1 Pwa 21

Nabofi kaduga kam

1Nɔɔno wodwoŋi déem mo wora, o yere mo Nabofi ye o nwoŋi Jezerele. O maa jege Vini teeni kaduga Jezerele ne, ye ka bwola de Samaria teo pɛ Ahab sɔŋɔ kom. 2Dɛ dedwe mo Ahab taga de Nabofi o we, “Sɛ se n kwei n kaduga kam n yeigi n pa-ne se a taa mae a du a dwoa da, ka na wo a sɔŋɔ takeiri ne to ŋwaane. A jege kaduga kadwoŋi na dwoi kanto kam se a ma a leiri ka yuu ne a pa‑m. N ya ze ná laga, a wó ŋwe ka kwora a pa‑m.” 3Nabofi ma leiri o we, “Baŋa Wɛ taa choa se a kwei a nabaara na daare tega kalo ba pa-ne to a pa‑m.”

4Pɛ Ahab ma jwoori sɔŋɔ ye o wo pɛ de Jezerele tu Nabofi na taga kolo to. O ma yɔɔre o peini o kadwogo baŋa ne o pa o yibia jeeri kabira kam ye o daare o ve se o di wodiu, Nabofi na ve se o kwei o kaduga kam o pa‑o to ŋwaane.

5Pɛ Ahab kaane Jezebele ma zo o bwei‑o o we, “Bɛŋwaane mo n wo chɔge pa se n ba lage wodiu?” 6Ahab ma leiri o we, “A vei a ta de Nabofi mo a we, o kwei o Vini teeni kaduga kam o yeigi o pa-ne. O nam daa ná laga, se a leiri ka yuu ne a pa‑o kaduga kadwoŋi. O ma ve se o kwei kaduga kam o pa-ne.” 7Jezebele ma leiri o we, “N dae Isarele teo pɛ mo na? Nam zaŋe wɛɛne se n di wodiu. Ta‑n sii n wonnu, se amo mo lage a pa se n jeŋa zo Jezerele tu Nabofi tega kam.”

8Jezebele ma popone twanno Ahab yere ŋwaane, o daare o kwei Ahab dam nyenyego kom o nye twanno tem baŋa ne. O ma toŋe-te o pa nakwa de dedɛɛra balo na jeini de Nabofi ba nii Jezerele teo kom to. 9O na popone kolo o ke twanno tem wone to mo tento: “La-na á teo kom nɔɔna bam á ke daane se á maama tu á tete Wɛ yiga ne ye á vɔ ni. Ta daare-na á pa se Nabofi jeini dedɛɛra bam jeiŋa jei ne. 10Ta pa-na se nɔn-kayɛ selei jeini ba jeeri Nabofi yiga ne. Banto laam wó ta we o tusi de o na sɔɔle lwarem o ke Wɛ yera ne, de pɛ wom yera ne to. Konto ná kea se á laam ja‑o á nwoŋi pwooni á dole‑o de kandwa á go.”

11Jezerele teo nakwa bam de dedɛɛra bam ma seene ba ke kolo Jezebele na pɛ-ba ni twanno tem wone se ba ke to. 12Ba ma seene ba la nɔɔna bam ba ke daane pa se ba maama vɔ ni. Ba ma daare ba pa se Nabofi jeini dedɛɛra jeiŋa jei ne. 13Nɔn-kayɛ selei sem de ma ba ba jeini Nabofi yiga ne. Ba laam ma ta ba bere nɔn-kɔgɔ kom maama we Nabofi ke o chɔge de o na sɔɔle lwarem o ke Wɛ de pɛ wom yera ne to. Ba ma vaŋe‑o ba ja ba nwoŋi teo kom pwooni ba dole‑o de kandwa ba go. 14Ba ma toŋe kwora ba pa Jezebele we, “Ba dole Nabofi de kandwa ba go.”

15Jezebele na yɔɔre o ni we Nabofi seene o te to, o ma ta de Ahab o we, “Jezerele tu Nabofi tega. O daa ba ŋwe. Konto to, véi n kwei tega kam o na ve se o yeigi o pa‑m to n ta‑n tei.” 16Ahab na nigi Nabofi toone dem ŋwa konto to mo o pɛ o zaŋe bedwe baŋa ne o vo Nabofi Vini teeni kaduga kam se o kwei-ka o taa jega.

17 Baŋa Wɛ kwora déem ma yi Tisibi tu Elija we, 18“Zaŋe n vo n jeeri Isarele teo pɛ Ahab na di o paare Samaria ne to. O vei Jezerele o jwoŋi Vini kaduga kalo ya na ye Nabofi nyem to mo o tei. 19Ta n bere‑o we, ‘Baŋa Wɛ na tage kolo to mo tento: Nmo go nɔɔno, ye n daare n vere o tega mo n woli da! Ko dae chega na?’ Ta daare n ta de Ahab we, ‘Baŋa Wɛ na tage kolo to mo tento: Ta‑n yei we kukuri jwa wó deilimi nmo tete jana jeiga kalo ne se zem na deilimi Nabofi jana to.’ ”#2 Pwa 9:26

20Elija na vei o jeeri Ahab to, Ahab ma ta ded‑o o we, “Konto to, a dono, nmo nɛ amo jeiga na?” Elija ma leiri o we, “A tu a na‑m se a ta a bere‑m we, n yɔɔre n yage n tete se n ke lwarem n chɔge Baŋa Wɛ yiga mo. 21Baŋa Wɛ nam tage o we, ‘Nii mo! Amo wó pa se lɛɛro yi‑m. A ta wó yɔɔre a chɔge dwi delo na wó saŋe n kwaga to maama kula. Nmo tete de n dwi dem bakeiri sem maama wó saare Isarele teo ne, ko ná ye balo ta na wo ba kwo sɔŋɔ ne to, de balo na tei ba tete to de. 22Amo wó pa se n sɔ-yuu kom ji nenɛɛne Nebat bu Jeroboam sɔ-yuu kom, de Ahija bu Baasa sɔ-yuu kom na ye tei to, n na chuchugi a bane ye n ta pa se Isarele tiina ke wɛleera yalo to ŋwaane.’ 23Ko nam ná ye Jezebele, Baŋa Wɛ tage o taane o we, ‘Kukuri mo lage se di‑o Jezerele teo kabira teiŋa ne.’#2 Pwa 9:36 24N dwi dem nɔɔno wolo maama na wó te teo kolo wone to wó ji kukuri ni-wodiu mo. Wolo na wó te pwola ne to maa wó taa ye duura ni-wodiu.”

25Nɔɔn-nɔɔno déem tera o na yɔɔre o yage o tete se o ke lwarem o chɔge Baŋa Wɛ yiga ko ma de Ahab. Ko déem ye o kaane Jezebele mo soge‑o se o ke konto. 26Ahab déem tiini o ke lwarem jwona kaanem baŋa ne mo, nenɛɛne Amori tiina bam ya na ke tei to. Baŋa Wɛ déem zeili banto mo tega kam baŋa ne ye Isarele tiina bam laam ba ba jeini da.

27Ahab déem nam na nigi taane dem konto Elija tei ne to, o ma kaare o gwaaro o yage, o daare o zo gare-nyenyaaro ye o vɔ ni wo-chechɔgɔ ŋwaane. O lɛɛre o tigi de gare-nyenyaaro tem mo ye o nyɔne o yiga o via.

28 Baŋa Wɛ kwora daa ta ma yi Tisibi tu Elija we, 29“N nɛ Ahab na gwooni o tete a yiga ne tei to na? O na tu o tete konto to, a daa bá pa se lɛɛro tem yi‑o ye o ta ŋwe. A nam wó pa te ba o kwaga kam baŋa ne mo maŋa kalo o bu wom na wó ba o di paare to.”

Currently Selected:

1 Pwa 21: KBG

Highlight

Copy

Compare