2 Pwa 1

Elija vei o jeeri Pɛ Ahazia

1Pɛ Ahab déem na tege to, mo Moaba tiina ve se ba taa wo Isarele tiina dam kuri ne.

2Dɛ dedwe mo Samaria teo pɛ Ahazia zege o nayuu ne o tɔge nayaa kam ne o chɔɔle o to tega ne pa se o tiini o fuuli. O ma toŋe o tontoŋena se ba vo ba bwei Ekoron tiina jwoni Baal-Zebubi ba nii, o wó jwoori o zaŋe naa o daa bá zaŋe.

3 Baŋa Wɛ maleka ma vo o ta de Wɛ sampwora Elija na ye Tisibi tu to ka we, “Zaŋe n vo n jeeri Pɛ Ahazia tontoŋena bam n bwei-ba we, ‘Aawo, bɛŋwaane mo abam maa vei se á bwei Ekoron tiina jwoni Baal-Zebubi se á nii? Wɛ nam tera Isarele teo wone mo na?#1 Pwa 17:1; 2 Tigisim 21:12 4Nam véi-na á ta de pɛ wom we o bere o bá zaŋe sara kalo o na tigi ka wone to. O jege se o te mo. Baŋa Wɛ na tage tei to mo konto.’ ” Elija ma seene o vo o ke konto.

5Tontoŋena bam ma jwoori ba vo pɛ Ahazia tei. O ma bwei-ba o we, “Bɛŋwaane mo abam jwoori á ba ywo?” 6Ba ma leiri ba we, “Nɔɔno mo jeeri debam o ta o we, dé jwoori dé ba dé ta de bere‑m we Baŋa Wɛ mo tage de nmo o we, ‘Bɛŋwaane mo n toŋe nɔɔna se ba vo ba bwei Ekoron tiina jwoni Baal-Zebubi ba nii? Wɛ tera Isarele teo wone mo pa se n ke konto na? Nmo keim dem konto ŋwaane n bá‑n yage sara kalo n na tigi ka wone to. Nmo jege se n te mo.’ ”

7Ahazia ma bwei-ba o we, “Nɔɔno wom na jeeri abam ye o ta konto dwoŋi to nye tetɛ mo?”

8Tontoŋena bam ma leiri‑o ba we, “Nɔɔno wom zo gɔrɔ kolo na jege varem koro to mo. O ma vɔ tankila o teiŋa ne.” Ahazia maa we, “Tisibi tu Elija mo konto.”

9Pɛ wom ma le jar-keira finnu de ba yiga tu o toŋe-ba Elija tei ne. Jar-keira yiga tu wom ma vo o na Elija na jei peo kodwoŋi yuu ne. O ma ta ded‑o o we, “Wɛ tontoŋeno, pɛ wom we n tu n ba o tei.” 10Elija ma leiri jar-keira yiga tu wom o we, “Amo ná seene a ye Wɛ tontoŋeno, se o pa min-vogo zege wɛyuu ne de ba de di nmo de n nɔɔna finnu bam maama kula.” O na tage konto o ti to, mo mini dem seene de nwoŋi wɛyuu ne de ba de zwɛ ba maama.

11Konto na ke to, pɛ wom ma jwoori o toŋe jar-keira finnu de ba yiga tu ye ba vo Elija tei. Yiga tu wom ma ta de Elija o we, “Wɛ tontoŋeno, pɛ wom we n ke lela n tu n ba o tei.” 12Elija ma leiri o we, “Amo ná seene a ye Wɛ tontoŋeno, se o pa min-vogo zege wɛyuu ne de ba de di nmo de n nɔɔna finnu bam maama kula.” Wɛ min-vogo kom ma seene ko nwoŋi wɛyuu ne ko ba ko zwɛ ba maama kula.

13Konto na ke to, pɛ wom daa ma jwoori o toŋe jar-keira finnu de ba yiga tu se ba vo Elija tei o ke yiga tiina batɔ tu. Jar-keira yiga tu wom ma vo o kuni dwoona Elija yiga ne ye o lwoori‑o o we, “Wɛ tontoŋeno, duri amo de a kwaga nɔɔna bam ŋwaŋa, se n yage se dé taa ŋwe. 14Ko ná ye jar-keira yiga tiina balei bam de ba kwaga nɔɔna bam, dé maane min-vogo kom na zege wɛyuu ne ko ba ko di ba maama tei to. Ko nam ná ye amo, duri a ŋwaŋa se n yage se a yé te.”

15 Baŋa Wɛ maleka kam ma ta de Elija ka we, “Zaŋe n tɔge ded‑o se á tu á vo pɛ wom tei. Nam yé ta‑n kɔre foone.” Elija ma seene o tu pa se ba tɔge daane ba vo ba yi pɛ wom tei. 16Elija ma ta de pɛ wom o we, “Baŋa Wɛ na tage kolo to mo tento: Nmo na toŋe nɔɔna se ba vo ba bwei Ekoron tiina jwoni Baal-Zebubi ba nii to, ko ye Wɛ na tera Isarele teo wone se n bwei‑o n nii to ŋwaane mo na? Keim dem konto ŋwaane, nmo daa bá‑n yage sara kalo n na tigi ka wone to se n zaŋe wɛɛne. N jege se n te mo.”

17Pɛ Ahazia ma seene o te, se ko maŋe de Wɛ sampwora Elija na wuuri o ta o taane tei to. Ahazia déem ba jege bakeira. Konto ŋwaane o nyaane Joram ma leiri o yuu ne o ji Isarele teo pɛ. Ko déem ke maŋa kalo Jehosafate bu Jehoram na di paare Judah teo ne o ke bena yalei to mo. 18Ahazia déem na di paare ye o toŋe wonnu telo maama to, ba popone-te ba tiŋi Isarele Teo Pwa Seina tɔnɔ kom wone.

Currently Selected:

2 Pwa 1: KBG

Highlight

Copy

Compare