1 Pwa 19

Elija duri o vo Sinayi peo

1Pɛ Ahab déem ma ta Elija kikia yam de o na mɛ o se-zɔɔ o go Baal sampwori sem tei to maama o bere o kaane Jezebele. 2Jezebele ma toŋe kwora se ka yi Elija we, “A dugi we, jwa kanto maŋa ná yia ye a wo go nmo ne n na go Baal sampwori sem tei to, se wa yam go amo de.”

3Elija na nigi konto to, foone ma zo‑o. O ma duri se o jwoŋi o tete Jezebele jeŋa ne. O ma vo o yi Beeriseba teo na wo Judah ne to o yage o tontoŋeno wom dáane. 4Elija tete ma zaŋe o kwei dɛ dem maama o kɛ o zo kagoa kam wone. O ma yi o jeini vɔkɔŋɔ kuri ne ye o lwoori Baŋa Wɛ se o yage se o te. O maa we, “Baŋa Wɛ, a na nɛ cham delo to, ko daga. Nam ti a ŋwea se a ba gare balo na tege to.” 5Elija ma lɛɛre o maŋe vɔkɔŋɔ kom kuri ne o peini o dɔ. O na tigi o dɔ konto to mo Wɛ maleka pɔpɔ ka ba ka dwei‑o ye ka we, “Zaŋe wɛɛne se n di wodiu.” 6O ma nii o na bworobworo kolo ba na wɔge to na zege o yuu seeni. Kunkwolo de ko wo na de maa zege da. O ma di ye o daare o nyɔ na bam. O laam ma jwoori o guni o peini.

7 Baŋa Wɛ maleka kam ma jwoori o tei ne ka dwei‑o, ye ka we, “Zaŋe wɛɛne n di wodiu n woli da, se n chwoŋa ta dɔra.” 8Elija ma seene o zaŋe o di wodiu o daare o nyɔ na. O na di o na dam-doore konto to, mo o kwei da finna, tete de wea maama, o vo o yi Sinayi#19:8 Sinayi: Hiburu = Horeb peo kom na ye Baŋa Wɛ tete jeiga to.

Baŋa Wɛ na veere o tete de Elija tei to

9Elija ma vo o zo peo bɔɔne wone o peini o poore tega. Baŋa Wɛ kwora ma pɔpɔ ka ba o tei we, “Elija, bɛŋwaane mo n tu ywo-seeni?” 10Elija ma leiri o we, “Amo tiini a seene a yia se a taa toŋa a pae nmo Baŋa Wɛ na ye Paŋwa to mo. Isarele tiina bam nam ve n na gwoni ni delo de-ba to, ba daare ba chochoge n kaanem bimbina yam. Ba ta mɛ ba se-zɔɔro ba go n sampwori sem, ye amo yerane mo daare. Ba nam boŋe se ba go amo de ba woli da mo.” 11Baŋa Wɛ ma ta ded‑o o we, “Nwoŋi n vo n di peo kom yuu se n zege a yiga ne, se amo Baŋa Wɛ lage a ba a tɔge dáane mo a kɛ.”

Vo-dɛɔ ma pɔpɔ ko zaŋe Baŋa Wɛ yiga ne ko lɔ peo kom belei ko daare ko mumugi kandwa yam. Ko na ke konto to, Baŋa Wɛ tera vio kom wone. Konto kwaga ne tega kam de ma tiini ka ziziŋi, ye Baŋa Wɛ tɔge o tera. 12Tega kam ziziŋim dem kwaga ne min-vogo de ma ba ko kɛ, ye Baŋa Wɛ tera mini dem wone. Konto kwaga ne mo kwor-memena zaŋa ne waasa tei to. 13Elija na nigi to, o ma ja o gɔrɔ o kwoli o yibia ye o daare o vo o maŋe bɔɔne dem ni ne o zega. O ma ni kwora na ŋɔɔne ded‑o ka we, “Elija, bɛŋwaane mo n tu ywo-seeni?” 14Elija ma leiri o we, “Amo tiini a seene a yia se a taa toŋa a pae nmo Baŋa Wɛ na ye Paŋwa to mo. Isarele tiina bam nam ve n na gwoni ni delo de-ba to, ba daare ba chochoge n kaanem bimbina yam. Ba ta mɛ ba se-zɔɔro ba go n sampwori sem, ye amo yerane mo daare. Ba nam boŋe se ba go amo de ba woli da mo.”

15 Baŋa Wɛ ma ta ded‑o o we, “N na tɔge chwoŋa kalo n ba ywo-seeni to, jwoori n da konto n vo Damasika kagoa kam. N ná vei n yi da, se n lwo nuga Hazayeli yuu ne n ma‑n tiŋi‑o Siria teo pɛ.#2 Pwa 8:13; 9:1-3 16Nam ta ke konto dwoŋi n tiŋi Nimisi bu Jehu se o taa ye Isarele teo pɛ, se n daare n tiŋi Elisa wolo na ye Abel-Mehola tu Safate bu to se o leiri n yuu ne o ji a sampwora. 17Jehu wó go balo maama na duri ba lu Hazayeli jeŋa ne to. Elisa de maa wó go balo maama na duri ba lu Jehu jeŋa ne to. 18A nam tiŋi nɔɔna morro terepɛ (7,000) mo Isarele laŋa kam ne. Banto wo fɔge ba kuni dwoona ba zuli Baal jwoni dem. Ba nam wo mɛ ba ni-vɔɔro ba duuri-de.”

Elisa na saŋe Elija kwaga tei to

19Elija ma yage jei sem konto o vo o beeri Safate bu Elisa jei. O ma na‑o ye o jege nabɛ selei selei kuni fuga-belei o vara. Elisa tete mo kale nabɛ selei sem na wo kwaga ne to o jege o vara. Elija ma fɔɔre o yi o tei ye o le o gare-daŋɔ kom o daŋe Elisa bakale ne. 20Elisa ma yage nabɛ sem ye o daare o duri o tɔge Elija kwaga. O maa we, “Yage se a vo a bane a kwo de a nu, se a laam ba a taa tɔge‑m.” Elija ma leiri o we, “Tɔ. Jwoori sɔŋɔ. Nam yé swei a na ke tei n yera ne to.”

21Elisa ma pipiri o viiri o daare Elija. O ma vo o ja o nabɛ selei sem o go o ma ke kaanem. O ma kwei se yera zela yam o ma o dwei mini o saŋe nɔna yam. O laam ma pɔɔre-ya o pa o nɔɔna bam ye ba di. O na bane-ba to mo o lɛɛre o vo o tɔge Elija kwaga o woli‑o totoŋa baŋa ne.

Currently Selected:

1 Pwa 19: KBG

Highlight

Copy

Compare