei n Tu Baŋa Wɛ na lage se n toŋe totoŋe delo to. Ta‑n tɔge chwei selo o na wó bere‑m to, se n toŋe n tɔge o nia yam, de o chullu tem, de o bera yam maama, nenɛɛne ya na popone ya tiŋi Moses twanno tem wone to. Nmo ná ke konto, ko wó pa‑m yiga-veiŋa woŋo maama wone de jeiga kalo maama nmo na wó vo to. 4Ko ta wó pa se Baŋa Wɛ déem na pwooli tetei de amo to ji chega we ‘Nmo dwi dem jege se ba taa cho ba tete de ba na jege ba ŋwea ba ŋwe tei to. Ba ná seene ba kwei ba chega ba pa-ne ye ba tɔge amo chwei sem de ba wo maama, nmo dwi dem bá ga nɔɔno se o di paare Isarele tiina bam baŋa ne.’

5Nam yé swei Zeruya bu Joaba déem na ke amo tei to. O go Nera bu Abenera, de Jefere bu Amasa. Banto maa ye Isarele jar-keira yiga tiina balei bam mo. Maŋa kalo tigura na tera dé logo kom wone to mo o go-ba ne ba wo jara wone mo tei. Jana bam konto wo o yuu ne, ne ba na kwei-ba ba taare o teiŋ-kila de o natera maama tei to mo.#2 Samuwel 3:27, 39; 20:10 6Nam ke‑o ne n boboŋa na lage tei to. Yé yage‑o se o te o tete toone. 7Ko nam ná ye Bazilayi wolo na nwoŋi Gilead to bia bam, ke banto lanyerane se n pa-ba ba ni-wodiu. Bɛŋwaane banto déem nii amo baŋa ne maŋa kalo a na duri se a lu nmo zembaaro Abisalom jeŋa ne to mo.#2 Samuwel 19:31-37

8Nam guli Simeyi wolo kwo na ye Gera ye o nwoŋi Bahurim na wo Benjamin kateiri dem ne to. Dɛ dem a na maa vei Mahanayim to mo o tiini o sɔɔle lwarem o yage a yuu ne. O maa na jeeri-ne Jɔdan buga kam ni ne to mo a pwooli Baŋa Wɛ yere ŋwaane we amo bá zɔ‑o a go.#2 Samuwel 16:5-8 9Nmo nam yé ke‑o nenɛɛne o jege bora. Nmo na jege swa lanyerane to, ta‑n yei n na wó ke‑o tei se o te jana wone, de o yuu na maŋe ko peere tei maama to de.”

10Konto kwaga ne, David ma te ye o vo o kwoa tei. Ba ma suli‑o David teo kom#2:10 David teo kom = Jerusalem wone. 11O nɛ bena finna mo Isarele teo paare dem wone. Bena finna yam wone, o ke bena yarepɛ mo Heboron ne, o daare o ke bena fintɔ-yatɔ Jerusalem ne. 12David bu Solomon ma leiri o di o kwo paare dem. O paare dem déem tiini de jeini lanyerane.

Solomon paare dem yɔɔre de jeini

13Dɛ dedwe, Adonija wolo nu na ye Hagifa to ma zaŋe o vo Bafeseba wolo na ye Solomon nu to tei. Bafeseba ma bwei Adonija o we, “N tu de wo-zuru mo na?” O ma leiri we, “Ɛɛ, a tu de wo-zuru mo.” 14O ta maa we, “A jege taane mo se a ta a bere‑m.” Bafeseba ma leiri o we, “Nam ta.”

15Adonija ma tole o taane dem o we, “Nmo maŋe n yei we, teo kom ya ye amo nyem mo. Isarele tiina maama maa teena se amo mo taa ye pɛ wolo na wó leiri David yuu ne to. Baŋa Wɛ nam mo laga ye o kwei paare dem o pa a choro kom. 16Tɔ, amo lage a lwoori woŋo dedoa mo n tei ne. Popo, nam yé ve-ne.” Bafeseba ma leiri o we, “Nam ta.” 17Adonija ma leiri o we, “A lage se n lwoori Pɛ Solomon se o kwei Abisage wolo na ye Sunem tu to o pa-ne se a ma a ji a kaane. Pɛ wom wó sɛ nmo na wó lwoori‑o kolo to.” 18Bafeseba ma leiri o we, “Ko lana. Amo wó seene a vo a ŋɔɔne de Pɛ Solomon a pa‑m.”

19Bafeseba na vei o yi da to, mo Pɛ Solomon zaŋe o jeeri‑o ye o daare o tiiri o yiga ne. O ma jwoori o vo o jeini tega ne ye o pa ba ja yituŋu ba ba ba pa o nu Bafeseba se o jeini o jazem seeni. 20Bafeseba ma ta o we, “A lage a lwoori wo-balaŋa mo n tei ne. Nam yé ve-ne.” Solomon ma leiri o we, “A nu, lwoori nmo na lage kolo to, se amo wó ke a pa‑m.”

21Bafeseba maa we, “Sɛ se n zembaaro Adonija kwei bukɔ wolo na nwoŋi Sunem ye o yere ye Abisage to o ma o ji o kaane.” 22Pɛ Solomon ma leiri o we, “Bɛ mo ye n lage se a pa se Abisage zo Adonija? Nam lɛɛre n yage se a pa‑o paare dem a woli da, o na ye amo zembaaro to ŋwaane. Nam ta ŋɔɔne n pa Wɛ kaanem tu Abiatara, de Zeruya bu Joaba de!”

23Pɛ Solomon ma du duuri Baŋa Wɛ yere ŋwaane o we, “A ná wo pɛ se Adonija ma o ŋwea o leiri woŋo kolo o na lwoori amo tei ne to yuu ne, se Wɛ go-ne. 24Ko ye Baŋa Wɛ mo tiŋi-ne se a leiri a kwo David yuu ne a di paare dem. O ma pwooli we Isarele tiina pwa wó nwoŋi a dwi dem ne. Ŋwea Tu Baŋa Wɛ na seene o wora to, Adonija jege se o te mo zem dɛ dem wone.” 25Pɛ Solomon ma toŋe Jehoyada bu Benaya se o vo o mage Adonija o go. Adonija ma seene o te.

26Pɛ wom ma ta o bere Wɛ kaanem tu Abiatara o we, “Jwoori n vo n tete teo Anatofe. Nmo maŋe se n te mo. A nam bá go‑m leile, bɛŋwaane nmo ya mo zeŋe Yuu-tu Baŋa Wɛ ni-gwonim dakaa kam n pa a kwo David. N ma‑n tiini n tɔge ded‑o n na yaara dedɛ.”#1 Samuwel 23:6 27Solomon laam ma le Abiatara Baŋa Wɛ kaanem totoŋe dem wone. O keim dem konto ma pa se Baŋa Wɛ na tage taane delo Siloo ne ye de vo Eli dwi dem seeni to ji chega.#1 Samuwel 2:27-36

28Joaba déem ye wolo na ke ni de Adonija se o ji pɛ to mo. O nam ya wo woli Abisalom. O na nigi we ba go Adonija to, o ma duri o vo o zo Baŋa Wɛ wara-vwei dem wone o ja kaanem bimbini dem nyea yam. 29Ba ma ta ba bere Pɛ Solomon we Joaba duri o zo Baŋa Wɛ wara-vwei dem o sale bimbini dem yera ne. Solomon ma ta de Jehoyada bu Benaya o we, “Véi n mage‑o n go.”

30Benaya ma vo o zo Wɛ wara-vwei dem wone o ta o bere Joaba o we, “Pɛ wom we, n nwoŋi n ba pwooni yiga.” Joaba ma leiri o we, “Aawo, a bá nwoŋi. Ywo mo a lage a te.” Benaya ma jwoori o vo o ta o bere Solomon Joaba na tage tei to. 31Solomon ma leiri Benaya o we, “Nam ke o na taga tei to. Mage‑o n go n daare n kwei‑o n suli. Konto mo wó bere we o déem na go nɔɔna balo to jana jene daa tere amo de a kwo dwi tiina bam yuu ne. 32O déem mɛ o se-zɔɔ o go Nera bu Abenera wolo na ye Isarele jar-keira bam yiga tu to, de Jefere bu Amasa wolo de na ye Judah jar-keira bam yiga tu to, ye a kwo ya yeiri ko ni ne. Banto balei nam ya ye nɔn-laaro ba gare Joaba. Baŋa Wɛ nam mo wó pa se o na o nɔn-gora kam ŋweo. 33Ba jana bam jene laam wó jwoori Joaba yuu ne, de o dwi tiina bam yuu ne taa wuu. Baŋa Wɛ nam wó fɔge o pa se David de o dwi tiina bam taa nae yazura, se wo-zuru taa wo o paare dem baŋa ne.”

34Pɛ Solomon na tage konto to, Benaya ma jwoori o vo Wɛ wara-vwei dem o mage Joaba o go. Ba ma kwei o yera yam ba vo o tete teo ba suli‑o kagoa kam wone. 35Solomon ma pa se Benaya leiri Joaba yuu ne o ji jar-keira bam yiga tu. O ma daare o pa Zadoki de leiri Abiatara yuu ne o ji Wɛ kaanem tu.

36Solomon ma toŋe o bwoŋi Simeyi ye o ta we, “Maŋe Jerusalem teo wone ywo se n lɔ sɔŋɔ n ta‑n zoore da. Nam yé lɔgese teo n vo jei jei. 37Dɛ dem n na wó nwoŋi Jerusalem n bɛ Kidoron nabara kam to, ba wó go‑m mo. Konto nam ná kea, ko ye nmo tete yiga mo.”

38Simeyi ma leiri Solomon o we, “Kolo nmo na taga to ye lanyerane mo. Amo wó ke kolo maama a Pɛ wom na taga to.” Simeyi ma zo Jerusalem ne o dáane.

39Bena yatɔ na kɛ to mo Simeyi kabɛ selei duri ba nwoŋi ba vo Gafa teo Pɛ Akisi wolo kwo na ye Maaka to tei. Simeyi na lɔre we ba wo Gafa ne to, 40o ma zaŋe o di o bonaga kam o vo Pɛ Akisi tei se o beeri o kabɛ sem. O ma na-ba ye o daare o ja-ba o jwoori sɔŋɔ.

41Solomon na maane we Simeyi zege Jerusalem ne o vo Gafa o jwoori to, 42o ma bwoŋi‑o ye o ta ded‑o o we, “Amo déem pɛ nmo pwooli Baŋa Wɛ ŋwaane we n yé nwoŋi Jerusalem teo wone. A ma daare a kaane‑m we, ‘Dɛ dem n na wó lɔgese teo to, nmo wó te mo.’ Nmo nam leiri amo we, kolo a na taga to lana, se nmo wó sɛ. Ko dae konto na? 43Bɛŋwaane mo n yiri ni delo n na pwooli de Baŋa Wɛ to, ye n daare n ve amo de ni dem?” 44Solomon daa ma ta de Simeyi o we, “N tete yɔɔre n yei puseŋa kikia yalo n na ke a kwo David baŋa ne to. Nam ta yei we Baŋa Wɛ mo wó waare‑m ko maŋe de zonne delo maama n na ke to. 45Se ko ná ye amo Pɛ Solomon, Baŋa Wɛ wó swɛ amo swolim, ye o ta pa se David dwi paare dem fɔge de jeini lanyerane taa wuu.” 46Solomon laam ma pa Jehoyada bu Benaya ni pa se o vo o mage Simeyi o go.

Konto baŋa ne mo Solomon déem nɛ dam se o paare dem wane de jeini chekke.

Currently Selected:

1 Pwa 2: KBG

Highlight

Copy

Compare