1 Pwa 22

Wɛ sampwora Mikaya na kaane Pɛ Ahab tei to

1Jara déem daa wo chugi Siria de Isarele laŋa ne ko vei bena yatɔ mo. 2Bene dem na wó ke bena yatɔ to wone mo Judah teo pɛ Jehosafate zaŋe o vo Isarele teo pɛ Ahab tei.#2 Tigisim 18:1-2 3Ahab déem ma ta de o dedɛɛra bam o we, “Abam swei we Ramofa-Gilead jeiga kam ye debam nyem mo na? Bɛ mo ye dé chem? Dé nam jege se dé zaŋe mo se dé wane dé jwoŋi dé teo kom Siria teo pɛ wom jeŋa ne.”

4Ahab ma bwei Jehosafate o we, “Nmo wó sɛ se n da de amo se dé vo Ramofa-Gilead dé ke jara de-ba na?” Jehosafate ma leiri o we, “Dé ye chorro mo daane. Ta‑n yei we debam jar-keira de dé sisein-nɔɔna maama ye nmo tete nyem mo.” 5Jehosafate ta ma ta Isarele teo pɛ Ahab o we, “Nam pa se dé da yiga dé bwei dé nii Baŋa Wɛ na tage kolo to se dé laam daare dé vo.”

6Ahab ma bwoŋi Wɛ sampwori sem o ke daane. Ba maa ye nenɛɛne nɔɔna bia yana (400). O ma bwei-ba o we, “Chwoŋa wora se a vo Ramofa-Gilead a ke jara de-ba, naa a yé vei?” Sampwori sem ma leiri ba we, “Pɛ, nam véi n gware-ba, se dé Teiru Wɛ wó kwei-ba o ke n jeŋa ne.” 7De ko de, Jehosafate ta bwei mo o we, “Baŋa Wɛ sampwora wodwoŋi daa wora ywo-seeni se dé bwei o de dé nii na?”#2 Pwa 3:11 8Pɛ Ahab ma leiri‑o o we, “Nɔɔno wodwoŋi ta daare, o yere mo Mikaya ye o ye Imila bu. Dé wó wane dé da wonto ŋwaane dé lɔre Baŋa Wɛ boboŋa. Ko nam na ye tei to, o ba swoi se o taa pworisi wo-laaro o pa-ne, se ko ye lɛɛro yerane mo. Konto ŋwaane mo a ba laga o ni taane kɔtaa.” Jehosafate ma leiri‑o o we, “Ko nam dae se n ta konto dwoŋi.” 9Ahab ma bwoŋi o dedɛɛra bam dedoa ye o ta ded‑o o we, “Ke lela n vo n ja Imila bu Mikaya n ba ywo-seeni.”

10Isarele teo pɛ Ahab dedaane Judah teo pɛ Jehosafate déem zo ba paare gwaaro mo ba jeini ba paare yitunnu baŋa ne ko maŋe de Samaria teo manchwoŋo ni dem. Jeiga kam déem ye mena ferem jeiga. Sampwori sem maama maa zege ba yiga ne ba pworisa. 11Ba dedoa yere na ye Zedekia ye o ye Chenaana bu to ma mage luu o ma o ji nyea. O ma ta de Ahab o we, “Baŋa Wɛ na tage kolo to mo tento: Nyea yanto bere we n jege dam mo se n ma n chu Siria tiina bam n go zɔŋ-zɔŋ.” 12Sampwori sem maama de déem pworisi konto mo ye ba we, “Pɛ, zaŋe n vo Ramofa-Gilead n ke jara n wane-ba. Baŋa Wɛ lage o kwei teo kom o ke n jeŋa ne mo.”

13Dedɛɛro wolo na vei se o bwoŋi Mikaya to ma ba o ta de Mikaya o we, “Nii mo! Sampwori sedwonna sem jege ni dedwe ba pworisi wo-laaro mo ba pa pɛ wom. Nmo de nam jege se n pworisi zaane taane mo ne banto na ke tei to.” 14Mikaya ma leiri‑o o we, “Ne Baŋa Wɛ na jege ŋwea tei to, ko ye chega mo we, Baŋa Wɛ na wó pa-ne ni se a ta kolo to yerane mo a wó ta a bere pɛ wom.”

15Mikaya na vei o yi Ahab tei to, Ahab ma bwei‑o o we, “Mikaya, chwoŋa wora se dé vo Ramofa-Gilead dé ke jara de-ba, naa dé yé véi?” Mikaya ma leiri‑o o we, “Pɛ, zaŋe n vo n ke jara yam n wane-ba, se Baŋa Wɛ mo lage o kwei teo kom o ke n jeŋa ne.” 16Ahab ma yɔɔre o ta Mikaya o we, “A maŋe a ta de nmo kuni dedɛ we, n jege se n du we n wó ta chega taane yerane mo n bere-ne maŋa kalo maama n na yeini n pworisi Baŋa Wɛ yere ŋwaane to.” 17Mikaya laam ma ta o we, “A nɛ Isarele jar-keira bam maama na jage peero tem baŋa ne ye ba beeri yɔɔ yɔɔ nenɛɛne pei selo na ba jege nayero to. Baŋa Wɛ ma ta o we, ‘Nɔɔna banto ba jege yuu tu. Yage-na se ba jwoori sɔŋɔ chemm de yazura.’ ”

18Isarele teo pɛ Ahab ma ta de Jehosafate o we, “A ya maŋe a ta de nmo we, o bá sɛ o pworisi wo-laaro o pa-ne, se lɛɛro yerane mo.”

19Mikaya daa ma ta o bere Ahab o we, “Nam cheigi Baŋa Wɛ na pɛ-ne kwora kalo to. A nɛ Baŋa Wɛ na jei o paare yituŋu baŋa ne ye Wɛ telaao kɔgɔ kom maama zege ba gilimi‑o, o jazem de jagwia seeni. 20Baŋa Wɛ maa we, ‘Wɔ mo wó sɛ o vo o gane Ahab se o vo Ramofa-Gilead o ke jara de-ba se o laam ga o ŋwea?’ Kɔgɔ kom maama dedoa dedoa ma ta o boboŋa. 21Ko kwola ne to, chichira kadwoŋi ma nwoŋi ka zege Baŋa Wɛ yiga ne ye ka ta ka we, ‘Amo wó wane a vo a gane Ahab’. 22Baŋa Wɛ ma bwei-ka o we, ‘N lage n ke tɛ mo n wane n ke konto?’ Chichira kam ma leiri ka we, ‘A lage a vo a pa se Ahab sampwori sem pworisi vwa pworisim mo.’ Baŋa Wɛ maa we, ‘Nmo wó na chwoŋa se n soge‑o. Nam véi n ke konto.’ 23Tɔ. Nam lɔre we Baŋa Wɛ seene o pa se n sampwori sem maama fɔ vwa ba pa‑m mo. Chega ŋwaane to, Baŋa Wɛ yɔɔre o tiŋi lɛɛro mo se te ba n baŋa.”

24Konto na ke to mo Chenaana bu Zedekia zaŋe o vo o mage Mikaya yibia ne ye o bwei‑o o we, “Baŋa Wɛ jworo ke tɛ mo ko yage amo ye ko ba nmo tei ko ŋɔɔne dede‑m?” 25Mikaya ma leiri o we, “Nii mo. Nmo wó lɔre debam wone wɔ mo tage chega dɛ dem n na wó zo di-yuu wone n seigi n tete to mo.”

26Isarele teo pɛ Ahab ma pa ni se ba ja Mikaya ye o we, “Ja-o-na á ja á vo teo kom dedɛɛro Amon tei, dedaane amo bu Joasa tei. 27Ta-na de-ba we, ‘Pɛ wom na tage kolo to mo tento: Ja-na nɔɔno wom á ke peena diga ne. Ta‑á pa‑o bworobworo fenfee de na yerane se ko taa nii maŋa kam a na wó zege jara yam wone a jwoori de yazura to.’ ”

28Mikaya ma leiri pɛ wom o we, “N ná seene n zege jara yam wone n jwoori de yazura, ko nam dae Baŋa Wɛ mo pɛ-ne kwora kam.” Mikaya ta ma ta de nɔn-kɔgɔ kom o we, “Á maama yé swei-na a na taga taane delo to.”

Pɛ Ahab toone

29Isarele teo pɛ Ahab de Judah teo pɛ Jehosafate déem ma zaŋe ba vo Ramofa-Gilead se ba ke jara de-ba. 30Ahab ma ta Jehosafate o we, “De ná zo jara yam wone, a laam wó leiri a yibia se ba yé lɔre-ne. Ko daare nmo wó zo n paare gwaaro tem.” Ahab ma seene o ke ne o na taga tei to, ye ba maama vo se ba ke jara yam.

31Siria tiina pɛ wom déem ya maŋe o bwoŋi o jara-keim toroko-dira dedɛɛra fintɔ-balei bam mo ye o pa-ba ni we, “Kwaare-na jara yam de Isarele teo pɛ wom yerane, se ko dae jar-keira badaara bam, ba ná maŋe ba ye dedɛɛra tei de.” 32Siria jara-keim dedɛɛra bam na nɛ Jehosafate ye o zo o paare gwaaro tem to, ba ma boŋe ye ba we, “Nii-na Isarele teo pɛ wom da!” Ba ma fɔɔre ba yi se ba ke jara ded‑o. Jehosafate na nɛ-ba to, o ma laare de kwor-dɛa. 33Siria jar-keira dedɛɛra bam ma maane we ko dae Isarele teo pɛ wom. Ba ma yage‑o ye ba kɛ.

34Siria jar-keiru wodwoŋi déem saŋe o taŋa mo o ta chene yɔɔ yerane. Chene dem ma vo de zɔ Isarele teo pɛ Ahab o nyɔɔne seeni mɛ o jara zela yam na wo kwoli‑o to. Ahab ma ta de o toroko-diru wom o we, “Pa se dé ke lela dé pipiri dé vo dáa yiga yiga jara yam wone, se a nɛ zonne mo.” 35Jara yam déem kea dɛ dem maama wone mo. Pɛ Ahab ma maŋe o toroko kom wone o sale o jeeri Siria tiina bam. O fufwollu tem jana ma lwo ba duri ba tagele toroko kom wo. Dɛ dem konto dedaan-ni ne mo o tega. 36Wea na maa zoore maŋa kalo to mo Isarele jar-keira bam keeri bɔge-bɔge ba we, “Ko ti ywoo! Pa-na se nɔɔno maama jwoori o tete teo!”

37Isarele teo pɛ Ahab na tege konto to, ba ma kwei o yera yam ba ja ba vo Samaria ba suli‑o da. 38Ba ma zare o toroko kom Samaria buga kam ni ne mɛ ka-tole na yeini se swɛ se yera da to. Dáane mo kukuri tu se deilimi Ahab jana bam. Konto déem ma pa se Baŋa Wɛ na tage kolo faŋa to ji chega.

39Ahab déem na di paare ye o toŋe wonnu telo maama to ba popone-te ba tiŋi Isarele Teo Pwa Seina tɔnɔ kom wone, ne ko ná ye o na lɔge pɛ sɔŋɔ o fɔge-ko de tuu yeili to, de o ta na lɔge teene delo maama to. 40O toone dem kwaga ne o bu Ahazia ma leiri o yuu ne o ji pɛ.

Judah teo pɛ Jehosafate taane

41Isarele teo pɛ Ahab paare dim bena yana bene dem ne mo Asa bu Jehosafate bobo se o di Judah teo paare. 42Jehosafate déem jege bena fintɔ-yanu mo ye o di paare dem. O ma jeini Jerusalem ne o di paare dem o ke bena finlei-yanu. O nu déem mo ye Silihi bukɔ Azuba. 43Jehosafate déem yɔɔre o kwei o kwo Asa totoŋ-naga kam maama mo, o wo ywori ka wone kɔtaa, pa se o totoŋa su Baŋa Wɛ yi lanyerane. O déem nam wo wane o chɔge wara-jei selo ba na ke kaanem da to. Nɔɔna daa ta ke kaanem de zwɛɛm pɛɛra jei sem konto ne mo. 44Kolo na woli da to mo ye Jehosafate pɛ se o de Isarele teo pɛ mo ke ni daane.

45Jehosafate déem na di paare ye o ke wonnu telo maama to, de o baare kikia yam, de o tigura keim maama ba popone-te ba tiŋi Judah Teo Pwa Seina tɔnɔ kom wone. 46O déem zeili baara balo ta na daare ye ba bwoori wara-jei sem ne to. Banto maa ye balo o kwo Asa ya na zeili o ga ye ba ta toŋe Judah laŋa kam ne to.

47Jehosafate paare maŋa kam ne Edom teo déem ba jege pɛ. Jehosafate mo le nɔɔno se o taa nii teo kom o pa‑o.

48Jehosafate déem ke nabwooru se te yeini te tɔge naneo te beeri pipiu ŋwaane. O ma boŋe se o toŋe-te Ofiri seeni se te zeŋe sabu-seŋa te ja ba. Nabwooru tem konto nam chɔge mo Ezion-gebera ne te maŋe da. Te daa ware te vo jei jei. 49Ahab bu Ahazia déem tage de Jehosafate o we, “Sɛ se nmo nɔɔna bam de amo de nɔɔna bam ke daane ba taa diini n nabwooru tem.” Jehosafate ma ve.

50Jehosafate ma te ye o vo o kwoa tei. Ba ma kwei‑o ba suli o kwoa bam yibeeli ne o nabaaro David teo Jerusalem ne. O toone dem kwaga ne o bu Jehoram ma leiri o yuu ne o ji pɛ.

Isarele teo pɛ Ahazia taane

51Judah teo pɛ Jehosafate paare dim bena fuga-yarepɛ bene dem ne mo Ahab bu Ahazia jeini Samaria ne o di Isarele teo paare. O ma di paare dem bena yalei. 52O déem ke lwarem o chɔge Baŋa Wɛ yiga nenɛɛne o kwo, de o nu, de Nebat bu Jeroboam déem na ke tei ye ba pa se Isarele tiina bam de tusi to. 53Ahazia déem zuli Baal jwoni dem mo. Ko ma pa se o chuchugi Baŋa Wɛ wom na ye Isarele tiina Wɛ to bane ko maŋe de o kwo de déem na ke tei to maama.

Currently Selected:

1 Pwa 22: KBG

Highlight

Copy

Compare