1 Pwa 20

Ben-hadadi ke jara de Samaria tiina

1Siria teo pɛ Ben-hadadi déem bwoŋi o jar-keira bam mo o ke daane. Pwa fintɔ-balei de ba sisein-nɔɔna de ba torokooro ma tɔge ded‑o ba vo Samaria teo se ba kwaare jara de ko nɔn-bia bam. 2Ben-hadadi ma toŋe o tontoŋena se ba vo ba zo teo kom ba ta ba bere Isarele tiina pɛ Ahab we, “Ben-hadadi kwora mo tento: 3‘Ahab, amo mo laam tei n lu-nyenno tem de n sabu-seŋa kam, ko woli de n ka-yorro tem de n bu-swonnu tem maama.’ ” 4Pɛ Ahab ma leiri o we, “A tu, n tage chega. Amo tete de kolo maama a na seene a jege to ye nmo nyem mo.”

5Ben-hadadi daa ma toŋe o tontoŋena bam ye ba jwoori ba ba ba ta de Ahab ba we, “Ben-hadadi we, ‘A ya pɛ kwora yi‑m we, n jege se n kwei n lu-nyenno tem, de n sabu-seŋa kam, de n kaana bam, de n bia bam mo n ja n ba n pa-ne. 6Nam ta‑n yei we, jwa kanto maŋa ne a wó toŋe a dedɛɛra se ba ba ba buŋi nmo sɔŋɔ kom de n dedɛɛra bam de di sem maama. Ba laam wó kwei woŋo kolo maama na jege lonne ko pa‑m to ba ja ba ba ba pa-ne.’ ”

7Ahab ma bwoŋi Isarele nakwa bam maama o ke daane ye o ta de-ba o we, “Á wo nɛ na? Ben-hadadi laam lage cham mo o pae debam! O ya na taga o we o lage o jwoŋi a kaana bam, de a bia bam, de a lu-nyenno tem, de a sabu-seŋa kam to, a yɔɔre a sɛ mo.” 8Nakwa bam de nɔn-kɔgɔ kom maama ma leiri‑o ba we, “Yé cheigi Ben-hadadi taane. Nam yé sɛ n ke kolo o na taga to.”

9Ahab laam ma leiri Ben-hadadi tontoŋena bam o we, “Véi-na á kwei a kwora kanto á pa á pɛ wom we, ‘Amo tu, ko ná ye n na dɛ yiga n ta we n lage n jwoŋi wonnu telo a tei ne to, a sɛ. Se ko ná ye wonnu telo n ta na lage se n vere n woli da to, a bá sɛ konto kɔtaa.’ ” Ba ma seene ba ja kwora kam ba vo ba pa Ben-hadadi.

10Ben-hadadi daa ma toŋe kwora o pa Ahab ye o we, “A dugi we, a ná wo pɛ se a jar-keira bam chɔge Samaria teo zɔŋ-zɔŋ, se wa yam laam yɔɔre ya chɔge-ne ya woli da. Á teo kom fwogo daa bá daare se a kwaga nɔɔna bam dedoa dedoa wane ba pɛ jaguli-yi.” 11Isarele teo pɛ Ahab ma toŋe kwora o leiri o we, “Ta-na á bere Ben-hadadi we, ‘Nɔɔno ba gare o zeiŋi o vɔna o tɛ we o wane, ye jara ta wo bobo. Cheigi se n nii, n wó lu jara yam wone na.’ ” 12Kwora kam na yi Ben-hadadi maŋa kalo to, o de pwa badwonna bam déem jei ba nyɔ sana ba vwoa yam wone mo. O ma ta de o jar-keira bam o we, “Nwoŋi-na á ti á yiga se á vo á ke jara de Samaria tiina bam.” Ba ma seene ba ke konto.

Baŋa Wɛ jwoŋi Isarele tiina bam

13Sento nɛ sem ni ne mo Wɛ sampwora kadwoŋi vei o ta de Isarele teo pɛ Ahab o we, “Baŋa Wɛ na tage kolo to mo tento: N nɛ Ben-hadadi jar-keira bam kɔgɔ na daga tei to na? Amo zem lage a pa se n di-ba mo. Konto wó pa se n lɔre we amo mo ye Baŋa Wɛ wom.” 14Ahab ma bwei o we, “Wɛ wó tɔge wɔ baŋa ne mo o ke konto?” Sampwora kam ma leiri ka we, “Baŋa Wɛ na tage kolo to mo tento: Nɔn-donno telo na toŋe ba pae kateira yam dedɛɛra bam to mo wó ke jara yam.” Ahab ta ma bwei o we, “Wɔ mo wó da ba yiga o ke jara yam?” Sampwora kam de ma leiri ka we, “Ko ye nmo mo wó ke konto.”

15Ahab ma bwoŋi nɔn-donno telo na toŋe ba pae kateira yam dedɛɛra bam to o ke daane. Ba maa ye jar-keira bia yalei de fintɔ-balei (232). O ma daare o bwoŋi Isarele jar-keira balo na daare to maama o ke daane. Banto maa ye nɔɔna morro terepɛ (7,000). 16Ba maama ma zaŋe wea tetare ne ba nwoŋi se ba ke jara yam, de Ben-hadadi na jei o nyɔ sana de pwa fintɔ-balei bam ba vwoa wone pa se ba bugi to. 17Isarele nɔn-donno tem ma da yiga ba vo se ba kwaare jara yam. Ben-hadadi ya toŋe nɔɔna se ba vo ba yere jei sem. Ba ma jwoori ba ta de Ben-hadadi ba we, “Jar-keira badwonna mo zege Samaria teo ne ba beena”. 18Ben-hadadi ma leiri-ba o we, “Ba ná tu se ba lwoori yibwona amo tei ne, naa ba ná tu se ba ke jara mo, ko maama ye bedwe mo. Ja-na-ba se á nam yé go-ba.”

19Isarele nɔn-donno tem déem ma gwɛ ba nwoŋi teo kom wone ye jar-keira nɔn-kɔgɔ kom maama wo ba kwaga ne. 20Jar-keiru maama ma mage Siria tu dedoa o go. Siria tiina balo na daare to duri se ba lu jara yam wone, ye Isarele tiina bam pare-ba mo. Siria teo pɛ Ben-hadadi ma di sisein-nɔɔno o duri o kɛ. O nɔɔna badwonna de wane ba di sisein-nɔɔna ba duri ba lu. 21Isarele teo pɛ Ahab de o jar-keira bam ta ma duri ba yi Siria jar-keira bam, de ba sisei sem, de ba torokooro tem. Ba ma zaŋe ba baŋa ne ba go ba dedɛ.

22Konto kwaga ne mo Wɛ sampwora kam fɔɔre o yi Isarele teo pɛ Ahab tei ye o we, “Fɔge n ke baare n ke n nɔɔna bam kuri ne, se n boŋe n nii n na wó ke tei. Kokuri to, ben-doore ná yia, Siria teo pɛ wom daa ta wó nwoŋi se o ke jara de abam.”

23Ko nam ná ye Siria teo pɛ dedɛɛra bam, banto mo tage ded‑o ba we, “Isarele tiina wa yam jege dam peero jei sem ne mo. Konto ŋwaane mo Isarele tiina bam wane debam ba di. Dé nam ná jwoori dé kwaare jara de-ba te-kampare sem ne, dé wó seene de wane-ba. 24N nam na wó ke tei to, le pwa fintɔ-balei bam n yage, n daare n pa se jar-keira yiga tiina leiri ba yuu ne ba taa nii jara yam baŋa ne. 25Nam ta jwoori n la jar-keira badwonna se ba taa mae de balo n ya na gɛ jara yam wone to. Ta kwaleme sisein-nɔɔna de torokooro se te ni taa mae de telo n ya na jege to. Dé laam wó wane dé vo dé kwaare jara de Isarele tiina bam te-kampare sem ne. De ná ke konto, de wó yɔɔre dé wane-ba.” Siria teo pɛ ma sɛ o ke o dedɛɛra bam na tage kolo to.

26Ben-doore na jwoori de yi to, Siria teo pɛ Ben-hadadi ma la o jar-keira bam o ke daane, ye ba vo Afeka se ba ke jara de Isarele tiina bam. 27Isarele jar-keira bam de ma ti ba yiga de ba jara zela. Ba ma nwoŋi ba vo se ba kwaare jara de-ba. Ba na jeeri daane konto to, Isarele tiina bam déem nye de bobom-bia kɔgɔ de kɔgɔ kuni belei mo. Siria tiina kɔgɔ kom nam faare tega kam maama mo.

28Wɛ tontoŋeno wom ma vo o ta de Isarele teo pɛ Ahab o we, “Baŋa Wɛ na tage kolo to mo tento: Siria tiina bam na boŋe we amo Baŋa Wɛ jege dam peero jei sem ne mo se ko dae te-kampare ne to, a lage a pa se n wane ba jar-keira kɔgɔ konto maama n di mo. Konto wó pa se abam maama lɔre we amo mo seene a ye Baŋa Wɛ wom.”

29Jar-keira kɔgɔ kuni belei bam kwei da yarepɛ mo ba tigisi kɔgɔ de kɔgɔ ba chichei ba zege ye ba yiga jeeri daane. Da yarepɛ dɛ dem ne jara yam ma bobo. Isarele tiina bam ma go Siria tiina jar-keira balo na vei tega ne to morro bi (100,000) dɛ dem konto wone. 30Ba badaara bam ma duri ba zo Afeka teo wone se ba lu. Teo kom kabira kam ma bwori ka to tega ne buri-buri ka pane ba morro finlei-terepɛ (27,000) ka go. Pɛ Ben-hadadi de ma duri o zo teo kom wo o seigi o tete di-yuu wone.

31Ben-hadadi dedɛɛra bam ma ta ded‑o ba we, “Nii mo. Dé nigi we Isarele dwi dem pwa yeini ba jege nɔɔna yibwona. Nam pa se dé tu dé tete dé zo gare-nyenyaaro, se dé daare de vɔ ŋone dé yuni ne dé vo de lwoori Isarele tiina pɛ wom. Dɛ delo o laam wó yage‑m se n ta‑n ŋwe.” 32Ba ma seene ba zo ba gare-nyenyaaro tem ye ba daare ba vɔ ŋone ba yuni ne. Ba ma vo Isarele tiina pɛ tei ba ta ded‑o ba we, “Pɛ, n tontoŋeno Ben-hadadi lwoori‑m we, ‘Jan ja! Yage se a taa ŋwe.’ ” Pɛ Ahab ma leiri o we, “Ben-hadadi ta ŋwe mo na? Dé nam ye da-yuudwonna mo.”

33Ben-hadadi dedɛɛra bam maa wo pɛ se Ahab ni to tega ne ye ba sɛ o taane dem ba we, “Ben-hadadi seene o ye n yuudwoŋi chekke mo.” Ahab ma ta de-ba o we, “Véi-na á ja‑o á ba.” Ben-hadadi na tu to, Ahab ma pa se o di o jeini o toroko kom baŋa ne. 34Ben-hadadi déem ma ta o we, “Amo wó jwoori a kwei teene delo a kwo déem na tɔge jara baŋa ne o vere n kwo jeŋa ne to a pa‑m. A ta wó pa‑m chwoŋa se n tiŋi ya-fwaaro Damasika ne, nenɛɛne a kwo déem na maŋe o ke tei Samaria ne to.” Pɛ Ahab ma leiri o we, “Ni delo n na tage konto to ŋwaane a wó yage‑m se n viiri.” O déem ma gwoni ni ded‑o ye o daare o yage‑o pa se o viiri.

Wɛ sampwora na tage kolo o chɔge Pɛ Ahab to

35 Baŋa Wɛ déem ma pa o sampwori sem kɔgɔ wone nɔɔno dedoa ni ye o vo o ta de o dwoŋi sampwora o we, “Popo, mage-ne n ke zonne.” O dwoŋi wom ma ve se o ke konto. 36Sampwora kam ma ta ded‑o o we, “N na ve Baŋa Wɛ ni dem konto to, ta‑n yei we, n ná yɔɔre n yage-ne n ma‑n viira, nywoŋo mo lage ko go‑m chwoŋa yuu ne.” O na maa viiri to mo bedwe baŋa ne nywoŋo seene ko jeeri‑o ko go.

37Sampwora kam daa ma vo o na nɔɔno wodwoŋi ye o ta‑o we, “Mage-ne n ke zonne!” Nɔɔno wom ma tiini o mage‑o o fuuli o yera. 38Sampwora kam ma kwei gare-yi o vɔ o yibia ne se nɔɔn-nɔɔno yé lɔre‑o. O ma vo o zege chwoŋa ni ne o cheigi Pɛ Ahab se o tɔge da o kɛ. 39Pɛ wom na maa kɛ to mo sampwora kam bwoŋi‑o o we, “Pɛ, amo ya wo jara wone mo ko chana. Nɔɔno ma ja peeno o ba o ke a jeŋa ye o daare o kaane-ne o we, ‘Fɔge n yere nɔɔno wonto lanyerane. O nam ná vere n jeŋa ne o lu, n jege se n te mo. Ko ná dae konto, n wó ŋwe lu-nyenno dunni na yi kilo fintɔ-tena (34) to.’ 40A nam ya kwei a yiga mo a ke dáa ne a wora a nii totoŋa yadwonna baŋa ne pa se peeno wom duri o lu.” Pɛ wom ma leiri o we, “Nmo na fereme n tete de n beinnu tem to, ko ye n tete yiga.”

41Sampwora kam ma ke lela o le gɔrɔ kom o yibia ne. Pɛ wom ma lɔre lela we, o ye sampwori sem wone dedoa mo. 42O ma ta de pɛ wom o we, “Baŋa Wɛ na tage kolo to mo tento: Ko nam ná ye nɔɔno wolo a ya na we, n jege se n yɔɔre n chɔge‑o to, nmo yage kotu pa se o viiri. Konto ŋwaane nmo nam mo jege se n leiri kotu yuu ne n te. N nɔɔna bam de maa wó leiri kotu nɔɔna bam yuni ne ba na lɛɛro.” 43Isarele teo pɛ Ahab na nigi konto to, o ma jwoori o vo Samaria teo ye o wo pɛ.

Currently Selected:

1 Pwa 20: KBG

Highlight

Copy

Compare